ທ່ານ ນາຍົກລັດຖະມົນຕີ ຊຸກຍູ້ວຽກງານ ແຂວງຈຳປາສັກ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນອາທິດ, 25 ຕ.ລ 2020 10:00

​​​​​​ໃນຕອນບ່າຍວັນທີ 24 ຕຸລາ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ແຂວງຈຳປາສັກ, ໂດຍມີທ່ານ ເມກສະຫວັນ ພົມພິທັກ, ປະທານສະພາປະຊາຊົນແຂວງຈຳປາສັກ, ທ່ານ ມະໄລທອງ ກົມມະສິດ, ຮອງເຈົ້າແຂວງໆຈຳປາສັກ ພ້ອມ ດ້ວຍຄະນະນຳ, ພະນັກງານ ຫຼັກ ແຫຼ່ງ ແລະ ພາກທຸລະກິດຂອງແຂວງດັ່ງກ່າວ ໃຫ້ການຕ້ອນຮັບ ແລະ ເຂົ້າຮ່ວມ ຮັບຟັງການໂອ້ລົມ.

​​​​ໃນໂອກາດນີ້, ທ່ານ ມະໄລທອງ ກົມມະສິດ ໄດ້ການລາຍງານຫຍໍ້ ກ່ຽວກັບ ສະພາບການພັດທະນາເສດຖະກິດ-ສັງຄົມ, ແຜນງົບປະມານ- ເງິນຕາ ໄລຍະ 9 ເດືອນ ປີ 2020 ໃຫ້ ຊາບວ່າ: ທົ່ວ ແຂວງ ສືບ ຕໍ່ ຮັກສາໄດ້ ຄວາມສະຫງົບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ໂຄງລ່າງພື້ນຖານດ້ານຕ່າງໆ ໄດ້ຮັບການກໍ່ສ້າງ ແລະ ປັບປຸງດີຂຶ້ນຢ່າງຕໍ່ເນື່ອງ, ມູນຄ່າລວມຍອດຜະລິດຕະພັນພາຍໃນ (GDP) ປະຕິບັດໄດ້ 12.620,76 ຕື້ກີບ, ທຽບໃສ່ແຜນປີ ປະຕິບັດໄດ້ 62,78%, ສະເລ່ຍລາຍຮັບໃສ່ຫົວຄົນໄດ້ 1.889 ໂດລາສະຫະລັດ, ການເກັບລາຍຮັບເຂົ້າງົບປະມານ ປະຕິບັດໄດ້ 822,62 ຕື້ກີບ, ທຽບໃສ່ແຜນປີ ປະຕິບັດໄດ້ 56,5%, ທຽບໃສ່ໄລຍະດຽວກັນ ຫຼຸດລົງ 16,5%; ແຜນລາຍຈ່າຍ ປະຕິບັດໄດ້ 371,94 ຕື້ກີບ ເທົ່າກັບ 49,2% ຂອງແຜນປີ, ທຽບໃສໄລຍະດຽວກັນ ຫຼຸດລົງ 21,46%; ວຽກງານການລົງທຶນ ສາມາດຂົນຂວາຍຈາກທຸກແຫຼ່ງທຶນ 3.283,81 ຕື້ກີບ, ທຽບໃສ່ແຜນປີ ປະຕິບັດໄດ້ 57,12%, ທຽບໃສ່ໄລຍະດຽວກັນ ຫຼຸດລົງ 8,39% ໃນນັ້ນ ການລົງທຶນຂອງລັດ 16,97 ຕື້ກີບ, ທຶນຊ່ວຍເຫຼືອ (ODA) 125,92 ຕື້ກີບ, ການລົງທຶນເອກະຊົນ ພາຍໃນ ແລະ ຕ່າງປະເທດ 131,82 ຕື້ກີບ ແລະ ທຶນສິນເຊື່ອທະນາຄານ 3009,1 ຕື້ກີບ.​

​​​​​ໃນ ໂອກາດ ສຳຄັນຄັ້ງ ນີ້, ທ່ານ ນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນໍາ ຕໍ່ການນໍາ ແລະ ພະນັກງານຫຼັກແຫຼ່ງຂອງແຂວງ, ກ່ອນອື່ນ ທ່ານ ໄດ້ ກ່າວຍ້ອງຍໍ ຊົມເຊີຍຜົນສຳເລັດ ທີ່ ທາງແຂວງສາມາດປະຕິບັດໄດ້ ໃນໄລຍະ ທີ່ຜ່ານມາ, ລວມທັງ ຜົນງານການປະກອບສ່ວນຊ່ວຍລັດ ແລະ ການພັດທະນາສັງຄົມ ຂອງບັນດາພາກທຸລະກິດ, ພ້ອມກັນນັ້ນ ກໍ່ໄດ້ແຈ້ງ ໃຫ້ຊາບ ກ່ຽວກັບສະພາບການພົ້ນເດັ່ນ ທີ່ເກີດຂຶ້ນ ຢູ່ພາກພື້ນ, ສາກົນ ແລະ ພາຍໃນປະເທດ, ສະພາບ ການແຜ່ລະບາດ ຂອງ ພະຍາດໂຄວິດ-19 ຢູ່ ບັນດາປະເທດ, ຄວາມທ້າທາຍ ໃນການພັດທະນາເສດຖະກິດ-ສັງຄົມ ຂອງປະເທດເຮົາ, ຄວາມພະຍາຍາມ ໃນການບໍລິຫານວຽກງານ ຂອງລັດຖະບານ   ແລະ ອື່ນໆ. ອັນສຳຄັນ, ທ່ານ ນາຍົກລັດຖະມົນຕີ ໄດ້ສະເໜີ ແລະ ເນັ້ນ ໜັກ ໃຫ້ ອົງການ ປົກຄອງ ແຂວງ ຈຳປາສັກ ທຸກ ຂັ້ນ ແລະ ພາກສ່ວນທີ່ກ່ຽວຂ້ອງ ເອົາໃຈໃສ່ບາງບັນຫາຕື່ມ ເປັນຕົ້ນ ພ້ອມກັນສືບຕໍ່ຄົ້ນຄວ້າ ແລະ ພັດທະນາແຂວງຈຳປາສັກ ເຮັດໃຫ້ເສດຖະກິດຂະຫຍາຍຕົວ, ວຽກງານບໍລິການປະຊາຊົນນັບມື້ດີຂຶ້ນ, ຮັບປະກັນໄດ້ ວຽກງານປ້ອງກັນຊາດ-ປ້ອງກັນຄວາມສະຫງົບຮອບດ້ານ; ເອົາໃຈໃສ່ປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການ ແຜ່ ລະບາດ ຂອງ ພະຍາດ ໂຄ ວິດ-19 ຕາມ ຄະນະ ສະ ເພາະ ກິດ ວາງ ອອກ ແຕ່ລະ ໄລຍະ ຢ່າງ ເຂັ້ມງວດ, ພ້ອມທັງ ປັບປຸງແບບແຜນດຳລົງຊີວິດ ແລະ ວິທີຄິດ ໃຫ້ ມີ ການ ຫັນປ່ຽນ ດີ ຂຶ້ນ ກວ່າ ເກົ່າ, ປອດ ໄພ ກວ່າ ເກົ່າ ແລະ ເກີດ ປະ ໂຫຍ ດຫຼາຍ ກວ່າ ເກົ່າ ໃຫ້ແກ່ ຕົນ ເອງ, ການຈັດ ຕັ້ງ ແລະ ປະ ເທດ ຊາດ ໂດຍ ສະ ເພາະ ການ ເຮັດ ວຽກ ຢ່າງ ມີ ແຜນການ, ການ ປະຢັດ ມັດທະຍັດ, ການຈັດ ງານ ຕ່າງໆ ໃຫ້ ມີ ຄວາມ ເໝາະ ສົມ ກັບ ເງື່ອນ ໄຂ ແລະ ສະພາບ ການ, ທັງຫຼີກລ່ຽງ ການຈັດທີ່ມີລັກສະນະໂອ້ອວດ ຫຼື ທຸລະກິດ; ສົ່ງເສີມການທ່ອງທ່ຽວພາຍໃນ ແລະ ປັບປຸງໂຄງລ່າງພື້ນຖານການທ່ອງທ່ຽວ ເພື່ອຮອງຮັບວຽກງານໃນຕໍ່ໜ້າ ໃຫ້ໄດ້ຮັບຜົນດີ; ຊຸກຍູ້ ສົ່ງ ເສີມການ ຜະລິດຂອງ ປະຊາຊົນ ແລະ ພາກສ່ວນ ຕ່າງໆ ໃຫ້ ຫຼາຍ ຂຶ້ນ ເພື່ອ ຮັບປະກັນ ທາງ ດ້ານ ສະບຽງ ອາຫານ ໃຫ້ພຽງພໍ ກັບ ຄວາມ ຕ້ອງການ ພາຍ ໃນ ແລະ  ຫຼຸດຜ່ອນ ການ ນຳ ເຂົ້າ ຈາກ ຕ່າງປະ ເທດ ເປັນ ກ້າວໆ ໂດຍສຸມໃສ່ຜະລິດກະສິກຳສະອາດ, ປອດສານພິດ ແລະ ຕາມທ່າແຮງ ທີ່ປະຊາຊົນ ແຕ່ລະທ້ອງຖິ່ນ ມີມູນເຊື້ອ; ສົ່ງ ເສີມ ແລະ ອຳນວຍຄວາມສະດວກ ໃຫ້ແກ່ວຽກງານການລົງທຶນ ແລະ ການດຳເນີນທຸລະກິດ ເພື່ອຍາດແຍ່ງເອົາການລົງທຶນໃຫ້ຫຼາຍ, ໄປຄຽງຄູ່ກັບສົ່ງເສີມ ວິສາຫະກິດຂະໜາດນ້ອຍ-ຂະໜາດກາງ ໃຫ້ໄດ້ຮັບການພັດທະນາ ທັງປະລິມານ ແລະ ຄຸນນະພາບ, ມີຄວາມເຂັ້ມແຂງ ເປັນກ້າວໆ; ໃຫ້ບັນດາຂະແໜງການຂອງແຂວງ ສຸມໃສ່ປັບປຸງການບໍລິຫານວຽກງານຂອງຕົນ ໃຫ້ມີຄວາມກະທັດຮັດ, ວ່ອງໄວ, ທັນການ, ໂປ່ງໃສ ແລະ ບໍລິການຮັບໃຊ້ປະຊາຊົນ ຢ່າງແທ້ຈິງ. ນອກຈາກນັ້ນ ກໍ່ຍັງໄດ້ເນັ້ນໜັກໃຫ້ເອົາໃຈໃສ່ ມີສະຕິລະວັງຕົວ ໃນການຕ້ານ ແລະ ສະກັດກັ້ນບັນດາປະກົດການຫຍໍ້ທໍ້, ລວມທັງ ກົນອຸບາຍຕ່າງໆ ຂອງກຸ່ມຄົນທີ່ບໍ່ຫວັງດີ; ຄົ້ນຄວ້າ ຊ່ວຍເຫຼືອແຮງງານ ທີ່ກັບມາຈາກຕ່າງປະເທດ ທີ່ໄດ້ຮັບຜົນກະທົບ ຈາກການແຜ່ລະບາດ ຂອງພະຍາດໂຄວິດ-19 ໃຫ້ເຂົາເຈົ້າ ມີວຽກເຮັດງານທໍາ, ມີສີມື ແລະ ດຶງດູດເຂົາເຈົ້າ ໃຫ້ດໍາລົງຊີວິດ ແລະ ທຳມາຫາກິນ ຢູ່ ສປປ ລາວ ໃຫ້ໄດ້ຫຼາຍເທົ່າທີ່ຈະຫຼາຍ; ຫາກກິດຈະການໃດຂອງລັດ ສາມາດຫັນເປັນຮຸ້ນໄດ້ ກໍ່ໃຫ້ມີການຄົ້ນຄວ້າພິຈາລະນາ ບົນພື້ນຖານຮັບປະກັນຄວາມສະຫງົບ, ມີຄວາມຍືນຍົງ, ສ້າງຜົນປະໂຫຍດໃຫ້ແກ່ປະເທດຊາດ ແລະ ປະຊາຊົນ.

​​​​ສຳລັບການກະກຽມດຳເນີນກອງ ປະ ຊຸມ ໃຫຍ່ ຂອງອົງຄະນະພັກແຂວງ, ສຳ ຄັນ ແມ່ນບົດ ລາຍ ງານ ການ ເມືອງ ແລະ ແຜນ ພັດທະນາ ເສດຖະກິດ-ສັງຄົມ ຂອງ ແຂວງ 5 ປີ ຕໍ່ໜ້າ ແມ່ນ ຕ້ອງ ກົມກຽວ ໄປ ລວງ ດຽວ ກັນ, ການກຳນົດແຜນ ຕ້ອງໃຫ້ແທດເໝາະກັບທ່າແຮງບົ່ມຊ້ອນຕົວຈິງ, ມີຄວາມ ສາມາດ ຈັດ ຕັ້ງປະຕິບັດໄດ້ ແລະ ມີການຈັດລຽງບຸລິມະສິດ ບັນດາວຽກຈຸດສຸມ ແລະ ໂຄງການ ໃນແຕ່ລະຂົງເຂດວຽກງານ ຢ່າງລະອຽດຈະແຈ້ງ.

​​​​ການເຄື່ອນໄຫວຊຸກຍູ້ວຽກງານ ແຂວງຈຳປສັກ ຄັ້ງນີ້, ທ່ານນາຍົກລັດຖະມົນຕີ ແລະ ຄະນະ ຍັງໄດ້ໄປຢ້ຽມຢາມ ແລະ ຕິດຕາມເບິ່ງ ສະພາບການປິ່ນປົວຄົນເຈັບ ຢູ່ໂຮງໝໍແຂວງ, ພ້ອມທັງ ມອບເງິນຊ່ວຍເຫຼືອໂຮງໝໍດັ່ງກ່າວ; ໄດ້ໄປຢ້ຽມຢາມສູນພັດທະນາສີມືແຮງງານພາກໃຕ້ ແລະ ເຂດເສດຖະກິດພິເສດ ປາກເຊ-ຍີ່ປຸ່ນ ຕື່ມອີກ. ​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ