ທ່ານນາຍົກລັດຖະມົນຕີ ຕ້ອນຮັບ ທ່ານປະທານອົງການກວດສອບແຫ່ງລັດ ສສ ຫວຽດນາມ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 25 ພ.ຈ 2022 18:00

​​​​​ໃນຕອນບ່າຍ ວັນທີ 25 ພະຈິກ 2022 ທີ່ສຳນັກງານນາຍົກລັດຖະມົນຕີ, ທ່ານ ພັນຄຳ ວິພາວັນ ນາຍົກລັດຖະ ມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂງ ວັນ ຕວັນ, ປະທານອົງການກວດສອບແຫ່ງລັດ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ.

​​​​​​ໃນໂອກາດນີ້, ທ່ານນາຍົກລັດຖະມົນຕີ ໄດ້ກ່າວສະແດງ ຄວາມຍິນ ດີຕ້ອນ ຮັບ ແລະ ຕີລາຄາສູງ ຕໍ່ທ່ານປະທານອົງການກວດສອບແຫ່ງລັດ ສສ ຫວຽດນາມ ພ້ອມຄະນະ ທີ່ ໄດ້ເດີນ ທາງ ຢ້ຽມ ຢາມ ແລະ  ເຮັດວຽກ ຢູ່ ສປປ ລາວ ໃນຄັ້ງນີ້ ຊຶ່ງມີຄວາມສໍາຄັນເປັນພິເສດ ເນື່ອງຈາກວ່າເປັນໄລຍະເວລາ ທີ່ສອງພັກ, ສອງລັດ ແລະ ປະຊາຊົນສອງຊາດ ກຳລັງສະເຫຼີມສະຫຼອງປີສາມັກຄີມິດຕະພາບ ກໍ່ຄື ສະເຫຼີມສະຫຼອງສອງວັນປະຫວັດ ສາດ ລາວ ແລະ ຫວຽດນາມ ຢ່າງເປັນຂະບວນຟົດຟື້ນ ແລະ ມີຄວາມໝາຍເລິກເຊິ່ງ, ພ້ອມທັງ ໄດ້ຕີລາຄາສູງ ຕໍ່ການພົວພັນຮ່ວມມື ຂອງ ສອງອົງການກວດສອບ ທີ່ມີທ່າການຂະຫຍາຍຕົວຢ່າງຕັ້ງໜ້າ ແລະ ກ້າວ ເຂົ້າ ສູ່ ລວງ ເລິກ.  ຫວັງຢ່າງຍິ່ງວ່າ ໃນອະນາຄົດ ສອງອົງການກວດສອບ ຈະສືບຕໍ່ເພີ່ມທະວີການຮ່ວມມື, ປຶກສາຫາລື ແລະ ຖອດຖອນບົດຮຽນກັນ ເພື່ອຜັນຂະຫຍາຍເນື້ອໃນບົດບັນທຶກການຮ່ວມມືຂອງສອງອົງການກວດສອບແຫ່ງລັດ ໃຫ້ປະກົດຜົນເປັນຈິງ ແລະ ມີປະສິດທິຜົນສູງ ເພື່ອປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ເກີດດອກອອກຜົນບໍ່ຢຸດຢັ້ງ; ຖືໂອກາດນີ້, ທ່ານ ນາຍົກລັດຖະມົນຕີ ກໍ່ໄດ້ສະແດງຊົມເຊີຍ ແລະ ປິຕິຍິນດີ ຕໍ່ທ່ານປະທານອົງການກວດສອບແຫ່ງລັດ ສສ ຫວຽດ ນາມ ທີ່ໄດ້ຖືກຮັບຮອງຈາກສະພາແຫ່ງຊາດ ໃຫ້ເປັນປະທານອົງການກວດສອບແຫ່ງລັດຄົນໃໝ່ ໃນເດືອນ ຕຸລາ 2022 ທີ່ຜ່ານມາ.
 
​​​​​ໃນໂອກາດດຽວກັນ, ທ່ານປະທານ ອົງການກວດສອບແຫ່ງລັດ ສສ ຫວຽດນາມ ກໍ່ໄດ້ສະແດງຄວາມຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ແຈ້ງຈຸດປະສົງ ແລະ ສະ ພາບ ການ ຮ່ວມ ມື ຂອງສອງອົງການກວດສອບແຫ່ງລັດ ຂອງ ສສ ຫວຽດນາມ ແລະ ສປປ ລາວ ໃນ ໄລ ຍະ ຜ່ານ ແລະ ແຜນ ການ ຮ່ວມ ມື ໃນ ຕໍ່ ໜ້າ ໃຫ້ທ່ານນາຍົກລັດຖະມົນຕີ ຮັບຊາບຕື່ມອີກ.​
​​​​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ