ທ່ານຮອງນາຍົກລັດຖະມົນຕີ ຕ້ອນຮັບຜູ້ຕາງໜ້າອົງການ JETRO ແລະ ນັກທຸລະກິດ ຍີ່ປຸ່ນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 18 ພ.ຈ 2022 17:00

​ຕອນແລງ ວັນທີ 17 ພະຈິກ 2022 ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍບັນດາທ່ານ ຮອງລັດຖະມົນຕີ ກະຊວງທີ່ກ່ຽວຂ້ອງ ໄດ້ຕ້ອນຮັບການເຂົ້າຢ້ຽມຂໍ່ານັບແລະ ພົບປະຂອງຜູ້ຕາງໜ້າອົງການ JETRO ພ້ອມດ້ວຍຄະນະນັກທຸລະກິດຍີ່ປຸ່ນ ເຊິ່ງນໍາໂດຍທ່ານ KOBAYASHI Kenichi ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ.

ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສາຍພົວພັນແລະ ການຮ່ວມມື ລະຫວ່າງ ລາວ ແລະ ຍີ່ປຸ່ນ ທີ່ມີມາແຕ່ດົນນານ ໂດຍສະເພາະ ການນຳຂັ້ນສູງຂອງສອງປະເທດ ໄດ້ໄປມາຫາສູ່ເຊິ່ງກັນ ແລະ ກັນ ເປັນປົກກະຕິ, ສຳລັບການຮ່ວມມືໃນຂົງເຂດເສດຖະກິດ ສປປ ລາວ ແລະ ຍີ່ປຸ່ນ ໄດ້ລົງນາມຮ່ວມກັນໃນສັນຍາວ່າດ້ວຍການສົ່ງເສີມ ແລະ ປົກປ້ອງການລົງທຶນ (Bilateral Investment Treaty) ໃນປີ 2008, ສ່ວນໃນຂົງເຂດພາກພື້ນ ແມ່ນມີການຮ່ວມມືພາຍໃຕ້ສັນຍາຮ່ວມມືເສດຖະກິດແບບຮອບດ້ານລະດັບພາກພື້ນ (RCEP) ທີ່ໄດ້ລົງນາມໃນປີ 2021 ທີ່ຜ່ານມາ ອັນໄດ້ເປັນເງື່ອນໄຂອັນດີ ສໍາລັບນັກລົງທຶນຍີ່ປຸ່ນ ທີ່ຈະມາດໍາເນີນທຸລະກິດ ແລະ ລົງທຶນຢູ່ ສປປ ລາວ. ໃນໄລຍະ 10 ກ່ວາປີຜ່ານມາ ການລົງທຶນຂອງປະເທດຍີ່ປຸ່ນ ຢູ່ ສປປ ລາວ ໄດ້ມີການເພີ່ມຂຶ້ນຫຼາຍ, ຊຶ່ງຈັດຢູ່ໃນອັນດັບທີ 15 ຂອງການລົງທຶນຈາກ 53 ປະເທດທີ່ມາລົງທຶນໃນ ສປປ ລາວ ຊຶ່ງມີຈໍານວນໂຄງການຫຼາຍກວ່າ 146 ໂຄງການ ມີມູນຄ່າການລົງທຶນເຖິງ 317 ລ້ານກວ່າໂດລາສະຫະລັດ, ໃນນີ້ ໄດ້ລົງທຶນໃສ່ຂະແໜງກະສິກໍາ, ອຸດສາຫະກຳ-ກະສິກຳ-ອຸດສາຫະກຳໄມ້, ການຄ້າ, ການບໍລິການ, ໂຮງແຮມ, ຮ້ານອາຫານ, ຕັດຫຍິບ, ກໍ່ສ້າງ, ສຶກສາ, ພະລັງງານໄຟຟ້າ ແລະ ອື່ນໆ. ສະເພາະ ການລົງທຶນຂອງນັກລົງທຶນຍີ່ປຸ່ນ ຢູ່ເຂດເສດຖະກິດພິເສດ ໃນທົ່ວປະເທດ ຈຳນວນ 55 ໂຄງການ ມີມູນຄ່າ 182,8 ລ້ານໂດລາສະຫະລັດ ຊຶ່ງໄດ້ລົງທຶນໃສ່ຂະແໜງການຄ້າ ຈຳນວນ 6 ໂຄງການ ມູນຄ່າ 1,3 ລ້ານໂດລາສະຫະລັດ; ຂະແໜງການບໍລິການ ຈຳນວນ 16 ໂຄງການ ມູນຄ່າ 48,6 ລ້ານໂດລາສະຫະລັດ ແລະ ຂະແໜງອຸດສາຫະກໍາ ຈໍານວນ 33 ໂຄງການ ມູນຄ່າ 132,9 ລ້ານໂດລາສະຫະລັດ.
ໃນໂອກາດດຽວກັນ, ຜູ້ຕາງໜ້າອົງການ JETRO ພ້ອມດ້ວຍຄະນະນັກທຸລະກິດຍີ່ປຸ່ນ ກໍໄດ້ກ່າວສະແດງຄວາມຂອບໃຈ ຕໍ່ທ່ານ ຮອງນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້, ພ້ອມທັງ ແຈ້ງຈຸດປະສົງ ແລະ ການເຄື່ອນ ໄຫວຢູ່ ສປປ ລາວ ໃຫ້ແກ່ທ່ານ ຮອງນາຍົກລັດຖະມົນມົນຕີ ໄດ້ຊາບ ໂດຍສະເພາະ ຜົນຂອງການປຶກສາຫາລື ກັບກະຊວງແຜນການ ແລະ ການລົງທຶນ ທີ່ໄດ້ມີການລົງນາມຮ່ວມກັນໃນບົດບັນທຶກການຮ່ວມມື ວ່າດ້ວຍການສົ່ງເສີມການລົງທຶນຢູ່ ສປປ ລາວ. ພ້ອມດຽວກັນນີ້, ທັງສອງຝ່າຍຍັງຢືນຢັນ ຈະໃຫ້ການຮ່ວມມືຊ່ວຍເຫຼືອເຊິ່ງກັນ ແລະ ກັນ ໃນການຊຸກຍູ້ສົ່ງເສີມການລົງທຶນ ໃນຮູບແບບຕ່າງໆ ໃຫ້ຫຼາຍຂຶ້ນ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ