ທ່ານ ບຸນທອງ ຈິດມະນີ ໂອ້ລົມການນໍາແຂວງສະຫວັນນະເຂດ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 16 ພ.ຈ 2020 17:00

​ໃນໂອກາດທີ່ເດີນທາງໄປຢ້ຽມຢາມ ແລະ ມອບເຄື່ອງຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມ ຢູ່ເມືອງຊົນນະບູລີ, ແຂວງສະຫວັນນະເຂດ ໃນລະຫວ່າງວັນທີ 14-15 ພະຈິກ 2020 ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ   ໄດ້ໃຫ້ກຽດໂອ້ລົມ ການນໍາຫຼັກແຫຼ່ງຂອງແຂວງ ທີ່ ຫ້ອງວ່າການປົກຄອງແຂວງສະຫວັນນະເຂດ; ມີທ່ານ ເພັດ ພົມພິພັກ, ລັດຖະມົນຕີກະຊວງກະສິກໍາ ແລະ ປ່າໄມ້ ແລະ ຄະນະຮ່ວມເຄື່ອນໄຫວ; ໂດຍໄດ້ຮັບການຕ້ອນຮັບຈາກທ່ານ ສັນຕິພາບ ພົມວິຫານ, ເຈົ້າແຂວງສະຫວັນນະເຂດ, ບັນດາທ່ານຄະນະປະຈໍາພັກແຂວງ ແລະ ພະນັກງານທີ່ກ່ຽວຂ້ອງ ຂອງແຂວງ.


ທ່ານ ສັນຕິພາບ ພົມວິຫານ ໄດ້ລາຍງານສະພາບການນໍ້າຖ້ວມ, ການບັນເທົາທຸກ ໃຫ້ແກ່ພໍ່ແມ່ປະຊາຊົນ ໃນເບື້ອງຕົ້ນ ແລະ ການກະກຽມດໍາເນີນກອງປະຊຸມໃຫຍ່ອົງຄະນະພັກແຂວງຄັ້ງທີ IX ໃຫ້ທ່ານຮອງນາຍົກ ແລະ ຄະນະ ໄດ້ຮັບຊາບ: ນັບແຕ່ເດືອນ ກັນຍາ ຫາ ຕຸລາ ມີພາຍຸຕິດຕໍ່ກັນຫຼາຍລູກພັດຜ່ານເຂົ້າມາ ເຮັດໃຫ້ຝົນຕົກແຮງ ຊຶ່ງໄດ້ເຮັດໃຫ້ ບັນດາສາຍນ້ຳທີ່ສໍາຄັນ ຄື: ນ້ຳເຊບັ້ງຫຽງ, ເຊໂປນ, ເຊລະນອງ ແລະ ເຊກອກ ເພີ່ມຂຶ້ນລົ້ນຝັ່ງ ເຂົ້າຖ້ວມເນື້ອທີ່ ບ່ອນຕໍ່າ ແລະ ໄຫຼລົງມາຖ້ວມເນື້ອທີ່ຕອນລຸ່ມຂອງເຊບັ້ງຫຽງ. ຖ້ວມແຮງທີ່ສຸດແມ່ນວັນທີ 18 ຕຸລາ ໂດຍສະເພາະ ເມືອງເຊໂປນ ແມ່ນຖ້ວມໜັກແບບບໍ່ເຄີຍມີມາກ່ອນໃນຮອບຫຼາຍສິບປີ. ພະຍຸຄັ້ງນີ້ ເຮັດໃຫ້  08 ເມືອງ ໄດ້ຮັບຜົນກະທົບ ຄື: ເມືອງພີນ, ວິລະບູລີ, ນອງ, ຈຳພອນ, ຊົນນະບູລີ, ສອງຄອນ ແລະ ເມືອງທ່າປາທອງ. ນໍ້າຖ້ວມ ບ້ານເຮືອນປະຊາຊົນເສຍຫາຍ ຈຳນວນ 141 ບ້ານ, 10.908 ຫຼັງຄາເຮືອນ ມີ 11.710 ຄອບຄົວ, ມີຈຳນວນພົນ 64.999 ຄົນ, ເຮືອນເປ່ເພທັງໝົດ 120 ຫຼັງ, ເນື້ອທີ່ທໍາການຜະລິດເສຍຫາຍ 23.852 ເຮັກຕາ, ມີໜອງປາ, ສັດລ້ຽງຕາຍ ແລະ ສູນຫາຍ, ລະບົບຊົນລະປະທານຖືກຖ້ວມ, ເສັ້ນທາງເປ່ເພເສຍຫາຍ, ບັນດາໂຮງຮຽນ-ສຸກສາລາ ແລະ ພື້ນຖານໂຄງລ່າງອື່ນຖືກຜົນກະທົບ, ຊຶ່ງຄາດຄະເນຜົນເສຍຫາຍເບື້ອງຕົ້ນ ປະມານ 215,08 ຕື້ກວ່າກີບ. ສຳລັບການຊ່ວຍເຫຼືອເບື້ອງຕົ້ນ ຂອງຄະນະກຳມະການຄຸ້ມຄອງໄພພິບັດແຂວງ ໄດ້ລະດົມພະນັກງານ, ທະຫານ, ຕຳຫຼວດ, ຊາວໜຸ່ມ ລົງເກັບກູ້ເຂົ້ານາປີ ແລະ ຊ່ວຍຍົກຍ້າຍປະຊາຊົນ ມາຢູ່ສູນບ່ອນປອດໄພໄດ້ທັງໝົດ 3.252 ເທື່ອຄົນ; ໄດ້ແຈກເຂົ້າສານ 18.800 ໂຕນ, ເຄື່ອງອຸປະໂພກ-ບໍລິໂພກອື່ນໆ ລວມມູນຄ່າ ໃຫ້ການ ຊ່ວຍເຫຼືອເບື້ອງຕົ້ນເປັນເງິນ 765 ລ້ານກວ່າກີບ; ນອກຈາກນີ້ ຍັງໄດ້ປຸກລະດົມ ການປະກອບສ່ວນທົ່ວສັງຄົມ ໄດ້ທັງໝົດ 69 ພາກສ່ວນ ລວມມູນຄ່າທັງໝົດ 1.451 ລ້ານກວ່າກີບ.

​ໃນໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາການນໍາຂອງແຂວງ ຮີບຮ້ອນໃຫ້ການຊ່ວຍເຫຼືອ ແລະ ຟື້ນຟູຊີວິດການເປັນຢູ່ຂອງພໍ່ແມ່ປະຊາຊົນ ກັບຄືນສູ່ສະພາບປົກກະຕິໂດຍໄວ, ການແກ້ໄຂສະເພາະໜ້ານີ້ ຕ້ອງຮີບຮ້ອນລະດົມການຊ່ວຍເຫຼືອເຂົ້າກິນ, ທັງຈັດແຈງແຈກຢາຍເຂົ້າທີ່ທົ່ວສັງຄົມຊ່ວຍເຫຼືອ ແລະ ການຊ່ວຍເຫຼືອຂອງຕ່າງປະເທດ ເພື່ອໃຫ້ພໍ່ແມ່ປະຊາຊົນ ທີ່ໄດ້ຮັບຜົນກະທົບບັນຫາເຂົ້າກິນ; ສ້ອມແປງ ແລະ ປຸກສ້າງທີ່ຢູ່ອາໄສໃຫ້ປະຊາຊົນ ທີ່ບໍ່ມີບ່ອນພັກ ທັງບ່ອນພັກຊົ່ວຄາວ ແລະ ຖາວອນ; ຮີບຮ້ອນຟື້ນຟູອາຄານສະຖານທີ່ຕ່າງໆ ເຊັ່ນ ສຸກສາລາ, ວັດວາອາຮາມ ແລະ ໂຮງຮຽນ ໃຫ້ນັກຮຽນ ໄດ້ເຂົ້າຮຽນເປັນປົກກະຕິ ແລະ ຕໍ່ເນື່ອງ; ຈັດສັນທີ່ດິນທໍາການຜະລິດໃຫ້ປະຊາຊົນ ທີ່ຖືກຜົນກະທົບໜັກ ແລະ ບໍ່ສາມາດທໍາການຜະລິດຢູ່ບ່ອນເກົ່າໄດ້; ປັບປຸງສ້ອມແປງ ແລະ ສ້າງເງື່ອນໄຂ ໃຫ້ປະຊາຊົນສາມາດທໍາການຜະລິດ ໃນລະດູແລ້ງໂດຍໄວເປັນຕົ້ນ ສ້ອມແປງຊົນລະປະທານ, ຈັກສູບນໍ້າ, ສະໜອງແນວພັນປູກ ແລະ ອື່ນໆ  ໂດຍສົມທົບ ລະຫວ່າງ ການສະໜອງງົບປະມານຂອງລັດ ແລະ ການປຸກລະດົມກຳລັງແຮງສັງລວມ ຂອງປະຊາຊົນ ເຂົ້າໃນການສ້ອມແປງ ເພື່ອໃຫ້ສາມາດສະໜອງນໍ້າ ໃຫ້ແກ່ການຜະລິດໃນລະດູແລ້ງນີ້ ພ້ອມທັງ ສ້ອມແປງຖະໜົນຫົນທາງ ທີ່ເປ່ເພ ເພື່ອອຳນວຍຄວາມສະດວກ ໃຫ້ແກ່ປະຊາຊົນໃນການສັນຈອນໄປມາ ຂົນສົ່ງອຸປະກອນທໍາການຜະລິດ ແລະ ຜົນຜະລິດ; ຄຽງຄູ່ກັນນີ້ ກໍຕ້ອງຊຸກຍູ້ສົ່ງເສີມການຜະລິດໃນລະດູແລ້ງຂອງປະຊາຊົນ ໂດຍການປູກພືດຊະນິດຕ່າງໆ ເພື່ອທົດແທນຜົນຜະລິດ ທີ່ສູນເສຍໄປກັບໄພນໍ້າຖ້ວມ ໃຫ້ສາມາດສະໜອງສະບຽງອາຫານໃນລະດູແລ້ງນີ້ ໃຫ້ພຽງພໍ ແລະ ມີສ່ວນແຮໄວ້ໃນໄລຍະຍາວ, ພ້ອມທັງ ວາງແຜນການຜະລິດໄລຍະຍາວ ເພື່ອຮັບປະກັນທາງດ້ານສະບຽງອາຫານ ໃຫ້ປະຊາຊົນຕື່ມອີກ; ນອກຈາກນີ້ ໃຫ້ສືບຕໍ່ເອົາໃຈໃສ່ ເຝົ້າລະວັງ ແລະ ສະກັດກັ້ນການແຜ່ລະບາດ ຂອງພະຍາດຕາມລະດູການ, ພິເສດ ແມ່ນເອົາໃຈໃສ່ໃນການເຝົ້າລະວັງ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ເນື່ອງຈາກແຂວງສະຫວັນນະເຂດ ເປັນແຂວງທາງຜ່ານ, ເປັນປະຕູເຊື່ອມຕໍ່ກັບ ບັນດາປະເທດທີ່ໃກ້ຄຽງ. ສ່ວນການ ກະກຽມ ດໍາເນີນກອງປະຊຸມໃຫຍ່ ອົງຄະນະພັກແຂວງ ເຫັນວ່າ ອານຸກໍາມະການຕ່າງໆ ໄດ້ກະກຽມຮອບດ້ານແລ້ວ,  ໃນນີ້ ໃຫ້ເອົາໃຈໃສ່ບາງບັນຫາຕື່ມ ເປັນຕົ້ນ ເອົາໃຈໃສ່ການຮັກສາຄວາມສະຫງົບທົ່ວປວງຊົນ, ຮັບປະກັນໃຫ້ສັງຄົມ ມີຄວາມສະຫງົບ, ປອດໄພ ໂດຍຫັນວຽກງານປ້ອງກັນຄວາມສະຫງົບ ໃຫ້ເປັນຂະບວນການຂອງປະຊາຊົນ ແລະ ການຮັກສາຄວາມສະຫງົບພາຍໃນພັກ ກໍ່ຄືການຈັດຕັ້ງຕ່າງໆ.​


ແຫຼ່ງ: ຄະນະກວດກາສູນກາງພັກ