ກອງປະຊຸມໃຫຍ່ ອົງຄະນະພັກແຂວງສະຫວັນນະເຂດ ໄຂຂຶ້ນຢ່າງເປັນທາງການ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 20 ພ.ຈ 2020 14:00

​​ ກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສະຫວັນນະເຂດ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 20 ພະຈິກ 2020 ທີ່ ຫໍວັດທະນະທຳ ໄກສອນ ພົມວິຫານ, ໂດຍການເປັນປະທານ ຂອງສະຫາຍ ສັນຕິພາບ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆສະຫວັນນະເຂດ ແລະ ໃຫ້ກຽດເຂົ້າຮ່ວມ ຂອງສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ຜູ້ຕາງ ຄະນະກວດກາສູນກາງພັກ; ມີຜູ້ແທນສົມບູນ ຈຳນວນ 455 ສະຫາຍ, ຍິງ 79 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ໃນທົ່ວແຂວງ ຈຳນວນ 29.075 ສະຫາຍ, ຍິງ 6.810 ສະຫາຍ, ພ້ອມດ້ວຍ ແຂກຖືກເຊີນ ເຂົ້າຮ່ວມ.


ພາຍຫຼັງ ສະຫາຍ ສັນຕິພາບ ພົມວິຫານ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ, ສະຫາຍໄດ້ຜ່ານຮ່າງລາຍງານການເມືອງ, ຊຶ່ງພາກທຳອິດ ແມ່ນການຕີລາຄາໝາກຜົນ ຂອງການຈັດຕັັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ເຫັນວ່າ: ພາຍໃຕ້ການນຳພາອັນສະຫຼາດ, ສ່ອງໃສຂອງພັກ-ລັດຖະບານ ບວກກັບຄວາມສາມັກຄີເປັນຈິດໜຶ່ງໃຈດຽວ, ຄວາມຕັດສິນໃຈ, ຄວາມຮັບຜິດຊອບສູງຂອງຄະນະພັກ, ອົງການປົກຄອງແຂວງ, ບັນດາສະຫາຍສະມາຊິກພັກ-ພະນັກງານ ແລະ ຄວາມເປັນເຈົ້າການຂອງປະຊາຊົນບັນດາເຜົ່າ ໄດ້ເຮັດໃຫ້ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງ ອັນໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ, ເສດຖະກິດພັດທະນາກ້າວຂຶ້ນ ດ້ວຍທ່ວງທ່າທີ່ໝັ້ນທ່ຽງ; ປະຊາຊົນບັນດາເຜົ່າ ມີຄວາມສາມັກຄີເປັນປຶກແຜ່ນ, ມີຄວາມເຊື່ອໝັ້ນຕໍ່ການນໍາພາ ຂອງພັກ-ລັດ ກໍ່ຄືຂອງອົງຄະນະພັກແຂວງ; ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງຍົກສູງຂຶ້ນເປັນກ້າວໆ; ຖັນແຖວສະມາຊິກພັກ-ພະນັກງານ-ລັດຖະກອນ ແລະ ກຳລັງປະກອບອາວຸດ ໄດ້ຮັບການບໍາລຸງສ້າງທາງດ້ານທິດສະດີ-ວິຊາສະເພາະ ແລະ ຜ່ານໃນຂະບວນການວຽກງານຕົວຈິງ ເປັນຈໍານວນຫຼວງຫຼາຍ. ໝາກຜົນຂອງການຈັດຕັ້ງປະຕິບັດ ບັນດາຄາດໝາຍ ຂອງມະຕິກອງປະຊຸມໃຫຍ່ ກໍ່ຄືແຜນພັດທະນາເສດຖະກິດ-ສັງຄົມຂອງແຂວງ ໄລຍະ 5 ປີຜ່ານມາ ເສດຖະກິດຂະຫຍາຍຕົວ ສະເລ່ຍ 8,53% ຕໍ່ປີ, ລາຍຮັບສະເລ່ຍໃສ່ຫົວຄົນ ໄດ້ 2.136 ໂດລາສະຫະລັດ, ສາມາດລະດົມທຶນໃນທົ່ວສັງຄົມ ເຂົ້າໃນການພັດທະນາເສດຖະກິດ-ສັງຄົມຂອງແຂວງ ໄດ້ທັງໝົດ 36.286 ຕື້ກີບ, ກວມ 41% ຂອງ GDP ທຽບໃສ່ 5 ປີ ຜ່ານມາ ເພີ່ມຂຶ້ນ 1,07%, ໃນນີ້ ການລົງທຶນຂອງລັດ ປະຕິບັດໄດ້ 498,01 ຕື້ກີບ ຫຼຸດລົງ 67%, ທຶນຊ່ວຍເຫຼືອ ເພື່ອການພັດທະນາ (ODA) ປະຕິບັດໄດ້  1.535,49 ຕື້ກີບ ຫຼຸດລົງ 2,3%, ການລົງທຶນເອກະຊົນພາຍໃນ ແລະ ຕ່າງປະເທດ ປະຕິບັດໄດ້ 21.258,62 ຕື້ກີບ ເພີ່ມຂຶ້ນ 2,4 ເທົ່າ, ທຶນຈາກຂະແໜງການເງິນ-ເງິນຕາ ປະຕິບັດໄດ້ 12.886 ຕື້ກີບ, ເພີ່ມຂຶ້ນ 59%. ນອກນີ້, ຍັງມີການສົມທົບທຶນຈາກປະຊາຊົນ ປະກອບສ່ວນເຂົ້າໃນການພັດທະນາໂຄງລ່າງພື້ນຖານ ທີ່ຈໍາເປັນ ເປັນຕົ້ນ ກໍ່ສ້າງເສັ້ນທາງພາຍໃນບ້ານ ແລະ ອື່ນໆ ລວມມູນຄ່າທັງໝົດ 107,54 ຕື້ກີບ ເພີ່ມຂຶ້ນ 15%; ການເກັບລາຍຮັບງົບປະມານ  ໄດ້ 6.637 ຕື້ກີບ, ຖ້າທຽບໃສ່ 5 ປີ ຜ່ານມາ ເພີ່ມຂຶ້ນ 26,17%, ໃນນັ້ນ ລາຍຮັບພູດຂອງສູນກາງ ປະຕິບັດໄດ້ 3.562 ຕື້ກີບ, ເພີ່ມຂຶ້ນ 12,61%; ດ້ານລາຍຈ່າຍ ປະຕິບັດໄດ້ 4.049 ຕື້ກີບ, ແຂວງຂາດດຸນສະເລ່ຍ 194,65 ຕື້ກີບ/ປີ; ສາມາດຜະລິດເຂົ້າເປືອກ ຕອບສະໜອງໃຫ້ແກ່ສັງຄົມ ໄດ້ໂດຍພື້ນຖານ  ສະເລ່ຍ 7-8 ແສນໂຕນຕໍ່ປີ,  ແລະ ຂາຍເປັນສິນຄ້າ ໄດ້ສະເລ່ຍ 20 ພັນໂຕນຕໍ່ປີ, ການປູກພືດສະບຽງອາຫານ ຂະຫຍາຍຕົວ ສະເລ່ຍ 2-3 ແສນໂຕນຕໍ່ປີ; ການຟື້ນຟູປ່າໄມ້ ເພີ່ມຂຶ້ນ 55.604 ເຮັກຕາ; ໄດ້ມີຫຼາຍວິສາຫະກິດເກີດຂຶ້ນ ທັງໂຮງງານອຸດສາຫະກຳ, ວິສາຫະກິດຂະໜາດນ້ອຍ ແລະ ຂະໜາດກາງ ເຮັດໃຫ້ການຜະລິດອຸດສາຫະກຳປຸງແຕ່ງ ແລະ ຫັດຖະກໍາ ບັນລຸ 8.326ຕື້ກີບ, ເພີ່ມຂຶ້ນ 25%, ສາມາດສົ່ງອອກສິນຄ້າ ໄດ້ທັງໝົດ 6.331 ລ້ານໂດລາ ເພີ່ມຂຶ້ນ 44%; ທົ່ວແຂວງ ມີເສັ້ນທາງເຂົ້າສູ່ບ້ານ ສາມາດທຽວໄດ້ສອງລະດູ ກວມຫຼາຍກວ່າ 80%; ບ້ານໄດ້ຊົມໃຊ້ໄຟຟ້າເພີ່ມຂຶ້ນ ກວມເອົາ 94% ຂອງບ້ານທົ່ວແຂວງ  ແລະ ກວມ 97% ຂອງຄອບຄົວທົ່ວແຂວງ; ຄອບຄົວພົ້ນທຸກ ເພີ່ມຂຶ້ນ 3,4%,  ກວມ 96% ຂອງຄອບຄົວທົ່ວແຂວງ ແລະ ບ້ານພົ້ນທຸກ ເພີ່ມຂຶ້ນ 7,3%, ກວມເອົາ 91% ຂອງບ້ານທົ່ວແຂວງ; ອັດຕາເຂົ້າຮຽນ ຂອງເດັກອາຍຸ 5 ປີ ບັນລຸໄດ້ 77,3%, ອັດຕາການຮູ້ໜັງສື ກຸ່ມອາຍຸ 15 ປີຂຶ້ນໄປ ກວມ 95%, ການເຂົ້າຮ່ວມຫັດກາຍ ແລະ ການຫຼິ້ນກິລາກາຍຍະກໍາ ບັນລຸໄດ້ 30%, ອັດຕາເຂົ້າຮຽນຊັ້ນມັດທະຍົມຕົ້ນ ກວມ 77,7%, ອັດຕາການຮູ້ໜັງສື ໃນເກນອາຍຸ ກວມ 97,2%; ອັດຕາການຕາຍຂອງເດັກລຸ່ມ 5 ປີ ປະຕິບັດໄດ້ 10/1.000 ເດັກເກີດມີຊີວິດ (ຄາດໝາຍ 20/1.000); ອັດຕາສ່ວນເດັກນ້ອຍລຸ່ມ 5 ປີ ທີ່ມີນ້ຳໜັກຕ່ຳກວ່າມາດຕະຖານ ປະຕິບັດໄດ້ 10/1.000 (ຄາດໝາຍ 20/1.000), ອັດຕາການຊົມໃຊ້ວິດຖ່າຍຄອບຄົວ ປະຕິບັດໄດ້ 75,2% (ຄາດໝາຍ 75%); ສ້າງບ້ານວັດທະນະທໍາໄດ້ 800 ບ້ານ, ເພີ່ມຂຶ້ນ 45%, ກວມ 78% ຂອງບ້ານທົ່ວແຂວງ ແລະ ຄອບຄົວວັດທະນະທໍາ  123.440 ຄອບຄົວ, ກວມ 68% ຂອງຈໍານວນຄອບຄົວທົ່ວແຂວງ, ກຸ່ມບ້ານວັດທະນະທໍາ  22 ກຸ່ມບ້ານ, ກວມ 13,17% ຂອງກຸ່ມບ້ານໃນທົ່ວແຂວງ.


ສ່ວນພາກທີສອງ ກໍ່ຄືທິດທາງລວມ, ຄາດໝາຍສູ້ຊົນ, ທິດທາງໜ້າທີ່ຈຸດສຸມ ໃນການນໍາພາຂອງອົງຄະນະພັກ ໃນ 5 ປີຕໍ່ໜ້າ ແມ່ນສືບຕໍ່ນໍາພາພັດທະນາແຂວງ ເຮັດໃຫ້ແຕ່ລະເມືອງຮັ່ງມີຂຶ້ນ, ປະຊາຊົນມີວຽກເຮັດງານທໍາ, ຊີວິດການເປັນຢູ່ໄດ້ຮັບການປັບປຸງ, ມີກິນມີໃຊ້ດີຂຶ້ນ, ຜາສຸກ ແລະ ສັງຄົມມີຄວາມເປັນລະບຽບຮຽບຮ້ອຍ, ປະຕິບັດເປົ້າໝາຍການພັດທະນາແບບຍືນຍົງ ຮອດ 2030 ແລະ ຜັນຂະຫຍາຍຍຸດທະສາດການເຕີບໂຕສີຂຽວໃຫ້ມີປະສິດທິຜົນ; ບຸກທະລຸແກ້ໄຂຈຸດອ່ອນຂໍ້ຄົງຄ້າງ, ອຸປະສັກຕ່າງໆ ໃນການພັດທະນາໃນໄລຍະຜ່ານມາ ບວກກັບສິ່ງທ້າທາຍທີ່ເກີດຂຶ້ນໃນໄລຍະໃໝ່; ເສີມຂະຫຍາຍປັດໄຈ ແລະ ທ່າແຮງບົ່ມຊ້ອນຂອງແຂວງ ໃຫ້ກາຍເປັນຂະແໜງການຜະລິດ ແລະ ບໍລິການ ທີ່ເປັນປາຍແຫຼມ, ເປັນຫົວຈັກໃຫ້ການເຕີບໂຕ ເພື່ອສ້າງພື້ນຖານໃຫ້ແກ່ຄວາມເຂັ້ມແຂງ ແລະ ເປັນເຈົ້າຕົນເອງ ເພິ່ງຕົນເອງທາງດ້ານເສດຖະກິດເປັນກ້າວໆ, ໃນນັ້ນ ສູ້ຊົນເຮັດໃຫ້ເສດຖະກິດຂອງແຂວງ ຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ ແລະ ຍືນຍົງ, ລວມຍອດຜະລິດຕະພັນພາຍໃນ (GDP) ເພີ່ມຂຶ້ນສະເລ່ຍ 7,5-8% ຕໍ່ປີ, ດ້ວຍມູນຄ່າ 31.887,74 ຕື້ກີບ, ລາຍຮັບສະເລ່ຍໃສ່ພົນລະເມືອງ ໄດ້  28,05 ລ້ານກີບ ຫຼື ເທົ່າກັບ 3.153 ໂດລາສະຫະລັດ, ສູ້ຊົນຫັນປ່ຽນໂຄງປະກອບເສດຖະກິດ ໄປຕາມທິດທີ່ມີຄຸນນະພາບ, ຍືນຍົງ ແລະ ສີຂຽວ, ສູ້ຊົນປະຕິບັດລາຍຮັບເຂົ້າງົບປະມານທັງໝົດ ໃຫ້ໄດ້ 7-8% ຂອງ GDP, ຮັບປະກັນການຂາດດຸນງົບປະມານໃນແຕ່ລະປີ ໃຫ້ຢູ່ໃນລະດັບບໍ່ເກີນ 0,4-0,5% ຂອງ GDP, ຮັບປະກັນສະຖຽນລະພາບເງິນຕາ ໃຫ້ມີຄວາມໝັ້ນທ່ຽງ, ອັດຕາເງິນເຟີ້ ໃຫ້ຢູ່ໃນລະດັບຕ່ຳກວ່າການຂະຫຍາຍຕົວຂອງເສດຖະກິດ, ອັດຕາແລກປ່ຽນ ເໜັງຕີງໃນລະດັບ ±5% ຕໍ່ປີ ແລະ ອື່ນໆ.

​ກອງປະຊຸມໃຫຍ່ຄັ້ງນີ້ ຈະດຳເນີນເປັນເວລາ 2 ວັນ ແຕ່ວັນທີ 20-21 ພະຈິກ 2020, ຊຶ່ງເນື້ອໃນຂອງກອງປະຊຸມ ແມ່ນສຸມໃສ່ພິຈາລະນາ ແລະ ຮັບຮອງເອົາ ຮ່າງລາຍງານການເມືອງ, ບົດສຳຫຼວດການນຳພາ ຂອງຄະນະບໍລິຫານງານພັກແຂວງ ສະໄໝທີ VIII, ແຜນພັດທະນາເສດຖະກິດ-ສັງຄົມ 5 ປີ (2021-2025); ຮັບຟັງການປະກອບຄຳເຫັນ ຈາກຂະແໜງການ, ກົມກອງ ແລະ ຕົວແບບ ຈຳນວນໜຶ່ງ, ພ້ອມທັງ ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກແຂວງສະໄໝທີ IX ແລະ ເລືອກເອົາຜູ້ແທນ ໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI; ອັນສຳຄັນ ກອງປະຊຸມ ຈະໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳ ຈາກສະຫາຍ ທອງລຸນ ສີສຸລິດ ເພື່ອໃຫ້ຄະນະບໍລິຫານງານພັກແຂວງຊຸດໃໝ່ ແລະ ຜູ້ແທນກອງປະຊຸມ ນຳໄປຄົ້ນຄວ້າ, ຫັນເປັນທິດທາງ ແລະ ແຜນການລະອຽດ ຂອງຄະນະພັກຂັ້ນຂອງຕົນ ໝູນໃຊ້ ແລະ ຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ