ຜົນກອງປະຊຸມໃຫຍ່ຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 07 ຕ.ລ 2020 10:00

​​ກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງບໍ່ແກ້ວ ໄດ້ໄຂຂຶ້ນໃນວັນທີ 5-6 ຕຸລາ 2020 ໂດຍໃຫ້ກຽດເຂົ້າຮ່ວມຂອງສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ; ມີບັນດາສະຫາຍການນໍາຂັ້ນຂອງແຂວງ, ສູນກາງ, ພະນັກງານປະຕິວັດອາວຸໂສ ແລະ ຜູ້ແທນ ສົມບູນ 223 ສະຫາຍ, ຍິງ 26 ສະຫາຍ, ຊຶ່ງເປັນຕົວແທນ ໃຫ້ແກ່ສະມາຊິກພັກທົ່ວອົງຄະນະພັກແຂວງ ທັງໝົດ 9.191 ສະຫາຍ ເຂົ້າຮ່ວມ.


ກອງປະຊຸມ ຜູ້ແທນສົມບູນໄດ້ຕີລາຄາ ແລະ ຮັບຮອງເອົາ ບົດລາຍງານການເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ໃນໄລຍະ 5 ປີຜ່ານມາ ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8; ຜ່ານບົດສໍາຫຼວດການນໍາພາລວມ ຂອງຄະນະບໍລິຫານງານພັກແຂວງຊຸດເກົ່າ ສະໄໝທີ V ແລະ ໄດ້ສືບຕໍ່ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກແຂວງບໍ່ແກ້ວ ຊຸດໃໝ່ ຊຶ່ງມີບຸກຄະລາກອນ ທີ່ຄົບມາດຖານເງື່ອນໄຂລົງສະໝັກທັງໝົດ ຈຳນວນ 36 ສະຫາຍ ຍິງ 4 ສະຫາຍ, ໃນນີ້ ກອງປະຊຸມໃຫຍ່ ໄດ້ຄົ້ນຄວ້າ ແລະ ປ່ອນບັດເລືອກໄດ້ 31 ສະຫາຍ ຍິງ 4 ສະຫາຍ ໂດຍຖືກຕ້ອງຕາມກົດລະບຽບ ຂອງພັກປະຊາຊົນປະຕິວັດລາວກຳນົດໄວ້. ຜ່ານການດຳເນີນກອງປະຊຸມຄັ້ງປະຖົມມະລືກຂອງ ຄະນະບໍລິຫານງານພັກແຂວງບໍ່ແກ້ວ ຄັ້ງທີ VI ໄດ້ເລືອກຕັ້ງເອົາຄະນະປະຈຳພັກແຂວງ ຈຳນວນ  9 ສະຫາຍ ໂດຍໄດ້ເຫັນດີເປັນເອກະພາບເລືອກເອົາ ສະຫາຍ ບົວຄົງ ນາມມະວົງ ເປັນເລຂາຄະນະບໍລິຫານງານພັກແຂວງຊຸດໃໝ່, ສະຫາຍ ຈອມສີ ລັດຕະນະປັນ ແລະ ສະຫາຍ ເພັງສອນ ແກ້ວວິໄລ ເປັນຮອງເລຂາຄະນະບໍລິຫານງານພັກແຂວງ ແລະ ໄດ້ເລືອກຕັ້ງເອົາ ສະຫາຍ ສຸກຂະ ຫຼຽນທອງຄໍາ ເປັນປະທານຄະນະກວດກາ, ສະຫາຍ ເປົາແກ້ວ ພູມສະຫວັນ, ສະຫາຍ ນາງ ສຸ່ງ ແກ້ວໂພໄຊ ແລະ ສະຫາຍ ໜໍ່ຄໍາ ນົງສຸວັນ ເປັນຮອງປະທານຄະນະກວດກາ. ພ້ອມນັ້ນ, ກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນ ໄປເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງສູນກາງພັກ ທີ່ຈະຈັດຂຶ້ນໃນຕໍ່ໜ້າ ຈໍານວນ 14 ສະຫາຍ, ຍິງ 2 ສະຫາຍ ແລະ ຜູ້ແທນສໍາຮອງ 2 ສະຫາຍ.


ໃນໂອກາດທີ່ມີຄວາມໝາຍນີ້, ສະຫາຍ ບຸນທອງ ຈິດມະນີ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມຄັ້ງນີ້ໂດຍໄດ້ເນັ້ນໜັກ ໃຫ້ຄະນະບໍລິຫານງານພັກແຂວງຊຸດໃໝ່ ເອົາໃຈໃສ່ 6 ບັນຫາ ດັ່ງນີ້:

ໜຶ່ງ: ສືບຕໍ່ນໍາພາ-ຊີ້ນໍາ ການຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ, ໂຄງການ ແລະ ສ້າງເປັນນິຕິກໍາລະອຽດ ເລີ່ມແຕ່ການຈັດຕັ້ງເຜີຍແຜ່, ເຊື່ອມຊຶມ ໃນຄະນະບໍລິຫານງານພັກແຂວງ ລົງໄປເຖິງຄະນະພັກແຕ່ລະຂັ້ນ, ສະມາຊິກພັກ, ພະນັກງານຢູ່ບັນດາເມືອງ, ຂະແໜງການ ແລະ ຮາກຖານຕ່າງໆ ກໍຄືປະຊາຊົນບັນດາເຜົ່າໃຫ້ເລິກເຊິ່ງ ແລະ ທົ່ວເຖິງ, ເພື່ອສ້າງຄວາມຮັບຮູ້ເຂົ້າໃຈ ທີ່ເປັນເອກະພາບກັນທາງດ້ານທັດສະນະ ແລະ ການກະທໍາຕົວຈິງ, ເຮັດໃຫ້ສະມາຊິກພັກ, ພະນັກງານ, ທະຫານຕໍາຫຼວດ ແລະ ປະຊາຊົນມີຄວາມຮັບຮູ້, ເຂົ້າໃຈ ແລະ ເຊື່ອມຊຶ່ມ, ກໍາແໜ້ນຕໍ່ທິດທາງ, ແຜນນະໂຍບາຍ, ຄາດໝາຍສູ້ຊົນຕ່າງໆ ແລະ ມີຄວາມຕື່ນຕົວ ເປັນເຈົ້າການເຂົ້າຮ່ວມ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ ຢ່າງເປັນຂະບວນການທີ່ແຂງແຮງ, ຕໍ່ເນື່ອງ, ມີປະສິດທິຜົນ.

ສອງ: ພາຍຫຼັງສໍາ ເລັດກອງປະຊຸມນີ້ ໃຫ້ຮີບຮ້ອນແບ່ງວຽກ-ແບ່ງງານ, ແບ່ງຄວາມຮັບຜິດຊອບ ພາຍໃນຄະນະບໍລິຫານງານພັກແຂວງ, ຄະນະປະຈໍາພັກ ແຂວງໃຫ້ລະອຽດ, ຈະແຈ້ງ, ບໍ່ວ່າວຽກນັ້ນຈະແມ່ນຂະແໜງການໃດ, ຂົງເຂດ ຫຼື ທ້ອງຖິ່ນໃດ ເມື່ອໝູ່ຄະນະ, ການຈັດຕັ້ງ ກໍຄືຂັ້ນເທິງມອບໝາຍໃຫ້ໄປຮັບຜິດຊອບ ກໍບໍ່ມີສິດຂັດຂ້ອງ, ຕ້ອງເຊີດຊູຄວາມເປັນເຈົ້າການຕໍ່ໜ້າທີ່ການເມືອງ, ທຸ້ມເທເຫື່ອແຮງ, ສະຕິປັນຍາ, ຄວາມຮູ້-ຄວາມສາມາດ, ມີຄວາມເສຍສະຫຼະ ເພື່ອເຮັດສໍາເລັດໜ້າທີ່ ທີ່ຖືກມອບໝາຍ.

ສາມ: ບັນດາສະຫາຍຄະນະບໍລິຫານງານພັກແຂວງ ຕ້ອງຢຶດໝັ້ນ ແລະ ປະຕິບັດຢ່າງເຂັ້ມງວດ ບັນດາຫຼັກການ, ລະບອບແບບແຜນວິທີນຳພາຂອງພັກ ແລະ ມີຄວາມຮັບຜິດຊອບໂດຍກົງ ຕໍ່ຜົນໄດ້ຜົນເສຍຂອງວຽກງານທີ່ຖືກມອບໝາຍ; ອັນທີ່ຄວນເອົາໃຈໃສ່ທີ່ສຸດ ຕ້ອງເດັດຂາດແກ້ໄຂຕໍ່ການປະພຶດແບບອາດຍາສິດ, ສໍ້ລາດບັງຫຼວງ, ເສື່ອມທາດຂາດຄຸນ; ສ້າງໄດ້ຄວາມເຊື່ອໝັ້ນ ແລະ ສັດທາຂອງປະຊາຊົນ ຕໍ່ການນຳພາຂອງພັກ; ເພີ່ມທະວີແບບແຜນນໍາພາອັນເປັນມູນເຊື້ອຂອງພັກ ນັ້ນແມ່ນແບບແຜນຕິດແທດກັບຮາກຖານປະຊາຊົນ, ອີງໃສ່ກຳລັງແຮງຂອງປະຊາຊົນ ແລະ ເຮັດທຸກສິ່ງທຸກຢ່າງ ເພື່ອຜົນປະໂຫຍດລວມ ຂອງປະເທດຊາດ ແລະ ປະຊາຊົນ; ໃນເງື່ອນໄຂໃໝ່ນີ້ ມູນເຊື້ອດັ່ງກ່າວ ຕ້ອງສະແດງອອກໃນການຫັນການນຳພາຊີ້ນຳ, ຫັນພະນັກງານລົງສູ່ຮາກຖານ ເພື່ອນຳພາປະ ຊາຊົນພັດທະນາ, ສ້າງການຫັນປ່ຽນໃໝ່ຢູ່ຮາກຖານ; ຕ້ອງປັບປຸງ ແລະ ເພີ່ມທະວີແບບແຜນນຳພາ ທີ່ມີການແບ່ງງານ, ການມອບໝາຍຄວາມຮັບຜິດຊອບ ຢ່າງຈະແຈ້ງຂາດຕົວ, ສົມທົບຢ່າງກົມກຽວລະຫວ່າງບົດບາດ ແລະ ຄວາມສາມາດ ນຳພາຂອງໝູ່ຄະນະກັບບົດ ບາດ ແລະ ຄວາມຮັບຜິດຊອບຂອງບຸກຄົນໃນຄະນະ; ກຳຈັດປັດເປົ່າທັດສະນະຮູບການ, ອວດອົ່ງທະນົງຕົວ, ບົ່ງການອ້າຍດຽວ ແລະ ທັດສະນະເອື່ອຍອີງໃສ່ແຕ່ໝູ່ຄະນະ, ແກ້ຕົວ, ຫຼີກລ້ຽງຄວາມຮັບຜິດຊອບ; ພ້ອມນັ້ນ ກໍຕ້ອງຕີຖອຍທ່າອຽງ ແລະ ຄວາມພະຍາຍາມສວຍໃຊ້ແບບແຜນນຳພາເປັນໝູ່ຄະນະ ໃຫ້ກາຍເປັນການສ້າງກຸ່ມ, ສ້າງພວກເພື່ອມີບົດບາດຄອບງຳໃນການນຳພາ ຫຼື ຕົກລົງບັນຫາຕ່າງໆທີ່ຂັດກັບກົດໝາຍ ແລະ ມະຕິ, ຄຳສັ່ງ ຂອງພັກ-ລັດ.

ສີ່: ບັນດາສະຫາຍ ຕ້ອງສືບຕໍ່ຕັ້ງໜ້າ ໃນການຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ ເປັນແບບຢ່າງນໍາໜ້າ ດ້ານຄວາມຈົ່ງຮັກພັກດີ ແລະ ຄວາມຊື່ສັດບໍລິສຸດ ຕໍ່ອຸດົມຄະຕິຂອງພັກ ແລະ ຜົນປະໂຫຍດຂອງປະເທດຊາດ, ມີຄວາມສາມັກຄີຮັກແພງ ແລະ ມີຄວາມຈິງໃຈ ຕໍ່ໝູ່ຄະນະ ແລະ ຊ່ວຍເຫຼືອກໍ່ສ້າງໝູ່ຄະນະ ໃຫ້ມີຄວາມເຂັ້ມແຂງ; ດຳລົງຊີວິດແບບປອດໃສຂາວສະອາດ, ດຸໝັ່ນຊື່ສັດ, ຕັ້ງໜ້າຄົ້ນຄວ້າຮ່ຳຮຽນ ເພື່ອຍົກລະດັບດ້ານຕ່າງໆຂອງຕົນ ໃຫ້ສູງຂຶ້ນຢ່າງບໍ່ຢຸດຢັ້ງ, ກໍາແໜ້ນ ແລະ ຮູ້ຜັນຂະຫຍາຍແນວທາງ, ແຜນນະໂຍບາຍ, ມະຕິ, ຄໍາສັ່ງ ໃຫ້ເປັນແຜນການ, ເປັນໂຄງການວຽກງານລະອຽດ ທີ່ສອດຄ່ອງກັບຈຸດພິເສດ, ທ່າແຮງບົ່ມຊ້ອນ, ສະພາບຂອງຂະແໜງການ, ທ້ອງຖິ່ນຕົນ ທັງຮູ້ນຳພາຈັດຕັ້ງປະຕິບັດ ແນວທາງແຜນການທີ່ວາງອອກ ໃຫ້ເກີດດອກອອກຜົນ ໂດຍສະແດງອອກໃນວຽກງານຕົວຈິງ.

ຫ້າ: ເຊີດຊູຄວາມເປັນແບບຢ່າງ ໃນການດໍາລົງຊີວິດທີ່ປອດໃສ, ປະຢັດ, ຕ້ານການຟຸມເຟືອຍ, ເປັນແບບຢ່າງໃນການ ປະຕິບັດກົດລະບຽບພັກ, ກົດໝາຍ ແລະ ລະບຽບການຕ່າງໆຂອງລັດ; ເອົາໃຈໃສ່ສຶກສາອົບຮົມ, ຄຸ້ມຄອງລູກເມຍ, ຄອບຄົວຍາດ ພີ່ນ້ອງໃຫ້ເປັນແບບຢ່າງ ໃນການດໍາລົງຊີວິດທີ່ກ້າວໜ້າ, ບໍ່ໃຫ້ເຮັດໃນສິ່ງທີ່ຈະນໍາເອົາຜົນເສຍຫາຍ ໃຫ້ແກ່ໜ້າທີ່ວຽກງານລວມ ກໍຄືກະທົບ ຕໍ່ບົດບາດ, ຄວາມເຊື່ອໝັ້ນຕໍ່ຕົນເອງ; ພ້ອມນັ້ນຕ້ອງນໍາພາຊຸກຍູ້ໃຫ້ການຈັດຕັ້ງ, ພະນັກງານ ແລະ ປະຊາຊົນໃນຂອບເຂດທີ່ຕົນຮັບຜິດຊອບ, ມີທັດສະນະ ແລະ ການກະທໍາທີ່ຖືກຕ້ອງ, ຕັ້ງໜ້າ ຕ້ານບັນດາປະກົດການຫຍໍ້ທໍ້ລ່ວງລະເມີດກົດໝາຍ ແລະ ອື່ນໆ.

ຫົກ: ສືບຕໍ່ເສີມຂະຫຍາຍມູນເຊື້ອແຫ່ງຄວາມສາມັກຄີ, (ຄວາມສາມັກຄີພາຍໃນຄະນະພັກ ລະຫວ່າງ ຄະນະພັກ ກັບ ອາດີດຄະນະພັກ, ພະນັກງານອາວຸໂສ, ຄວາມສາມັກຄີ ລະຫວ່າງພະນັກງານສະມາຊິກພັກ ແລະ ກັບມະຫາຊົນ) ຄວາມເປັນເອກະພາບພາຍໃນ ແລະ ຄວາມສາມັກຄີປອງດອງບັນດາເຜົ່າໃນທົ່ວແຂວງ ໃຫ້ແໜ້ນແຟ້ນ, ທຸກເຜົ່າມີຄວາມສະເໜີພາບກັນຕໍ່ໜ້າກົດໝາຍ ເຊີດຊູຊ່ວຍເຫຼືອເຊິ່ງກັນ ແລະ ກັນ ບົນພື້ນຖານແນວທາງຂອງພັກ, ເຄົາລົບເຊິ່ງກັນ ແລະ ກັນ; ຕັ້ງໜ້າປຸກລະດົມທຸກກໍາລັງແຮງຂອງທົ່ວປວງຊົນປະ ກອບສ່ວນເຂົ້າຮ່ວມໃນການປົກປັກຮັກສາ ແລະ ພັດທະນາແຂວງຢ່າງໜັກແໜ້ນ


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ