ທ່ານ ຮອງນາຍົກລັດຖະມົນຕີ ເຂົ້າຮ່ວມເປີດງານມະຫາກຳ ສີມືຫັດຖະກຳລາວ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 12 ຕ.ລ 2020 17:00

​​ໃນວັນທີ 12 ຕຸລາ 2020 ທີ່ ສູນຄ້າລາວ-ໄອເຕັກ ນະຄອນຫຼວງວຽງຈັນ, ສະມາຄົມຫັດຖະກຳລາວ ຮ່ວມກັບ ສະພາການຄ້າ ແລະ ອຸດສາຫະກໍາແຫ່ງຊາດ ໄດ້ເປີດງານມະຫາກໍາ ສີມືຫັດຖະກໍາລາວ ຄັ້ງທີ 19 ປະຈໍາປີ 2020 ພາຍໃຕ້ຄໍາຂວັນ “ສີໄມ້ລາຍມື ຄື ອຸທິຍານແຫ່ງການທ່ອງທ່ຽວຕາມຮອຍປູ່ຍ່າຕາຍາຍ”, ໂດຍການເປັນປະທານຂອງ ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ໃຫ້ກຽດເຂົ້າຮ່ວມ ຂອງທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ; ທ່ານ ນາງ ເຂັມມະນີ ພົນເສນາ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ, ພ້ອມດ້ວຍ ລັດຖະມົນຕີ, ທູຕານຸທູດ ແລະ ນັກທຸລະກິດ ເຂົ້າຮ່ວມ.


ທ່ານ ນາງ ສຸວິຕາ ປະເສີດ ປະທານສະມາຄົມຫັດຖະກໍາລາວ ກ່າວໃຫ້ຮູ້ວ່າ: ນັບແຕ່ຕົ້ນປີຈົນມາຮອດປະຈຸບັນ ປະເທດເຮົາ ພວມຢູ່ໃນສະພາບປ້ອງກັນ ການແຜ່ລະບາດຂອງພະຍາດໂຄວິດ-19 ອັນໄດ້ເປັນອຸປະສັກ ຕໍ່ການກະກຽມງານບຸນປະເພນີສະມາຄົມຫັດຖະກໍາລາວ (ສຫລ) ແຕ່ ສຫລ ກໍໄດ້ພ້ອມໃຈກັນຜ່ານຜ່າອຸປະສັກ ແລະ ຄວາມຫຍຸ້ງຍາກ ເພື່ອປະຕິບັດປະເພນີ ສືບທອດມໍລະດົກທາງປັນຍາ ແລະ ສີໄມ້ລາຍມື ມາຈາກປູ່ຍ່າຕາຍາຍ ດ້ວຍຮູບການຈັດຕັ້ງງານບຸນປາງໃຫຍ່ນີ້ຂຶ້ນ ເພື່ອກະຕຸ້ນເສດຖະກິດ, ລັດຖະບານໄດ້ມີໂຄງການ “ລາວທ່ຽວລາວ” ໃນງານ ພວກເຮົາຫວັງເອົາມາຕໍ່ຍອດເປັນ “ລາວຊື້ສິນຄ້າລາວ-ລາວສົ່ງເສີມລາວ” ຄາດວ່າຈະເປັນທາງອອກທີ່ເໝາະສົມ. ພ້ອມນັ້ນ, ການຈັດງານຄັ້ງນີ້ ຍັງເປັນການຈາລຶກເຖິງບຸນຄຸນ ຂອງປູ່ຍ່າຕາຍາຍ ສະໄໝດຶກດໍາບັນ ຊຶ່ງເພິ່ນໄດ້ສອນລູກສອນຫຼານດ້ວຍຕົນເອງ ເອົາກ້ອງຕະລ່າງເຮືອນເປັນຫ້ອງຮຽນຫ້ອງສອນ ຫຼັກສູດເພິ່ນນັ້ນມີຊື່ເອີ້ນວ່າ “ພາສາຫັດຖະກໍາ”. ນອກນັ້ນ, ຍັງເປັນການປະກາດໄປໃນໂຕ ໃຫ້ຊາວໂລກຮັບຮູ້ວ່າ ສີໄມ້ລາຍມື ອັນເປັນເອກະລັກໜຶ່ງດຽວ ທີ່ປູ່ຍ່າຕາຍາຍ ໄດ້ຖ່າຍທອດໃຫ້ລູກຫຼານ ຍັງຕໍ່ເນື່ອງມາເຖິງທຸກວັນນີ້. ການຈັດງານຄັ້ງນີ້, ຍັງເປັນການສະເຫຼີມສະຫຼອງ ວັນຫັດຖະກໍາແຫ່ງຊາດ 1 ພະຈິກ ທີ່ຈະມາເຖິງນີ້.

ທ່ານ ນາງ ສຸວິຕາ ປະເສີດ ກ່າວຕື່ມວ່າ: ໃນງານຄັ້ງນີ້,ໄດ້ມີສິນຄ້າຫັດຖະກໍາມາວາງສະແດງໃຫ້ຢ້ຽມຊົມ ແລະ ຈໍາໜ່າຍຫຼາຍກວ່າ 200 ຮ້ານ ຈາກທົ່ວປະເທດ ເປັນຕົ້ນ: ເຄື່ອງຫັດຖະກໍາຜ້າໄໝ, ຜ້າຝ້າຍພື້ນເມືອງ, ເຄື່ອງເງິນ, ວັດຖຸມີຄ່າ, ເຄື່ອງທອງເຫຼືອງ, ເຄື່ອງປັ້ນດິນເຜົາ, ເຄື່ອງຈັກສານຈາກໄມ້ປ່ອງ, ຫວາຍ ແລະ ເຄື່ອງຊົນເຜົ່າ. ພ້ອມນີ້, ພາຍໃນງານ ຍັງມີການສາທິດການຜະລິດສິນຄ້າ ຫັດຖະກໍາລາວ ແລະ ຝຶກອົບຮົມ, ການແຂ່ງຂັນຕົບແຕ່ງຮ້ານ, ການແຂ່ງຂັນອອກແບບຜະລິດຕະພັນໃໝ່ ເພື່ອຕໍ່ຍອດສີມີ ຂອງປູ່ຍ່າຕາຍາຍ, ສົ່ງເສີມຜະລິດຕະພັນລາວທ່ຽວລາວ, ກິດຈະກໍາອາພອນເພດອັນສວຍງາມ ແລະ ການສະແດງວັນນະຄະດີ ຫຼາຍປະເພດ. ພ້ອມນີ້, ຍັງມີການເສວະນາຫຼາຍຫົວຂໍ້ ເຊັ່ນ: ການນຸ່ງຖືແບບລາວ ສ້າງຄວາມຍືນຍົງໃຫ້ຊ່າງຫັດຖະກໍາ, ການເຂົ້າຫາແຫຼ່ງທຶນທຸລະກິດຂະໜາດນ້ອຍ ແລະ ກາງ, ການປົກປ້ອງການອອກແບບລາຍດັ່ງເດີມ ຈາກການລະເມີດລິຂະສິດຢູ່ລາວ ການສ້າງຄວາມອາດສາມາດ ໃນຂົງເຂດການຕະຫຼາດທາງອອນລາຍ ໃຫ້ແກ່ຜູ້ປະກອບການ SME, ການຫັນວິກິດໃຫ້ເປັນໂອກາດ ແກ່ສິນຄ້າຫັດຖະກໍາລາວ ແລະ ການຕະຫຼາດ, ມາດຕະຖານຜະລິດຕະພັນ-ການຫຸ້ມຫໍ່ ແລະ ການສ້າງແຮງຈູງໃຈ ໃຫ້ແກ່ຊາວໜຸ່ມ ຫັນມາເຫັນຄວາມສໍາຄັນ ໃນການນໍາໃຊ້ຜະລິດຕະພັນຫັດຖະກໍາລາວ. ງານມະຫາກໍາ ສີມືຫັດຖະກໍາລາວ ຄັ້ງນີ້ ຈະເປີດໄປຮອດ ວັນທີ 18 ຕຸລາ 2020.​


ແຫຼ່ງ: ຂ່າວສານປະເທດລາວ