ທ່ານ ຮອງນາຍົກ ເຂົ້າຮ່ວມພິທີມອບ-ຮັບໂຄງການກໍ່ສ້າງອະນຸສາວະລີ ພຣະເຈົ້າໄຊຍະເຊດຖາທິຣາດ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 26 ມ.ກ 2021 16:00

​ພິທີສະເຫຼີມສະຫຼອງ ແລະ ມອບ-ຮັບໂຄງການກໍ່ສ້າງອະນຸສາວະລີ ພຣະເຈົ້າໄຊຍະເຊດຖາທິຣາດ ມະຫາຣາດ ໄດ້ຈັດຂຶ້ນຢ່າງເປັນທາງການ ໃນວັນທີ 24 ມັງກອນ 2021 ທີ່ແຂວງອັດຕະປື, ພາຍຫຼັງການກໍ່ສ້າງສຳເລັດ ໂດຍໃຊ້ເວລາ 30 ເດືອນ.

ໃຫ້ກຽດເຂົ້າຮ່ວມພິທີ ມີທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະຊີ້ນຳລະດັບຊາດ ໂຄງການກໍ່ສ້າງອະນຸສາວະລີ ພຣະເຈົ້າໄຊຍະເຊດຖາທິຣາດ ມະຫາຣາດ; ທ່ານ ຈູມມະລີ ໄຊຍະສອນ, ອາດີດປະທານປະເທດ; ທ່ານ ເລັດ ໄຊຍະພອນ, ເຈົ້າແຂວງອັດຕະປື; ພ້ອມດ້ວຍບັນດາການນໍາພັກ-ລັດ, ຄອບຄົວການນຳ ແລະ ພາກສ່ວນຕ່າງໆທີ່ກ່ຽວຂ້ອງ.​
ໂອກາດນີ້, ທ່ານ ພົງໄຊໄຊຊະນະ ໄຊຍະເສນ, ຜູ້ອຳນວຍການໃຫຍ່ບໍລິສັດວັງຕັດ ຂຸດຄົ້ນບໍ່ແຮ່ ໃນນາມບໍລິສັດຮັບເໝົາກໍ່ສ້າງ ກ່າວວ່າ: ອະນຸສາວະລີ ພຣະເຈົ້າໄຊຍະເຊດຖາທິຣາດ ມະຫາຣາດ ຕັ້ງຢູ່ບ້ານຫາດຊາຍຂາວ, ເມືອງໄຊເສດຖາ, ແຂວງອັດຕະປື ມີມູນຄ່າການກໍ່ສ້າງທັງໝົດ 37 ຕື້ກີບ, ເປັນໂຄງການກໍ່ສ້າງສາທາລະນະ ດ້ວຍຮູບການລະດົມທຶນທົ່ວມວນຊົນ ພາຍໃຕ້ການມີສ່ວນຮ່ວມຂອງທຸກພາກສ່ວນ ທັງພາກລັດ, ເອກະຊົນ, ພຸດທະບໍລິສັດ ແລະ ປວງຊົນລາວ ທັງຢູ່ພາຍໃນ ແລະ ຕ່າງປະເທດ.
ໂຄງການດັ່ງກ່າວ ປະກອບມີ 2 ໜ້າວຽກໃຫຍ່ ຄື: ຫຼໍ່ຮູບປັ້ນພຣະເຈົ້າໄຊຍະເຊດຖາທິຣາດ ມະຫາຣາດ ຊົງປະທັບຊ້າງເຜືອກມຸງຄຸນປະທານພອນ ຊຶ່ງຫຼໍ່ດ້ວຍທອງເຫຼືອງ ໜັກ 18 ໂຕນ ແລະ ວຽກກໍ່ສ້າງສະຖາປານິກ-ງານປະຕິມະກໍາລວດລາຍຕ່າງໆ ເປັນຕົ້ນ ຮູບຄວັດແກະສະຫຼັກລວດລາຍວິຈິດສິນ, ຮູບພາບປະຕິມະກໍາ, ອາຄານຫໍມູນເຊື້ອ, ແທ່ນກົມມະລຽນ, ເດີ່ນເບຕົງພິມລາຍ, ສວນດອກໄມ້ ແລະ ອື່ນໆ.

ບັນດາຮູບຄວັດແກະສະຫຼັກລວດລາຍວິຈິດສິນ ແລະ ຮູບພາບປະຕິມະກໍາ ທີ່ຢູ່ອະນຸສາວະລີແຫ່ງນີ້ ລ້ວນແລ້ວແຕ່ໄດ້ຮັບການກັ່ນຕອງເລືອກເຟັ້ນ, ມີເລື່ອງລາວບອກເລົ່າທາງດ້ານປະຫວັດສາດ ທີ່ກ່ຽວພັນກັບ ພຣະເຈົ້າໄຊຍະເຊດຖາທິຣາດ, ພຸດທະສາສະໜາ ແລະ ສີລະປະວັດທະນະທຳ ອັນເປັນເອກະລັກຂອງຊາດລາວເຮົາ ເພື່ອໃຫ້ລູກຫຼານ, ນັກຮຽນຮູ້ປັນຍາຊົນ ໄດ້ຄົ້ນຄວ້າສຶກສາຮ່ຳຮຽນ ແລະ ອະນຸລັກສືບຕໍ່ ໃຫ້ມີຄວາມຍືນຍົງຕະຫຼອດໄປ. ອະນຸສາວະລີແຫ່ງນີ້ ຍັງຈະເປັນສວນສາທາລະນະ ເພື່ອໃຫ້ປະຊາຊົນຊາວແຂວງອັດຕະປື ໄດ້ນຳໃຊ້ອອກກຳລັງກາຍ-ຜ່ອນຄາຍ, ຈັດກິດຈະກຳຕ່າງໆ ແລະ ກາຍເປັນໜຶ່ງໃນຈຸດໝາຍປາຍທາງ ແຫ່ງການທ່ອງທ່ຽວຂອງແຂວງອັດຕະປື. ອັນສຳຄັນ ຍັງເປັນການຈາລຶກຄຸນງາມຄວາມດີ, ເຊີດຊູກຽດສັກສີ ຂອງວິລະມະຫາກະສັດອານາຈັກລາວລ້ານຊ້າງ, ຜູ້ຊົງສະຫຼຽວສະຫຼາດ, ອົງອາດກ້າຫານ ບໍ່ຍອມຈໍານົນ, ຊົງມີຄວາມປີຊາສາມາດ ໃນພິໄຊສົງຄາມ, ຊົງເປັນພຸດທະສາສະນິກກະຊົນອັນລໍ້າເລີດ, ເປັນພຣະມະຫາກະສັດຜູ້ຊົງທໍາ, ເບິ່ງກວ້າງມອງໄກ, ເປັນແບບຢ່າງອັນດີງາມ ໃນການປົກປັກຮັກສາ ແລະ ສ້າງສາພັດທະນາບ້ານເມືອງ, ສີລະປະວັດທະນະທໍາ, ຮີດຄອງປະເພນີອັນດີງາມຂອງຊາດລາວ ສະເໝືອນດັ່ງແວ່ນແຍງອັນໃສແຈ້ງ ແກ່ອານາປະຊາລາດ ຕັ້ງແຕ່ບັນພະການສືບທອດມາຈົນເຖິງລູກຫຼານ ເທົ້າທຸກວັນນີ້.
ໂອກາດດຽວກັນ, ທ່ານ ເລັດ ໄຊຍະພອນ ໃນນາມຕາງໜ້າອຳນາດການປົກຄອງແຂວງ ແລະ ປະຊາຊົນບັນດາເຜົ່າຊາວແຂວງອັດຕະປື ຂຶ້ນກ່າວຮັບໂຄງການ ໂດຍໃຫ້ຄຳໝັ້ນສັນຍາວ່າ: ຈະພ້ອມກັນເອົາໃຈໃສ່ປົກປັກຮັກສາອະນຸສາວະລີ ພຣະເຈົ້າໄຊຍະເຊດຖາທິຣາດ ແຫ່ງນີ້ ໃຫ້ມີຄວາມຍືນຍົງ, ພ້ອມທັງ ໂຄສະນາເຜີຍແຜ່ຄວາມຮູ້ ໃຫ້ຄົນຮຸ່ນຫຼັງ ໄດ້ສຶກສາຮ່ຳຮຽນສືບຕໍ່ໄປຈົນຊົ່ວກາລະນານ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ