ທ່ານນາຍົກລັດຖະມົນຕີ ຕ້ອນຮັບ ທ່ານປະທານຄະນະກຳມະການປະຊາຊົນ ນະຄອນຫຼວງຮ່າໂນ້ຍ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນເສົາ, 05 ພ.ຈ 2022 10:00

​​​ໃນຕອນບ່າຍ ວັນທີ 4 ພະຈິກ 2022 ທີ່ສຳນັກງານນາຍົກລັດຖະມົນຕີ, ທ່ານ ພັນຄຳ ວິພາວັນ ນາຍົກລັດຖະ ມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ເຈີ່ນ ສີ ແທ່ງ, ປະທານຄະນະກຳມະການປະຊາຊົນ ນະຄອນ ຫຼວງຮ່າໂນ້ຍ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ.​

ໃນໂອກາດນີ້, ທ່ານນາຍົກລັດຖະມົນຕີ ໄດ້ກ່າວສະແດງ ຄວາມຍິນ ດີຕ້ອນຮັບ ແລະ ຕີລາຄາສູງ ຕໍ່ທ່ານປະ ທານ ຄະນະກຳມະການປະຊາຊົນ ນະຄອນຫຼວງຮ່າໂນ້ຍ ພ້ອມຄະນະ ທີ່ ໄດ້ເດີນ ທາງ ຢ້ຽມ ຢາມ ແລະ  ເຮັດວຽກ ຢູ່ນະ ຄອນຫຼວງວຽງຈັນ ໃນຄັ້ງນີ້ ຊຶ່ງເປັນໄລຍະເວລາ ທີ່ ສອງພັກ, ສອງລັດ ແລະ ປະຊາຊົນສອງຊາດ ກຳລັງສະເຫຼີມສະຫຼອງປີສາມັກຄີມິດຕະພາບ ກໍ່ຄື ສະເຫຼີມສະຫຼອງສອງວັນປະຫວັດສາດ ລາວ ແລະ ຫວຽດນາມ ຢ່າງເປັນຂະບວນຟົດຟື້ນ ແລະ ມີຄວາມໝາຍເລິກເຊິ່ງ ທັງເປັນການປະກອບສ່ວນເຂົ້າໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ ແລະ ຫວຽດນາມ, ພ້ອມທັງ ໄດ້ຕີລາຄາສູງ ຕໍ່ການພົວພັນຮ່ວມມື ຂອງ ສອງ ນະ ຄອນ ຫຼວງ ທີ່ມີທ່າການຂະຫຍາຍຕົວຢ່າງຕັ້ງໜ້າ ແລະ ກ້າວ ເຂົ້າ ສູ່ ລວງ ເລິກ ໃນຫຼາຍຂົງເຂດ ເປັນຕົ້ນ ຂົງ ເຂດການເມືອງ, ເສດຖະກິດ, ວັດທະນະທຳ-ສັງຄົມ ລວມທັງ  ດ້ານ ພື້ນ ຖານໂຄງລ່າງ, ການກໍ່ສ້າງຊັບພະຍາກອນມະນຸດ, ການປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ແລະ ອື່ນໆ;  ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ ຂອງນະຄອນຫຼວງຮ່າໂນ້ຍ ໃຫ້ແກ່ນະຄອນຫຼວງວຽງຈັນ ໃນໄລຍະຜ່ານມາ.  ຫວັງຢ່າງຍິ່ງວ່າ ໃນອະນາຄົດ ນະຄອນຫຼວງຮ່າໂນ້ຍ ຈະສືບຕໍ່ເພີ່ມທະວີການຮ່ວມມື ແລະ ໃຫ້ການຊ່ວຍເຫຼືອ ນະຄອນ ຫຼວງວຽງຈັນ ກໍ່ຄືບັນດາແຂວງຂອງ ສປປ ລາວ ເພື່ອປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດ ຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ເກີດດອກອອກຜົນ ບໍ່ຢຸດຢັ້ງ; ຖືໂອກາດນີ້, ຂໍສະແດງຊົມເຊີຍສອງນະຄອນຫຼວງ ຂອງສອງປະເທດ ທີ່ໄດ້ມີການຮ່ວມມື, ປຶກສາຫາລື ແລະ ຖອດຖອນບົດຮຽນກັນ ເພື່ອຜັນຂະຫຍາຍເນື້ອໃນບົດບັນທຶກການຮ່ວມມືຂອງສອງນະຄອນຫຼວງ ໃຫ້ປະກົດຜົນເປັນຈິງ ແລະ ມີປະສິດທິຜົນສູງ, ໂດຍສະເພາະ ບາງວຽກງານທີ່ຕິດພັນກັບການຈັດຕັ້ງຜັນຂະຫຍາຍ 2 ວາລະແຫ່ງຊາດ ເຊິ່ງຈະປະກອບສ່ວນສຳຄັນໃນການສ້າງຄວາມເຂັ້ມແຂງ ແລະ ພັດທະນາແບບຍືນຍົງ ໃຫ້ແກ່ ນະຄອນຫຼວງວຽງຈັນ ເວົ້່າສະເພາະ ກໍ່ຄື ຂອງ ສປປ ລາວ ເວົ້າລວມ. ນອກຈາກນັ້ນ ຍັງໄດ້ສະເໜີໃຫ້ ສອງນະຄອນຫຼວງ ສືບຕໍ່ເຮັດວຽກຮ່ວມກັນ ໃນບັນດາແຜນວຽກທີ່ໄດ້ມີການຕົກລົງຮ່ວມກັນແລ້ວນັ້ນ ໃຫ້ມີປະສິດທິຜົນສູງ ແລະ ບັນລຸຕາມແຜນການທີ່ວາງໄວ້ ເປັນຕົ້ນ ໂຄງການກໍ່ສ້າງອາຄານ ພະແນກຍຸຕິທໍາ ແລະ ອົງການໄອຍະການປະຊາຊົນນະຄອນຫຼວງວຽງຈັນ; ໂຄງການກໍ່ສ້າງສູນການຄ້າ ແລະ ການທ່ອງທ່ຽວ ນະຄອນຫຼວງຮ່າໂນ້ຍ ຢູ່ນະຄອນຫຼວງວຽງຈັນ; ໂຄງການກໍ່ສ້າງສູນການຄ້າ ແລະ ການທ່ອງທ່ຽວ ຂອງນະຄອນຫຼວງວຽງຈັນ ຢູ່ນະຄອນ ຫຼວງຮ່າໂນ້ຍ ລວມທັງ ໂຄງການອື່ນໆ.

ໃນໂອກາດດຽວກັນ, ທ່ານປະທານ ຄະນະກຳມະການປະຊາຊົນ ນະຄອນຫຼວງຮ່າໂນ້ຍ ກໍ່ໄດ້ສະແດງຄວາມຂອບໃຈ ຢ່າງສູງ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນກ່ຽວຂ້ອງ ຂອງ ສປປ ລາວ ໃນຄັ້ງນີ້, ພ້ອມທັງ ແຈ້ງຈຸດປະສົງ ແລະ ສະ ພາບ ການ ຮ່ວມ ມື ລະຫວ່າງ ນະ ຄອນຫຼວງຮ່າໂນ້ຍ ແລະ ນະ ຄອນ ຫຼວງວຽງ ຈັນ ໃນ ໄລ ຍະ ຜ່ານ ແລະ ແຜນ ການ ຮ່ວມ ມື ໃນ ຕໍ່ ໜ້າ ໃຫ້ທ່ານນາຍົກລັດຖະມົນຕີ ຮັບຊາບ. ໃນໂອກາດເດີນທາງ ມາເຄື່ອນໄຫວເຮັດວຽກ ແລະ ເຮັດວຽກຢູ່ ສປປ ລາວ ຄັ້ງນີ້ ທ່ານປະທານຄະນະກຳມະການປະຊາຊົນ ນະຄອນຫຼວງ ຮ່າໂນ້ຍ  ຍັງໄດ້ເຂົ້າຮ່ວມພິທີວາງສີລາລືກໂຄງການກໍ່ສ້າງສໍານັກງານພະແນກຍຸຕິທໍາ ແລະ ອົງການໄອຍະການປະຊາຊົນນະຄອນຫຼວງວຽງຈັນຫຼັງໃໝ່ ທີ່ເຂດດົງໝາກຄາຍ ເມືອງໄຊທານີ, ນະຄອນຫຼວງວຽງຈັນ ຕື່ມອີກ.
                              ​
ພາບ ແລະ ຂ່າວໂດຍ: ກົມປະຊາສໍາພັນ, ຫສນຍ

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ