ໃນໂອກາດນີ້, ທ່ານ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ລັດຖະມົນຕີ ກະຊວງການຕ່າງປະເທດ ແຫ່ງ ອົດສະຕຣາລີ ພ້ອມດ້ວຍຄະນະ ທີ່ໄດ້ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ພ້ອມທັງ ສະແດງຂອບໃຈ ຕໍ່ຄຳຢ້ຽມຢາມຖາມຂ່າວ ແລະ ຄຳອວຍພອນ ໃນໂອກາດທີ່ໄດ້ດຳລົງຕຳແໜ່ງນາຍົກລັດຖະມົນຕີ ຄົນໃໝ່ ໃນທ້າຍປີ 2022 ທີ່ຜ່ານມາ ຈາກທ່ານນາຍົກລັດຖະມົນຕີ ແຫ່ງ ອົດສະຕຣາລີ; ໄດ້ແຈ້ງໃຫ້ຊາບ ກ່ຽວກັບສະພາບການພັດທະນາເສດຖະກິດ-ສັງຄົມ, ລວມທັງ ການຈັດຕັ້ງປະຕິບັດ 2 ວາລະແຫ່ງຊາດ ຂອງ ສປປ ລາວ; ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ ແລະ ອົດສະຕຣາລີ ຕະຫຼອດໄລຍະ 70 ປີທີ່ຜ່ານມາ ເຊິ່ງມີບາດກ້າວຂະຫຍາຍຕົວຢ່າງຕໍ່ເນື່ອງ ແລະ ໄດ້ຮັບຜົນສຳເລັດ ໃນຫຼາຍດ້ານ; ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນອົດສະຕຣາລີ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ແກ່ ສປປ ລາວ ໃນໄລຍະຜ່ານມາ ເປັນຕົ້ນ ການຊ່ວຍເຫຼືອເພື່ອການພັດທະນາ, ການຊ່ວຍເຫຼືອເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ລວມທັງ ການສະໜອງວັກຊີນກັນພະຍາດດັ່ງກ່າວ, ການສ້າງຄວາມເຂັ້ມແຂງ ໃຫ້ແກ່ພະນັກງານ ແລະ ອື່ນໆ ໂດຍຫວັງຢ່າງຍິ່ງວ່າໃນອະນາຄົດ ຝ່າຍອົດສະຕຣາລີ ຈະສືບຕໍ່ໃຫ້ການຊ່ວຍເຫຼືອ ສປປ ລາວ ຕື່ມອີກ; ສະແດງຄວາມຊົມເຊີຍຕໍ່ການສ້າງຕັ້ງຫ້ອງການທີ່ປຶກສາທູດດ້ານການປ້ອງກັນຊາດຂອງອົດສະຕຣາລີ ປະຈຳ ສປປ ລາວ; ຖືໂອກາດນີ້ ສະເໜີໃຫ້ສອງກະຊວງການຕ່າງປະເທດ ລາວ ແລະ ອົດສະຕຣາລີ ສືບຕໍ່ເຮັດວຽກຮ່ວມກັນ ເພື່ອຍົກລະດັບການຮ່ວມມື ເປັນຄູ່ຮ່ວມມືຮອບດ້ານ ໃນອະນາຄົດ;  ສປປ ລາວ ມີຄວາມພ້ອມ ແລະ ຄວາມຍິນດີ ຈະຮັບພິຈາລະນາແຜນການປະຕິບັດ (Concept Paper) ທີ່ຝ່າຍອົດສະຕຣາລີ ສະເໜີ, ໄດ້ສະເໜີຝ່າຍອົດສະຕຣາລີ ສືບຕໍ່ຊຸກຍູ້ນັກລົງທຶນອົດສະຕຣາລີ ມາລົງທຶນ ຢູ່ ສປປ ລາວ ໃນຂະແໜງການທີ່ມີທ່າແຮງ ໃຫ້ຫຼາຍຂຶ້ນຕື່ມອີກ ໂດຍສະເພາະ ໃນຂະແໜງພະລັງງານສະອາດ, ເສດຖະກິດດິຈິຕອນ, ກະສິກຳທັນສະໄໝ ແລະ ອື່ນໆ. ນອກຈາກນັ້ນ, ທ່ານ ນາຍົກລັດຖະມົນຕີ ຍັງສະແດງຄວາມຍິນດີ ໃນການສືບຕໍ່ເຮັດໜ້າທີ່ເປັນປະເທດປະສານງານການພົວພັນ ອາຊຽນ-ອົດສະຕຣາລີ (2021-2024) ເພື່ອເພີ່ມທະວີການຮ່ວມມື ອາຊຽນ-ອົດສະຕຣາລີ ໃຫ້ແຕກດອກອອກຜົນຍິ່ງໆຂຶ້ນ, ພ້ອມທັງ ຍິນດີທີ່ຈະເດີນທາງໄປເຂົ້າຮ່ວມກອງປະຊຸມສຸດຍອດອາຊຽນ-ອົດສະຕຣາລີ ທີ່ອົດສະຕຣາລີ ຈະເປັນເຈົ້າພາບ ໃນປີ 2024. ພ້ອມດຽວກັນ ກໍ່ຝາກຄຳເຊື້ອເຊີນ ໄປຍັງທ່ານ ນາຍົກລັດຖະມົນຕີ ແຫ່ງ ອົດສະຕຣາລີ ມາຢ້ຽມຢາມ ສປປ ລາວ ໃນໂອກາດທີ່ເໝາະສົມ ຕື່ມອີກ.