ທ່ານ ນາຍົກລັດຖະມົນຕີ ຊີ້ນຳວຽກງານ ຂະແໜງສາທາລະນະສຸກ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນອາທິດ, 31 ມ.ກ 2021 16:00

    ໃນຕອນບ່າຍຂອງວັນທີ 29 ມັງກອນ 2021 ທີ່ ສູນຝຶກອົບຮົມ ແລະ ການຮ່ວມມື ລາວ-ຍີ່ປຸນ (ICTC), ນະຄອນຫຼວງວຽງຈັນ,  ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ໂອ້ລົມ ແລະ ໃຫ້ທິດຊີ້ນຳ ຕໍ່ກອງປະຊຸມສະຫຼຸບວຽກງານສາທາລະນະສຸກ 5 ປີ ຄັ້ງທີ VIII (2016-2020) ແລະ ທິດທາງແຜນການ 5 ປີ ຄັ້ງທີ IX (2021-2025), ໂດຍມີທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ, ບັນດາທ່ານຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ຮອງເຈົ້າແຂວງ, ຜູ້ຕາງໜ້າພະແນກສາທາລະນະສຸກ ປະຈຳແຂວງ, ພ້ອມດ້ວຍ ອາດີດການນໍາ, ພະນັກງານບໍານານ, ວິລະຊົນແຫ່ງຊາດ, ຜູ້ຕາງໜ້າອົງການຈັດຕັ້ງສາກົນ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.


    ໂອກາດດັ່ງກ່າວ, ທ່ານ ຮສ.ດຣ. ບຸນກອງ ສີຫາວົງ ໄດ້ລາຍງານຫຍໍ້ ກ່ຽວກັບຜົນການດຳເນີນກອງປະຊຸມຄັ້ງນີ້ ໃຫ້ທ່ານນາຍົກລັດຖະມົນຕີ ໄດ້ຮັບຊາບວ່າ ກອງປະຊຸມໄດ້ດໍາເນີນໄປພາຍໄຕ້ຄໍາຂວັນ: “ຍົກສູງຄຸນນະພາບການບໍລິ ການສຸຂະພາບ” ແລະ ຜ່ານການສະຫຼຸບຕີລາຄາ, ປະກອບຄໍາເຫັນແລກປ່ຽນບົດຮຽນຂອງແຕ່ລະສາຍແຜນງານ ຕໍ່ການ ຈັດຕັ້ງປະຕິບັດວຽກງານຕ່າງໆ ແລະ ການຖອດຖອນບົດຮຽນໃນການຈັດຕັ້ງປະຕິບັດວຽກງານຕ່າງໆທີ່ພົ້ນເດັ່ນຂອງບັນ ດາແຂວງ, ກອງປະຊຸມໄດ້ເອກະພາບຮັບຮອງເອົາ ບົດສະຫຼຸບການຈັດຕັ້ງປະຕິບັດວຽກງານສາທາລະນະສຸກ 5 ປີ ຄັ້ງທີ VIII (2016-2020), ຍຸດທະສາດປະຕິຮູບສາທາລະນະສຸກ ໄລຍະທີ II (2016-2020) ແລະ ການຈັດຕັ້ງປະຕິບັດວຽກງານສາທາລະນະສຸກ ປີ 2020; ແຜນການປີ 2021, ແຜນການ 5 ປີ ຄັ້ງທີ IX (2021-2025) ແລະ  ແຜນຍຸດທະສາດປະຕິຮູບສາທາລະນະສຸກ ໄລຍະທີ III (2021-2025); ການສະຫຼຸບຕີລາຄາສະພາບ ແລະ ການຄວບຄຸມການລະບາດຂອງພະຍາດ ໂຄວິດ-19 ປີ 2020 ແລະ ແຜນດຳເນີນງານໃນຕໍ່ໜ້າ; ການປະຕິບັດບັນດາຕົວຊີ້ວັດຂອງຂະ    ແໜງສາທາລະນະສຸກ, ການຈັດຕັ້ງປະຕິບັດເພື່ອຕອບໂຕ້ການລະບາດຂອງພະຍາດໄຂ້ຍຸງລາຍ ແລະ ພະຍາດໂຄວິດ-19; ການຈັດຕັ້ງປະຕິບັດວຽກງານ 5 ດີ 1 ພໍໃຈ ຢູ່ບັັນດາແຂວງ; ການຈັດຕັ້ງປະຕິບັດວຽກງານພັດທະນາຊັບພະຍາກອນມະ ນຸດ; ການຈັດຕັ້ງປະຕິບັດວຽກງານປະກັນສຸຂະພາບ; ການຈັດຕັ້ງປະຕິບັດວຽກງານແຜນການ ໃນການຈັດສັນງົບປະ ມານໃຫ້ແຂວງ, ເມືອງ ແລະ ໂຮງໝໍນ້ອຍ; ການຄຸ້ມຄອງຂໍ້ມູນຂ່າວສານຜ່ານລະບົບ DHIS 2 ແລະ ການຈັດຕັ້ງປະຕິ ບັດ ເພື່ອຕອບໂຕ້ໄພພິບັດ ແລະ ໃຫ້ການຊ່ວຍເຫຼືອຜູ້ທີ່ປະສົບເຄາະຮ້າຍ. ພ້ອມດຽວກັນນັ້ນ, ກອງປະຊຸມ ໄດ້ເປັນເອກະພາບ ໃນການຜັນຂະຫຍາຍມະຕິກອງປະຊຸມໃຫ່ຍຄັ້ງທີ IX ຂອງອົງຄະນະພັກກະຊວງສາທາລະນະສຸກ, ມະຕິຂອງກົມການເມືອງສູນກາງພັກ ສະບັບເລກທີ 03/ກມສພ ວ່າດ້ວຍວຽກງານສາມສ້າງ ແລະ ມະຕິຂອງສະພາແຫ່ງຊາດ ສະບັບເລກທີ 103/ສພຊ ວ່າດ້ວຍການຮັບຮອງເອົາການຊີ້ແຈງຂອງລັດຖະບານ ກ່ຽວກັບການປັບປຸງຄຸນນະພາບການບໍລິການ ການປິ່ນປົວຢູ່ໂຮງໝໍ, ສຸກສາລາ ແລະ ມະຕິຂອງສະພາແຫ່ງຊາດ ສະບັບເລກທີ 099/ ສພຊ ວ່າດ້ວຍການຮັບຮອງເອົາ 11 ຕົວຊີວັດ ເຂົ້າໃນແຜນພັດທະນາສາທາລະນະສຸກ 5 ປີ ຄັ້ງທີ IX (2021-2025) ແລະ ແຜນປະຈໍາປີ 2021 ໃຫ້ເປັນຮູບປະທຳ.


    ໃນຕອນທ້າຍ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນຳ ຕໍ່ກອງປະຊຸມ, ໃນນັ້ນ ທ່ານເອກະພາບຕໍ່ການຕີລາຄາຂອງກອງປະຊຸມ, ໄດ້ຍົກໃຫ້ເຫັນ ພາລະບົດບາດ, ຄວາມສຳຄັນ ແລະ ຄວາມຮັບຜິດຊອບ ຂອງອາຊີບພະນັກງານ-ແພດໝໍ ຫຼື ນັກຮົບເສື້ອຂາວ ຕໍ່ສັງຄົມ ກໍ່ຄືປະເທດຊາດ, ພ້ອມທັງ ສະແດງຄວາມຊົມເຊີຍ ຕໍ່ຜົນສຳເລັດ ທີ່ຂະແໜງສາທາລະນະສຸກ ຍາດມາໄດ້ ໃນໄລຍະຜ່ານມາ ເວົ້າລວມ, ເວົ້າສະເພາະ ແມ່ນຜົນງານ, ຄວາມຮັບຜິດຊອບ, ຄວາມເສຍສະຫຼະ, ຈັນຍາບັນ, ຈັນຍາທຳ ໃນການບໍລິການຮັບໃຊ້ສັງຄົມ ຂອງພະນັກງານ ທົ່ວຂະແໜງສາທາລະນະສຸກ. ອັນສຳຄັນ ສຳລັບທິດທາງໃນຕໍ່ໜ້າ, ທ່ານນາຍົກລັດຖະມົນຕີ ໄດ້ເນັ້ນໜັກໃຫ້ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ສືບຕໍ່ສຶກສາຄົ້ນຄວ້າ, ຝຶກຝົນຫຼໍ່ຫຼອມ ແລະ ຮໍ່າຮຽນເອົາແບບຢ່າງ ມູນເຊື້ອຂອງແພດປະຕິວັດ ໂດຍສະເພາະ ຄຸນສົມບັດສິນທຳປະຕິວັດ, ຄວາມເສຍສະຫຼະ, ການຝຶກຝົນຕົນເອງ, ຈັນຍາບັນ, ຈັນຍາທໍາ ແລະ ອືີ່ນໆ; ສືບຕໍ່ເອົາໃຈໃສ່ ຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດຕົວຊີ້ວັດ SDG ຂອງຂະແໜງສາທາລະນະສຸກ ເພື່ອສ້າງເງື່ອນໄຂເອື້ອອຳນວຍ ແລະ ປະກອບສ່ວນ ນຳເອົາປະເທດຊາດ ຫຼຸດພົ້ນອອກຈາກສະຖານະພາບດ້ອຍພັດທະນາ ໃນຊຸມປີຕໍ່ໜ້າ; ນໍາເອົາມະຕິກອງປະຊຸມໃຫຍ່ ຄັັ້ງທີ XI ຂອງພັກ, ໂດຍສະເພາະ ເນື້ອໃນທີ່ໄດ້ລະບຸໄວ້ໃນມະຕິດັ່ງກ່າວ “ສືບຕໍ່ຢຶດໝັ້ນ ການປະຕິບັດນະໂຍບາຍ ສາທາລະນະສຸກທົ່ວປວງຊົນ ຕາມທິດ ຖືເອົາການອະນາໄມກັນພະຍາດ ແລະ ສົົ່ງເສີມສຸຂະພາບເປັນຕົ້ນຕໍ, ຖືເອົາການບໍລິການປິ່ນປົວ ແລະ ສະໜອງການບໍລິການສຸຂະພາບຢ່າງທົ່ວເຖິງ, ມີຄຸນນະພາບ, ຍຸຕິທໍາ ແລະ ສະເໝີພາບ ເປັນສິ່ງສໍາຄັນ” ໄປຈັດຕັ້ງຜັນຂະຫຍາຍ ເປັນແຜນການ, ແຜນງານ ແລະ ໂຄງການລະອຽດ ທີ່ສາມາດປະຕິບັດໄດ້ ໃນຕະຫຼອດໄລຍະ 5 ປີຕໍ່ໜ້າ; ຮີບຮ້ອນຖອດຖອນບົດຮຽນອັນລໍ້າຄ່າ ຈາກການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ເພື່ອເປັນຂໍ້ມູນ ແລະ ບົດຮຽນພື້ນຖານໄວ້ໃຫ້ແກ່ການປ້ອງກັນ ແລະ ແກ້ໄຂ ການແຜ່ລະບາດ ຂອງເຊື້ອພະຍາດຕ່າງໆ ທີ່ອາດເກີດຂຶ້ນໃໝ່ ໃນອະນາຄົດ; ກະກຽມຕົນເອງຮອບ ດ້ານ ເພື່ອພັດທະນາປັບປຸງລະບົບບໍລິການໃຫ້ດີ, ໃຫ້ມີອັນໃໝ່, ອັນປ່ຽນແປງໃໝ່ ໃນເງື່ອນໄຂໃໝ່ ຂອງການດໍາລົງຊີວິດປົກກະຕິແບບໃໝ່; ດຶງດູດທົ່ວສັງຄົມ ເຂົ້າຮ່ວມໃນການພັດທະນາວຽກງານ ຂະແໜງສາທາລະນະສຸກ ໃຫ້ກວ້າງ ຂວາງ ໄປຄຽງຄູ່ກັບດຶງດູດເອົາການຮ່ວມມື ແລະ ການຊ່ວຍເຫຼືອ ຈາກພາກພາກສ່ວນຕ່າງໆ ທັງພາຍໃນ ແລະ ຕ່າງປະເທດ ໃຫ້ນັບມື້ຫຼາຍຂຶ້ນ, ໂດຍສະເພາະ ບົດຮຽນທີ່ກ້າວໜ້າ, ເຕັກໂນໂລຊີການແພດ ທີ່ທັນສະໄໝ ແລະ ອື່ນໆ; ນຳໃຊ້ທ່າແຮງບົ່ມຊ້ອນທີ່ປະເທດເຮົາມີ ໃຫ້ເກີດປະສິດທິພາບ ແລະ ປະສິດທິຜົນສູງ, ພ້ອມທັງ ຄຸ້ມຄອງ ແລະ ນໍາໃຊ້ໂຄງລ່າງພື້ນຖານສາທາລະນະສຸກ, ຄວາມຮູ້ຄວາມສາມາດ, ບຸກຄະລະກອນ ແລະ ອື່ນໆ ເຂົ້າໃນການບໍລິການຮັບໃຊ້ສັງຄົມ ໃຫ້ດີ ເພື່ອດຶງດູດສັງຄົມ ໃຊ້ບໍລິການດ້ານສາທາລະນະສຸກ ຢູ່ພາຍໃນປະເທດ ໃຫ້ຫຼາຍຂຶ້ນ.

    


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ