ທ່ານນາຍົກລັດຖະມົນຕີ ສືບຕໍ່ເຂົ້າຮ່ວມກອງປະຊຸມສຸດຍອດອາຊຽນ-ອາເມລິກາ ສະໄໝພິເສດ ທີ່ ນະຄອນຫຼວງ ວໍຊິງຕັນ ດີຊີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 18 ພ.ພ 2022 15:00

​ ທ່ານນາຍົກລັດຖະມົນຕີ ພັນຄຳ ວິພາວັນ ພ້ອມດ້ວຍຄະນະຜູ້ແທນລາວ ແລະ ບັນດາຜູ້ນໍາອາຊຽນ ໄດ້ສືບຕໍ່ເຂົ້າຮ່ວມກອງປະຊຸມສຸດຍອດອາຊຽນ-ອາເມລິກາ ສະໄໝພິເສດ ໃນວັນທີ 13 ພຶດສະພາ 2022 ທີ່ ນະຄອນຫຼວງວໍຊິງຕັນ ດີຊີ, ສະຫະລັດອາເມລິກາ ໂດຍໄດ້ພົບປະປຶກສາຫາລືກັບທ່ານ ໂຈ ໄບເດັນ, ປະທານາທິບໍດີ ແລະ ທ່ານ ນາງ ຄາມາລາ ແຮຣິດສ໌, ຮອງປະທານາທິບໍດີ ແຫ່ງ ສະຫະລັດ ອາເມລິກາ ແລະ ບັນດາລັດຖະມົນຕີຂະແໜງການທີ່ກ່ຽວຂ້ອງຂອງອາເມລິກາ. ໃນການພົບປະກັບຮອງປະທານາທິບໍດີ ທ່ານ ນາງ ຄາມາລາ ແຮຣິດສ໌ ແລະ ບັນດາລັດຖະ ມົນຕີຂອງອາເມລິກາ, ທັງສອງຝ່າຍໄດ້ພ້ອມກັນທົບທວນຄືນການຮ່ວມມືອາຊຽນ-ອາເມລິກາ ໃນໄລຍະຜ່ານມາ ພ້ອມທັງ ແລກປ່ຽນທັດສະນະ ກ່ຽວກັບຂົງເຂດສາທາລະນະສຸກ, ການປ່ຽນແປງສະພາບດິນຟ້າອາກາດ, ການຫັນໄປສູ່ພະລັງງານສະອາດ ແລະ ການພັດທະນາພື້ນຖານໂຄງລ່າງແບບຍືນຍົງ.
         
ໃນຂົງເຂດສາທາລະນະສຸກ, ສອງຝ່າຍ ເຫັນດີຮັດແໜ້ນການຮ່ວມມື ເພື່ອຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ກໍຄື ພະຍາດລະບາດອື່ນໆ ທີ່ອາດເກີດຂຶ້ນໃໝ່ໃນອະນາຄົດ. ບັນດາຜູ້ນຳອາຊຽນ ສະແດງຄວາມຊົມເຊີຍ ຕໍ່ການຊ່ວຍເຫຼືອຂອງອາເມລິກາ ໃນການຮັບມືກັບການແຜ່ລະບາດຂອງພະຍາດໂຄວິດ-19 ໂດຍຜ່ານການປະກອບສ່ວນເຂົ້າໃນກອງທຶນອາຊຽນ ເພື່ອຕອບໂຕ້ພະຍາດໂຄວິດ-19 ແລະ ການຊ່ວຍເຫຼືອດ້ານທຶນ ຮອນ, ວັກຊີນ ແລະ ອຸປະກອນການແພດ ໃຫ້ແກ່ບັນດາປະເທດອາຊຽນ ໂດຍຜ່ານຂອບສອງຝ່າຍ ແລະ ຫຼາຍຝ່າຍ. ອາເມລິກາ ຢຶນຢັນຈະສືບຕໍ່ຊ່ວຍເຫຼືອອາຊຽນ ເພື່ອສ້າງຂີດຄວາມເຂັ້ມແຂງດ້ານສາທາລະນະສຸກ ເພື່ອຟື້ນຕົວທາງດ້ານເສດຖະກິດ ຈາກການແຜ່ລະບາດ ແລະ ສົ່ງເສີມຄວາມໝັ້ນຄົງດ້ານສຸຂະພາບ. ຖືໂອກາດນີ້ ທ່ານນາຍົກລັດຖະ ມົນຕີ ພັນຄຳ ວິພາວັນ ສະແດງຄວາມຂອບໃຈຕໍ່ລັດຖະບານ ອາເມລິກາ ທີ່ໄດ້ໃຫ້ການຊ່ວຍເຫຼືອທັງວັກຊີນ ແລະ ອຸ ປະກອນການແພດໃຫ້ແກ່ບັນດາປະເທດອາຊຽນ ລວມທັງ ສປປ ລາວ ພ້ອມທັງ ສະເໜີໃຫ້ອາຊຽນ ແລະ ອາເມລິກາ ເພີ່ມທະວີການຮ່ວມມື ໃນການຄົ້ນຄວ້າ, ຜະລິດວັກຊີນ ແລະ ຢາປິ່ນປົວພະຍາດໂຄວິດ-19 ເພື່ອຮັບປະກັນການສະໜອງວັກຊີນກັນໂຄວິດ-19 ຢູ່ພາກພື້ນອາຊຽນ ໃຫ້ທົ່ວເຖິງ, ພຽງພໍ ແລະ ສະເໝີພາບ. ນອກນັ້ນ, ກໍຊຸກຍູ້ໃຫ້ ອາເມລິກາ ສະໜັບສະໜູນແຜນວຽກຟື້ນຟູຮອບດ້ານອາຊຽນ ແລະ ສືບຕໍ່ເພີ່ມທະວີການຮ່ວມມືໃນການເຊື່ອມຈອດເສດຖະກິດພາກພື້ນ ໃຫ້ມີຄວາມຍືນຍົງ, ຮັບປະກັນຕ່ອງໂສ້ການຜະລິດໃຫ້ມີຄວາມໂລ່ງລ່ຽນ, ສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງ, ຊຸກຍູ້ການຫັນເປັນດິຈິຕອນ ແລະ ອໍານວຍຄວາມສະດວກທາງດ້ານການຄ້າ, ການລົງທຶນ ແລະ ການບໍລິການ ໃຫ້ມີປະສິດທິພາບ.
                                       
ໃນດ້ານການປ່ຽນແປງສະພາບດິນຟ້າອາກາດ, ອາຊຽນ ແລະ ອາເມລິກາ ຢໍ້າຄືນຄວາມໝາຍໝັ້ນ ຕໍ່ການປະ ຕິບັດພັນທະຂອງຕົນ ພາຍໃຕ້ສົນທິສັນຍາ ປາຣີ ວ່າດ້ວຍການປ່ຽນແປງດິນຟ້າອາກາດ. ອາເມລິກາ ຢືນຢັນຈະສະໜັບສະໜູນອາຊຽນ ເພື່ອສ້າງຄວາມເຂັ້ມໃນການຮັບມື ແລະ ປັບຕົວເຂົ້າກັບການປ່ຽນແປງຂອງດິນຟ້າອາກາດ ເປັນຕົ້ນແມ່ນບັນດາລະດັບນ້ຳທະເລເພີ່ມຂຶ້ນ, ໄພນໍ້າຖ້ວມ, ໄພແຫ້ງແລ້ງ ແລະ ໄພພິບັດອື່ນໆ. ກ່ຽວກັບການຫັນປ່ຽນໄປສູ່ພະລັງງານສະອາດ ແລະ ຄວາມເຂັ້ມແຂງດ້ານພະລັງງານ, ສອງຝ່າຍເຫັນດີຮ່ວມມື ເພື່ອສົ່ງເສີມການນຳໃຊ້ພະລັງງານທົດແທນ ໂດຍການມີສ່ວນຮ່ວມຂອງພາກລັດ-ພາກເອກະຊົນ, ການນຳໃຊ້ເຕັກໂນໂລຊີທັນສະໄໝ ແລະ ການສົ່ງ ເສີມຕາໜ່າງໄຟຟ້າອາຊຽນ. ສຳລັບການຮ່ວມມືດ້ານພື້ນຖານໂຄງລ່າງ, ສອງຝ່າຍເຫັນດີ ເພີ່ມທະວີການເຊື່ອມຈອດໃນທຸກດ້ານ ທາງທະເລ, ທາງບົກ ແລະ ທາງອາກາດ.
ບັນດາຜູ້ນຳອາຊຽນ ໄດ້ພົບປະກັບພະນະທ່ານ ໂຈ ໄບເດັນ, ປະທານາທິບໍດີ ແຫ່ງ ສະຫະລັດ ອາເມລິກາ ໂດຍໄດ້ແລກປ່ຽນທັດສະນະກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ. ໃນກອງປະຊຸມສຸດຍອດຄັ້ງນີ້, ຜູ້ນຳອາຊຽນ ແລະ ອາເມລິກາ ໄດ້ເຫັນດີໃນດ້ານຫຼັກການຍົກລະດັບການພົວພັນອາຊຽນ-ອາເມລິກາ ຂຶ້ນເປັນຄູ່ຮ່ວມຍຸດທະສາດຮອບດ້ານ, ຊຶ່ງຈະຮັບຮອງເອົາຢ່າງເປັນທາງການ ໃນໂອກາດກອງປະຊຸມສຸດຍອດອາຊຽນ-ອາເມລິກາ ຄັ້ງທີ 10 ທີ່ຈະຈັດຂຶ້ນໃນເດືອນ ພະຈິກ 2022. ໃນໂອກາດນີ້, ຜູ້ນຳອາຊຽນ ແລະ ອາເມລິກາ ໄດ້ຮັບຮອງເອົາຖະແຫຼງ ການວິໄສທັດຮ່ວມອາຊຽນ-ອາເມລິກາ ເພື່ອເປັນພື້ນຖານໃຫ້ແກ່ການຮ່ວມມືໃນຕໍ່ໜ້າ.​

ແຫຼ່ງ: ກະຊວງການຕ່າງປະເທດ
ຂ່າວອື່ນໆ