ທ່ານ ນາຍົກລັດຖະມົນຕີ ໃຫ້ກຽດເຂົ້າຮ່ວມພິທີເປີດງານຜະລິດຕະພັນລາວ 2020

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 30 ທ.ວ 2020 19:00

​ໃນຕອນແລງ ວັນທີ 30 ທັນວາ 2020 ທີ່ ສູນການຄ້າລາວ-ໄອເຕັກ,  ສະພາການຄ້າ ແລະ ອຸດສາຫະກຳ ແຫ່ງຊາດ (ສຄອຊ)  ຮ່ວມກັບ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ (ສຄອ ນວ),  ສະພາການຄ້າ ແລະ ອຸດສາຫະກຳ ບັນດາແຂວງ ແລະ ຄູ່ຮ່ວມ (ບໍລິສັດ ເບຍລາວ ແລະ ປີ້ໂຕຣລຽມເທຣດດີງລາວ ມະຫາຊົນ) ໄດ້ຈັດພິທີເປີດງານ ຜະລິດຕະພັນລາວ 2020 (Made In Laos 2020),  ໂດຍການໃຫ້ກຽດເຂົ້າຮ່ວມ ຂອງທ່ານ  ທອງລຸນ ສິສຸລິດ, ນາຍົກລັດຖະມົນຕີ; ມີບັນດາທ່ານລັດຖະມົນຕີ, ຮອງລັດຖະມົນຕີ ກະຊວງ-ອົງການ ທີ່ກ່ຽວຂ້ອງ, ພ້ອມດ້ວຍ ຜູ້ຕາງໜ້າບັນດາອົງການຈັດຕັ້ງສາກົນ ປະຈຳລາວ, ກຸ່ມ-ສະມາຄົມ ແລະ ຫົວໜ່ວຍທຸລະກິດ ແລະ ສື່ີມວນຊົນ ເຂົ້າຮ່ວມ.


ທ່ານ ນາງ ຈັນທະຈອນ ວົງໄຊ, ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດ ໄດ້ກ່າວໃຫ້ຮູ້ວ່າ ຈຸດປະສົງຕົ້ນຕໍ ຂອງການຈັດງານຄັ້ງນີ້ ເພື່ອເປັນການໂຄສະນາສົ່ງເສີມຜະລິດຕະພັນລາວ ແລະ ກະຕຸກຊຸກຍູ້ຜູ້ປະກອບການ ໃຫ້ມີລາຍຮັບ, ສ້າງເງື່ອນໄຂ ໃຫ້ສັງຄົມ ໄດ້ຮັບຜູ້ຜະລິດຕະພັນ ແລະ ບັນດາທຸລະກິດ ຫຼາຍຂຶ້ນ; ເພື່ອໂຄສະນາສົ່ງເສີມ ລາວທ່ຽວລາວ  ແນໃສ່ຊ່ວຍຟື້ນຟູເສດຖະກິດ ທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19; ເພື່ອເປັນການສະເຫຼີມສະຫຼອງ ວັນຊາດທີ 2 ທັນວາ ຄົບຮອບ 45 ປີ, ສະແດງຄວາມຮູ້ບຸນຄຸນ ແລະ ລະນຶກເຖິງຄຸນງາມຄວາມດີ ຂອງປະທານ ໄກສອນ ພົມວິຫານ ໃນໂອກາດຄົບຮອບວັນຄ້າຍວັນເກີດຂອງເພິ່ນ ຄົບຮອບ 100 ປີ ແລະ ອື່ນໆ. ງານວາງສະແດງໃນຄັ້ງນີ້ ແມ່ນໄດ້ລະດົມຂົນຂວາຍຜູ້ປະກອບການ, ຜູ້ຜະລິດສິນຄ້າໃນທຸກຂະແໜງການໃນທົ່ວປະເທດ ນຳເອົາຜະລິດຕະພັນ ແລະ ຜົນງານຂອງຕົນ ມາວາງສະແດງ ເພື່ອໃຫ້ບັນດາຜູ້ເຂົ້າຊົມງານ ໄດ້ຮັບຮູ້ເຖິງການເຕີບໃຫຍ່ຂະຫຍາຍຕົວທາງດ້ານເສດຖະກິດ-ສັງຄົມ ຂອງປະເທດເຮົາ ກໍ່ຄືທ້ອງຖິ່ນຂອງຕົນ. ງານວາງສະແດງດັ່ງກາວ ມີ 121 ບໍລິສັດ ເຂົ້າຮ່ວມ, ມີ  220 ຫ້ອງວາງສະແດງ, ຊຶ່ງເພີ່ມຂື້ນຈາກປີຜ່ານມາ ຫຼາຍສົມຄວນ (ປີຜ່ານມາມີ 171 ຫ້ອງວາງສະແດງ ແລະ 117 ບໍລິສັດ). ລວມມູນຄ່າຜະລິດຕະພັນທັງໝົດ ທີ່ເຂົ້າຮ່ວມມາວາງສະແດງຄັ້ງນີ້ ແມ່ນຫຼາຍກ່ວາ 13 ຕືື້ກີບ. 
ຜະລິດຕະພັນຕົ້ນຕໍທີ່ນໍາມາວາງສະແດງໃນຄັ້ງນີ້ ປະກອບມີ ຫັດຖະກຳແຜ່ນແພ, ເຄື່ອງປະດັບ, ໄມ້ແກະສະຫຼັກ, ເຟີນີເຈີ, ຜົນຜະລິດກະສິກຳ-ອຸດສາຫະກຳ, ເຄື່ອງດື່ມ ແລະ ອາຫານ, ຮູບພາບ ສິນລະປະວັດທະນາທຳ, ທະນາຄານ, ອະສັງຫາລິມະຊັບ, ການບໍລິການ ແລະ ອື່ນໆ. ຄຽງຄູ່ກັບການຈັດງານວາງສະແດງຄັ້ງນີ້, ຍັງມີການສະແດງສິນລະປະ, ກິດຈະກຳແຈກແຖມຂອງຂວັນຕ່າງໆ. ນອກນີ້ ຍັງມີກິດຈະກຳສຳມະນາ ໃນຫົວຂໍ້ຕ່າງໆ ເພື່ອໃຫ້ຄວາມຮູ້ ແລະແລກປ່ຽນຄໍາຄິດຄໍາເຫັນຮ່ວມກັນ ເປັນຕົ້ນ ການນໍາສະເໜີແຜນຍຸດທະສາດ ຂອງສະພາການຄ້າ ແລະ ອຸດສາຫະກຳ ແຫ່ງຊາດ, ການເຂົ້າຫາແຫຼ່ງທຶນ, ຕະຫຼາດ ແລະ E-Commerce; ການສຳມະນາ ສຳລັບຄົນຮຸ້ນໃໝ່ ທີ່ສົນໃຈເຮັດທຸລະກິດ; ການສຳມະນາ ກ່ຽວກັບທັກສະອາຊີບ ທີ່ຕ້ອງການຈາກຜູ້ໃຊ້ແຮງງານ; ກອງປະຊຸມສຳມະນາ ການປັບຕົວຈາກຜົນກະທົບ COVID-19 ໃນຂະແໜງກະສິກຳ; ເວທີສົນທະນາ ຄວາມຕ້ອງການຂອງຜູ້ຊົມໃຊ້ ຜະລິດຕະພັນລາວ; ການສົ່ງເສີມ ລາວທ່ຽວລາວ ແລະ ອື່ນໆ.
ງານຜະລິດຕະພັນລາວ 2020 ແມ່ນຈັດຂື້ນແຕ່ວັນທີ່ 25 ທັນວາ 2020 ຫາ ວັນທີ 03 ມັງກອນ 2021.​



ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ