ທ່ານ ນາຍົກລັດຖະມົນຕີ ສືບຕໍ່ເຂົ້າຮ່ວມກອງປະຊຸມສຸດຍອດ ກັບຄູ່ຮ່ວມເຈລະຈາ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 16 ພ.ຈ 2020 10:00

​​​ໃນຕອນເຊົ້າວັນທີ 15 ພະຈິກ 2020, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ນຳພາຄະນະ ເຂົ້າຮ່ວມກອງປະຊຸມສຸດຍອດ ອາຊຽນ-ສປຊ ຄັ້ງທີ 11. ກອງປະຊຸມສຸດຍອດຄັ້ງນີ້ ໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດ ການຮ່ວມມື ອາຊຽນ-ສປຊ ໃນໄລຍະ 1 ປີ ຜ່ານມາ ໂດຍສະເພາະການຜັນຂະຫຍາຍ ແຜນປະຕິບັດງານການຮ່ວມມື ອາຊຽນ-ສປຊ ໄລຍະ 2016-2020 ແລະ ການຈັດຕັ້ງປະຕິບັດ ບັນດາແຜນງານ/ໂຄງການ ພາຍໃຕ້ຂອບການຮ່ວມມື ວ່າດ້ວຍການເສີມສ້າງເຊິ່ງກັນ ແລະ ກັນ ລະຫວ່າງ ວິໄສທັດປະຊາຄົມອາຊຽນ 2025 ແລະ ບັນດາເປົ້າໝາຍ ເພື່ອການພັດທະນາແບບຍືນຍົງ ສປຊ 2030, ຊຶ່ງທັງໝົດນີ້ ໄດ້ປະກອບສ່ວນອັນສຳຄັນເຂົ້າໃນການສ້າງສັນຕິພາບ, ຄວາມໝັ້ນຄົງ ແລະ ການຊ່ວຍເຫຼືອພັດທະນາ ຢູ່ພາກພື້ນ ກໍຄືໃນໂລກ.


​​ກອງປະຊຸມ ຍັງໄດ້ຢໍ້າຄືນເຖິງບົດບາດອັນສໍາຄັນ ຂອງ ສປຊ ໃນຖານະເປັນອົງການຈັດຕັ້ງຫຼາຍຝ່າຍ ເພື່ອສືບຕໍ່ຮັກສາ ແລະ ສົ່ງເສີມ ສັນຕິພາບ, ສະຖຽນລະພາບ ແລະ ຄວາມໝັ້ນຄົງ ຢູ່ພາກພື້ນ ແລະ ສາກົນ ຕາມກົດບັດ ສປຊ ທີ່ວາງໄວ້. ກອງປະຊຸມຄັ້ງນີ້, ທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ສະເໜີໃຫ້ກອງປະຊຸມ ພິຈາລະນາ: 1. ສືບຕໍ່ເພີ່ມທະວີການຮ່ວມມືກັນ ໃນຂະແໜງສາທາລະນະສຸກ ໂດຍສະເພາະ ການຜະລິດ ແລະ ແຈກຢາຍຢາວັກແຊັງຕ້ານໂຄວິດ-19 ພາຍໃຕ້ໂຄງການຢາວັກແຊັງສາກົນຫຼາຍຝ່າຍ ຫຼື ໂຄແວັກ ເພື່ອຮັບປະກັນໃຫ້ຢາວັກແຊັງດັ່ງກ່າວ ເປັນສິນຄ້າສາທາລະນະ (Public goods) ແລະ ທຸກປະເທດໃນໂລກ ສາມາດໄດ້ຮັບຢາວັກແຊັງຕ້ານໂຄວິດ-19 ຢ່າງທົ່ວເຖິງ. ພ້ອມນີ້, ສະເໜີໃຫ້ ສປຊ ສະໜັບສະໜູນ ການຟື້ນຟູເສດຖະກິດຫຼັງໂຄວິດ-19; 2. ຮັດແໜ້ນການຮ່ວມມື ລະຫວ່າງ ສະຖາບັນສັນຕິພາບ ແລະ ຄວາມປອງດອງອາຊຽນ (AIPR) ດ້ວຍການຈັດກອງປະຊຸມ, ສຳມະນາ ແລະ ຊຸດຝຶກອົບຮົມ ເພື່ອສ້າງນັກເຈລະຈາ, ນັກໄກ່ເກ່ຍ ແລະ ນັກພັດທະນາກອນ ລວມທັງ ຍົກສູງບົດບາດຂອງແມ່ຍິງ; ແລະ 3. ສືບຕໍ່ຈັດຕັ້ງປະຕິບັດ ບັນດາເປົ້າໝາຍການພັດທະນາແບບຍືນຍົງ ສປຊ ຮອດປີ 2030 ລວມທັງ ການສ້າງຂີດຄວາມສາມາດ ແລະ ຮັດແໜ້ນຄວາມເຂັ້ມແຂງ ດ້ານສະຖາບັນໃນການປ້ອງກັນ, ຮັບມື ແລະ ຟື້ນຟູ ຫຼັງຈາກໄພພິບັດທຳມະຊາດຕ່າງໆ. ພ້ອມນີ້, ກອງປະຊຸມ ຍັງໄດ້ແລກປ່ຽນຄໍາຄິດຄໍາເຫັນນໍາກັນ ຕໍ່ບາງບັນຫາເດັ່ນ ຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນ ບັນຫາການແຜ່ລະບາດຂອງພະຍາດໂຄວິດ-19, ບັນຫາສັນຕິພາບ ແລະ ຄວາມໝັ້ນຄົງ ແລະ ອື່ນໆ.


​​ຫຼັງຈາກນັ້ນ, ທ່ານນາຍົກລັດຖະມົນຕີ ໄດ້ນຳພາຄະນະ ເຂົ້າຮ່ວມກອງປະຊຸມສຸດຍອດບັນດາຜູ້ນໍາສັນຍາ ການຮ່ວມມືເສດຖະກິດພາກພື້ນແບບຮອບດ້ານ ຄັ້ງທີ 4 (ອາເຊັບ ຄັ້ງທີ 4) ພາຍໃຕ້ການເປັນປະທານ ຂອງທ່ານ ຫງວຽນ ຊວັນ ຟຸກ, ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ມີບັນດາຜູ້ນໍາປະເທດສະມາຊິກອາເຊັບເຂົ້າຮ່ວມຢ່າງພ້ອມພຽງ. 

ກອງປະຊຸມຄັ້ງນີ້, ບັນດາຜູ້ນໍາ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດຮອບດ້ານໃນການເຈລະຈາສັນຍາດັ່ງກ່າວ, ຊຶ່ງໃຊ້ເວລາເຖິງ 8 ປີ ຈຶ່ງສໍາເລັດ. ສັນຍາອາເຊັບນີ້ ເປັນຂອບສັນຍາເສດຖະກິດ ທີ່ໃຫຍ່ທີ່ສຸດໃນໂລກ ກວມເອົາເກືອບ 1/3 ຂອງ GDP ໂລກ, ມີ GDP ທັງໝົດ 24.669 ຕື້ໂດລາ ຫຼື ປະມານ 30% ຂອງຂະໜາດເສດຖະກິດໂລກ, ມີມູນຄ່າການຄ້າກວມ 27,1 % ຂອງການຄ້າໂລກ, ມູນຄ່າການລົງທຶນ 29,3% ຂອງການລົງທຶນໂລກ ແລະ ມີປະຊາກອນ ລວມກັນ 2.249 ລ້ານຄົນ.

​​ບັນດາລັດຖະມົນຕີ ເສດຖະກິດ ອາເຊັບ ຂອງທັງ 14 ປະເທດ ລວມທັງ ທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງ ອຸດສາຫະກໍາ ແລະ ການຄ້າ ຂອງ ສປປ ລາວ ໄດ້ເປັນກຽດລົງນາມໃນສັນຍາອາເຊັບຄັ້ງນີ້ ໂດຍມີບັນດາຜູ້ນໍາ ຈາກປະເທດສະມາຊິກອາເຊັບ ລວມທັງ ທ່ານ ນາຍົກລັດຖະມົນຕີ ແຫ່ງ ສປປ ລາວ ເປັນກຽດເປັນສັກຂີພິຍານ ໃນພິທີລົງນາມດັ່ງກ່າວ. ສັນຍາອາເຊັບ ຈະມີຜົນສັກສິດເມື່ອ 6 ປະເທດອາຊຽນ ແລະ 3 ປະເທດຄູ່ເຈລະຈາອາຊຽນ ໄດ້ໃຫ້ສັດຕະຍາບັນແກ່ສັນຍາດັ່ງກ່າວ.

​​​


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ