ທ່ານ ນາຍົກລັດຖະມົນຕີ ຊີ້ນຳວຽກງານ ແຮງງານ ແລະ ສະຫວັດດີການສັງຄົມ ໃນຕໍ່ໜ້າ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນສຸກ, 29 ມ.ກ 2021 16:00

     ໃນຕອນບ່າຍຂອງວັນທີ 28 ມັງກອນ 2021 ທີ່ເຮືອນຮັບແຂກ ກະຊວງແຮງງານ ແລະ ສະຫວັດດີການສັງຄົມ,  ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ, ໂອ້ລົມ ແລະ ໃຫ້ທິດຊີ້ນຳ ຕໍ່ກອງປະຊຸມປະຈໍາປີ 2020 ຂອງຂະແໜງແຮງງານ ແລະ ສະຫວັດດີການສັງຄົມ, ໂດຍມີທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ບັນດາຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ຮອງເຈົ້າແຂວງ, ຄະນະພະແນກແຮງງານ ແລະ ສະຫວັດດີການສັງຄົມ ປະຈຳແຂວງ ພ້ອມດ້ວຍ ພະນັກງານທີ່ກ່ຽວຂ້ອງເຂົ້າຮ່ວມ.

     ໂອກາດດັ່ງກ່າວ, ທ່ານ ຄໍາແພງ ໄຊສົມແພງ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານໃຫ້ຊາບ ກ່ຽວກັບຜົນຂອງກອງປະຊຸມ ປະຈໍາປີ 2020 ຊຶ່ງໄດ້ສະຫຼຸບຕີລາຄາ ການຈັດຕັ້ງປະຕິບັດ ແຜນພັດທະນາວຽກງານແຮງງານ ແລະ ສະຫວັດດີການສັງຄົມ 5 ປີ ຄັ້ງທີ IV ແລະ ຜ່ານແຜນການ 5 ປີ ຄັ້ງທີ V ທີ່ໄດ້ເຊື່ອມສານເຂົ້າກັບ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ພ້ອມດຽວກັນນັ້ນ ກໍ່ໄດ້ສະຫຼຸບຕີລາຄາ ການຈັດຕັ້ງປະຕິບັດວຽກງານແຮງງານ ແລະ ສະຫວັດດີການສັງຄົມ ປະຈຳປີ 2020 ຊຶ່ງເຫັນໄດ້ຜົນສໍາເລັດຫຼາຍດ້ານ ເປັນຕົ້ນ ໄດ້ປະຕິບັດ ບັນດາຄາດໝາຍມະຫາພາກດ້ານແຮງງານ, ປະກັນສັງຄົມ ແລະ ລະເບີດບໍ່ທັນແຕກ ທີ່ສະພາແຫ່ງຊາດແຫ່ງຊາດ ໄດ້ຮັບຮອງໃນແຕ່ລະປີ, ລວມທັງ ການພັດທະນາສີມືແຮງງານ ເພື່ອສະໜອງໃຫ້ແກ່ຕະຫຼາດແຮງານ ແລະ ຂະແໜງການເສດຖະກິດ, ການສ້າງວຽກເຮັດງານທຳ ຢູ່ພາຍໃນ ແລະ ຢູ່ຕ່າງປະເທດ; ການຄຸ້ມຄອງແຮງງານຕ່າງປະເທດ ທີ່ເຂົ້າມາເຮັດວຽກຢູ່ ສປປ ລາວ ໃຫ້ຖືກຕ້ອງຕາມກົດໝາຍ ແລະ ປະຕິບັດພັນທະຕໍ່ລັດ; ການປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ແລະ ຜູ້ໃຊ້ແຮງງານ; ໄດ້ສ້າງ ແລະ ປັບປຸງບັນດານິຕິກໍາ ທີ່ສຳຄັນ ແລະ ຈຳເປັນ ຈຳນວນໜຶ່ງສຳເລັດ, ຊຶ່ງເປັນການປົກປ້ອງສິດ ແລະ ຜົນປະໂຫຍດ ຂອງຜູ້ອອກແຮງງານ ແລະ ອອກແຮງານຕ່າງປະເທດ ຕາມກົດໝາຍຫຼາຍຂຶ້ນ; ໄດ້ຂະຫຍາຍອັດຕາປົກຄຸມປະກັນສັງຄົມ ແລະ ປັບປຸງການບໍລິການອຸດໜູນປະກັນສັງຄົມ ໃຫ້ຄ່ອງຕົວ; ໄດ້ແກ້ໄຂ ແລະ ປະຕິບັດນະໂຍບາຍ ສະແດງຄວາມກະຕັນຍູຮູ້ບຸນຄຸນ ຕໍ່ຜູ້ມີຜົນງານ ແລະ ຄຸນງາມຄວາມດີ ຕໍ່ປະເທດຊາດ ໄດ້ຫຼາຍກວ່າເກົ່າ; ປະຊາຊົນຜູ້ດ້ອຍໂອກາດ, ຜູ້ທຸກຍາກ ແລະ ຜູ້ປະສົບໄພພິບັດຕ່າງໆ ໄດ້ຮັບການຊ່ວຍເຫຼືອຕາມເງື່ອນໄຂຕົວຈິງ ໂດຍສະເພາະ ການແກ້ໄຂຜົນກະທົບ ຈາກການແຜ່ລະບາດຂອງພະຍາດໂຄວິດ-19 ຕໍ່ກຸ່ມແຮງງານລາວ, ການແກ້ໄຂລະເບີດບໍ່ທັນແຕກທີ່ຕົກຄ້າງ, ການສະໜອງເລືອດທີ່ປອດໄພໃຫ້ແກ່ສັງຄົມ ແລະ ອື່ນໆ ຢ່າງມີປະສິດທິຜົນດີຫຼາຍຂຶ້ນ. ໃນຂະນະດຽວກັນ ກໍ່ເຫັນໄດ້ຂໍ້ຄົງຄ້າງຈຳນວນໜຶ່ງ ທີ່ຍັງຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ ເປັນຕົ້ນ ຂໍ້ມູນຂ່າວສານຕະຫຼາດແຮງງານບໍ່ທັນຊັດເຈນ; ການພັດທະນາສີມືແຮງງານ ບໍ່ທັນສະໜອງໄດ້ ຕາມຄວາມຕ້ອງການຂອງຕະຫຼາດແຮງງານໃນໄລຍະໃໝ່; ການປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ຍັງມີຊ່ອງຫວ່າງ; ການຂະຫຍາຍອັດຕາເຂົ້າເຖິງປະກັນສັງຄົມ ບໍ່ທັນບັນລຸຕາມຄາດໝາຍ; ການຄຸ້ມຄອງວຽກສັງຄົມສົງເຄາະ ແລະ ໄພພິບັດບໍ່ທັນເຂັ້ມ ແຂງ; ການຊ່ວຍເຫຼືອຜູ້ປະສົບໄພພິບັດ ແລະ ຜູ້ດ້ອຍໂອກາດ ຍັງຊັກຊ້າ; ການບໍລິຫານ ວຽກເກັບກູ້ລະເບີດບໍ່ທັນແຕກ ບໍ່ທັນຄ່ອງຕົວ; ການຮັບບໍລິຈາກ ແລະ ແຈກຈ່າຍເລືອດຮັບໃຊ້ສັງຄົມ ບໍ່ທັນມີຄວາມຮັບປະກັນສູງ; ການຜັນຂະຫຍາຍນະໂຍບາຍ ຂອງສູນກາງ ແລະ ທ້ອງຖິ່ນ ບໍ່ທັນກົມກຽວກັນ ແລະ ອື່ນໆ.


     ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ທົ່ວຂະແໜງແຮງງານ ແລະ ສະຫວັດດີການສັງຄົມ ສາມາດຍາດມາໄດ້ ໃນໄລຍະຜ່ານມາ, ພ້ອມທັງ ເຫັນດີເປັນເອກະພາບ ຕໍ່ການສະຫຼຸບຕີລາຄາ ຂອງກອງປະຊຸມຄັ້ງນີ້. ສະນັ້ນ, ເພື່ອເຮັດໃຫ້ການພັດທະນາ ວຽກງານແຮງງານ ແລະ ສະຫວັດດີການສັງຄົມ ໄດ້ດໍາເນີນໄປມີຜົນສໍາເລັດຢ່າງມີປະສິດທິພາບ ແລະ ປະສິດທິຜົນເພີ່ມຂຶ້ນ, ທ່ານ ນາຍົກລັດຖະມົນຕີ ໄດ້ເນັ້ນໜັກຕໍ່ກອງປະຊຸມ ໃຫ້ບັນດາຄະນະນໍາ, ພະນັກງານຫຼັກແຫຼ່ງ, ພະນັກງານ-ລັດຖະກອນ ຂອງຂະແໜງແຮງງານ ແລະ ສະຫວັດດີການສັງຄົມ, ຂະແໜງການ ແລະ ທ້ອງຖິ່ນ ເອົາໃຈໃສ່ຕື່ມບາງບັນຫາ ເປັນຕົ້ນ ວຽກງານແຮງງານ: ໃຫ້ສືບຕໍ່ຈັດສັນແຮງງານຄືນໃໝ່ ໂດຍການກໍານົດຍຸດທະສາດ ແລະ ວາງມາດຕະການທີ່ຖືກຕ້ອງ ແລະ ສອດຄ່ອງກັບ ສະພາບຄວາມຕ້ອງການ ຕົວຈິງຂອງການພັດທະນາ ເພື່ອຫຼຸດຜ່ອນການວ່າງງານ, ໂດຍເນັ້ນໃສ່ການພັດທະນາສີມືແຮງງານ ໃຫ້ມີຄຸນນະພາບ ເພື່ອຕອບສະໜອງກັບຄວາມຕ້ອງການຂອງຕະຫຼາດແຮງງານ ທັງພາຍໃນ ແລະ ຕ່າງປະເທດໃນຍຸກສະໄໝ ອຸດສາຫະກຳ 4.0 ແລະ ນະວັດຕະກໍາໃໝ່ແຫ່ງການພັດທະນາ, ແຮງງານລາວ ຕ້ອງເພີ່ມຄວາມເຂັ້ມຂອງງານ, ມີລະບຽບວິໃນ ແລະ ມີສະຫວັດດີການສັງຄົມທີ່ເໝາະສົມ; ຕ້ອງປະຕິບັດຍຸດທະສາດ ການພັດທະນາ ສີມືແຮງງານຢູ່ທ້ອງຖິ່ນໃຫ້ດີ ແລະ ຕ້ອງສົ່ງເສີມການສ້າງວຽກເຮັດງານທໍາຢູ່ຊົນນະບົດ ໃຫ້ແທດກັບເງື່ອນໄຂຕົວຈິງ; ໃຫ້ເອົາໃຈໃສ່ວຽກງານການຮ່ວມມື, ການປະສານງານ ກັບບັນດາຂະແໜງທີ່ກ່ຽວຂ້ອງຢູ່ພາຍໃນ ແລະ ການຮ່ວມມືກັບສາກົນ ເພື່ອຍາດແຍ່ງການຊ່ວຍເຫຼືອ ເພື່ອພັດທະນາວຽກງານແຮງງານ ແລະ ສະຫວັດດີການສັງຄົມ. ນອກນັ້ນ ກໍ່ໃຫ້ຜູ້ປະກອບການມີສ່ວນຮ່ວມໃນການຝຶກໃຫ້ແຮງງານມີຄຸນນະພາບຫຼາຍຂຶ້ນ; ວຽກງານສະຫວັດດີການສັງຄົມ: ໃຫ້ສືບຕໍ່ເອົາໃຈໃສ່ປະຕິບັດນະໂຍບາຍ ຕໍ່ຜູ້ທີ່ມີຜົນງານຄຸນງາມຄວາມດີຕໍ່ປະເທດຊາດ ແລະ ຜູ້ທີ່ເສຍອົງຄະໃນປາງສົງຄາມ, ເອົາໃຈໃສ່ຂະຫຍາຍວຽກງານປະກັນສັງຄົມ ໃຫ້ກວ້າງຂວາງ ນອກນັ້ນ, ໃຫ້ວາງແຜນເພື່ອຮັບມືກັບໄພພິບັດຕ່າງໆທີ່ອາດຈະເກີດຂຶ້ນຢ່າງຮອບຄອບ; ວຽກງານເກັບກູ້ລະເບີດບໍ່ທັນແຕກ: ໃຫ້ສືບຕໍ່ເອົາໃຈໃສ່ເພີ່ມທະວີການຄຸ້ມຄອງ ແລະ ຈັດຕັ້ງປະຕິບັດວຽກງານເກັບກູ້ລະ ເບີດບໍ່ທັນແຕກໃຫ້ດີ ນອກນັ້ນ ໃຫ້ເອົາໃຈໃສ່ໃນການຍາດແຍ່ງ ການຊ່ວຍເຫຼືອຈາກຕ່າງປະເທດໃຫ້ຫຼາຍຂຶ້ນ ເພື່ອເຮັດໃຫ້ວຽກງານດັ່ງກ່າວ ສຳເລັດຕາມທິດທາງແຜນການທີ່ີວາງໄວ້ ແລະ ບໍ່ໃຫ້ທໍ້ຖອຍເດັດຂາດ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ