ນາຍົກລັດຖະມົນຕີ ຕ້ອນຮັບຄະນະຜູ້ແທນ ຄະນະປະສານງານທົ່ວປະເທດ ອະດີດ ທະຫານອາສາສະໝັກ-ຊ່ຽວຊານຫວຽດນາມ ທີ່ໄດ້ຊ່ວຍເຫຼືອການປະຕິວັດລາວ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນສຸກ, 04 ພ.ຈ 2022 18:00

​​ໃນຕອນແລງວັນທີ 04 ພະຈິກ 2022 ທີ່ສໍານັກງານນາຍົກລັດຖະມົນຕີ ສະຫາຍ ພັນຄໍາ ວິພາວັນ ນາຍົກລັດຖະ ມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ພົຈ. ຮວິ່ງ ດັກເຮືອງ ພ້ອມດ້ວຍຄະນະຜູ້ແທນ ຄະ ນະປະ ສານ ງານທົ່ວປະເທດ ອາດີດ ທະ ຫານ ອາ ສາ ສະ ໝັກ- ຊ່ຽວ ຊານ ຫວຽດ ນາມ ທີ່ໄດ້ຊ່ວຍ ເຫຼືອການປະຕິວັດລາວ ໃນໂອກາດທີ່ໄດ້ເດີນ ທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ.

​ໃນໂອກາດນີ້, ສະຫາຍ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນ ທາງ ມາ ຢ້ຽມ ຢາມ ສ ປ ປ ລາວ ຂອງຄະນະໃນຄັ້ງນີ້ ຊຶ່ງເປັນໄລຍະເວລາ ທີ່ ສອງພັກ, ສອງລັດ ແລະ ປະຊາຊົນສອງຊາດ ກຳລັງສະເຫຼີມສະຫຼອງປີສາມັກຄີມິດຕະພາບ ກໍ່ຄື ສະເຫຼີມສະຫຼອງສອງວັນປະຫວັດສາດ ລາວ ແລະ ຫວຽດນາມ ຢ່າງເປັນຂະບວນຟົດຟື້ນ ແລະ ມີຄວາມໝາຍເລິກເຊິ່ງ ທັງເປັນການປະກອບສ່ວນເຂົ້າໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ ແລະ ຫວຽດນາມ ພ້ອມທັງ ຕີລາຄາສູງ ຕໍ່ການເສຍສະຫຼະຂອງບັນດາສະຫາຍອາດີດທະຫານ ແລະ ຊ່ຽວຊານ ໃນການປະກອບສ່ວນພາລະກິດຕໍ່ສູ້ ເພື່ອການປະຕິ ວັດ ຂອງສອງປະເທດ ໃນໄລຍະຕໍ່ສູ້ປົດປ່ອຍປະເທດຊາດ ແລະ ໄດ້ນໍໍາເອົາເອກະລາດມາສູ່ປະຊາຊົນ ຂອງສອງປະເທດ. ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ປະທານ ໂຮ່ຈິມິນ ຜູ້ຍິ່ງໃຫຍ່, ປະ ທານ ໄກສອນ ພົມວິຫານ ແລະ ປະທານສຸພານຸວົງ, ຜູ້ນໍາທີ່ເຄົາລົບຮັກ ເປັນຜູ້ກໍ່ຕັ້ງ ແລະ ຖະນຸຖະໜອມ ມາເປັນເວລາຫຼາຍສິບປີ ຈົນກາຍເປັນມໍລະດົກອັນລ້ຳຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງປະເທດ, ທັງເປັນ ປັດໄຈຕັດສິນໄຊຊະນະ ຂອງການປະຕິວັດ ແລະ  ຍັງໄດ້ຮັບການເສີມຂະຫຍາຍ ເຂົ້າສູ່ທັງທາງກວ້າງ ແລະ ລວງເລິກ ນັບ ມື້ ເກີດດອກ ອອກ ຜົນ ຕົວ ຈິງ ໃນ ທຸກ ຂົງ ເຂດ, ໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນ ສອງຊາດ ລາວ ແລະ ຫວຽດນາມ. ພ້ອມກັນີ້ ໄດ້ສະແດງຄວາມຮູ້ບຸນຄຸນຢ່າງລົ້ນເຫຼືອ ຕໍ່ບັນດາສະຫາຍອາ ດີດ ທະ ຫານ ອາ ສາ ສະ ໝັກ- ຊ່ຽວ ຊານ ຫວຽດ ນາມ ທີ່ໄດ້ສະຫຼະເລືອດເນື້ອ, ຄວາມສຸກສ່ວນຕົວ ຄຽງ ບ່າ ຄຽງ ໄຫຼ່ ກັບ ປະ ຊາ ຊົນລາວ ໃນການຕໍ່ ສູ້ ກູ້ ຊາດ ຕ້ານ ສັດ ຕູ ຜູ້ ມາ ຮຸກ ຮານ ໃນ ປາງ ສົງ ຄາມ ເພື່ອປົດປ່ອຍປະເທດຊາດ ແລະ ຖືໂອກາດນີ້ ຕາງ ໜ້າ ໃຫ້ພັກ, ລັດ ແລະ ປະ ຊາ ຊົນລາວ ຈະ ຈົດ ຈຳ ບຸນ ຄຸນ, ຄວາມ ງາມ ຄວາມ ດີ ຂອງ ບັນ ດາ ສະຫາຍ ແລະ ຈະສືບຕໍ່ສຶກສາອົບຮົມຊາວໜຸ່ມ, ເຍົາວະຊົນ ແລະ ປະຊາຊົນສອງຊາດ ລາວ-ຫວຽດນາມ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ສາຍພົວພັນອັນພິເສດທີ່ຫາຍາກ ລາວ-ຫວຽດນາມ, ໂດຍສະເພາະ ໃຫ້ເຫັນໄດ້ການເສຍສະຫຼະອັນໃຫຍ່ຫຼວງ ຂອງການນໍາປະຕິວັດລຸ່ນກ່ອນ ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍ ສາຍພົວພັນ ແລະ ຄວາມສາມັກຄີແບບພິເສດ ລະຫວ່າງ ສອງປະເທດ.
​​
ໃນໂອກາດດຽວກັນ, ສະຫາຍ ພົຈວ. ຮວິ່ງ ດັກ ເຮືອງ ກໍໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນຂອງ ສະຫາຍ ນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້. ພ້ອມນີ້ ໄດ້ລາຍງານໃຫ້ຊາບ ກ່ຽວກັບການມາເຄື່ອນໄຫວຢ້ຽມຢາມ ສປປ ລາວ ຂອງຄະນະໃນຄັ້ງນີ້ ເຊິ່ງນອກຈາກຢ້ຽມຢາມນະຄອນຫຼວງວຽງຈັນ ແລ້ວ ຍັງຈະໄດ້ໄປຢ້ຽມຢາມແຂວງຈຳນວນໜຶ່ງຢູ່ພາກເໜືອ, ພາກກາງ ແລະ ພາກໃຕ້. ນອກຈາກນີ້, ຍັງໄດ້ລາຍງານກ່ຽວກັບຜົນສຳເລັດອັນພົ້ນເດັ່ນ ໃນການປະຕິບັດພາລະບົດບາດຂອງຕົນ ເຂົ້າໃນການປະກອບສ່ວນການພັດທະນາເສດຖະກິດ-ສັງຄົມ ຂອງ ສສ ຫວຽດ ນາມ ແລະ ຈະສືບຕໍ່ຮ່ວມມືກັບພາກສ່ວນກ່ຽວຂ້ອງຂອງ ສປປ ລາວ ໃຫ້ແໜ້ນແຟ້ນ ເຂົ້າສູ່ລວງເລິກ ແລະ ມີປະສິດທິຜົນຫຼາຍຂຶ້ນ.​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ