ນວ ດໍາເນີນຊີວິດການເມືອງທ້າຍສະໄໝ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 06 ຕ.ລ 2020 15:00

​ກອງປະຊຸມດໍາເນີນຊີວິດການເມືອງທ້າຍສະໄໝ ແລະ ທາບທາມບຸກຄະລາກອນ ເພື່ອສະໝັກຮັບເລືອກຕັ້ງເປັນຄະນະບໍລິຫານງານພັກນະຄອນຫຼວງວຽງຈັນ ສະໄໝທີ VII ຮອບທີ 3 ຈັດຂຶ້ນວັນທີ 5-7 ຕຸລາ 2020 ທີ່ສໍານັກງານປົກຄອງນະຄອນຫຼວງວຽງຈັນ (ນວ), ໂດຍການເປັນປະທານຂອງສະຫາຍ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ, ເລຂາຄະນະພັກ, ເຈົ້າຄອງນະຄອນຫຼວງວຽງຈັນ; ໃຫ້ກຽດເຂົ້າຮ່ວມຂອງສະຫາຍ ທອງລຸນ ສີສຸລິດ, ກໍາມກະການກົມການເມືອງສູນກາງພັກ, ນາຍົກລັດຖະມົນຕີ; ມີບັນດາຄະນະປະຈໍາ, ກໍາມະການພັກ, ຜູ້ຕາງໜ້າຄະນະຈັດຕັ້ງສູນກາງພັກ, ອົງການກວດກາສູນກາງພັກ ແລະ ຫ້ອງວ່າການສູນກາງພັກ ເຂົ້າຮ່ວມ.


ການຈັດຕັ້ງດໍາເນີນຊີວິດການເມືອງຄັ້ງນີ້ ມີຄວາມໝາຍສໍາຄັນຫຼາຍ ແລະ ມີຄວາມຈໍາເປັນ ສໍາລັບຄະນະບໍລິ ຫານງານພັກ ນະຄອນຫຼວງວຽງຈັນ ໃນຖານະເປັນພັກກໍາອໍານາດ ຊຶ່ງເປັນການເສີມຂະຫຍາຍມູນເຊື້ອອັນດີ, ຜົນງານອັນປະເສີດຂອງພັກ, ພ້ອມກັນດັດແປງແກ້ໄຂບັນດາຈຸດອ່ອນ, ຂໍ້ຄົງຄ້າງ, ສິ່ງທ້າທາຍຕ່າງໆ ທີ່ອົງຄະນະພັກນະຄອນ ຫຼວງວຽງຈັນ ກໍາລັງປະເຊີນຢູ່ໃນປະຈຸບັນ ໃຫ້ມີການປ່ຽນແປງໃໝ່ຢ່າງຕັ້ງໜ້າ, ພ້ອມນັ້ນ ຍັງເປັນການເສີມຂະຫຍາຍປະຊາທິປະໄຕພາຍໃນພັກຕື່ມອີກ.


ສະຫາຍ ສິນລະວົງ ຄຸດໄພທູນ ໄດ້ລາຍງານຜົນການກະກຽມກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນວ ແລະ ຄວາມພ້ອມຂອງບັ້ນດໍາເນີນຊີວິດການເມືອງໂດຍຫຍໍ້ວ່າ: ອົງຄະນະພັກ ນວ ໄດ້ກະກຽມດ້ານເນື້ອໃນຂອງກອງປະຊຸມມາໄດ້ປີກວ່າ ຮອດປະຈຸບັນ ຮ່າງບົດລາຍງານການເມືອງ ໄດ້ປັບປຸງເປັນສະບັບທີ 4 ໂດຍຈິດໃຈສໍາຄັນເນື້ອໃນຂອງຮ່າງດັ່ງກ່າວແມ່ນ “ຍົກສູງຄວາມສາມາດຈັດຕັ້ງນໍາພາຂອງອົງຄະນະພັກ ເພີ່ມທະວີຄວາມສັກສິດ-ປະສິດທິຜົນຂອງການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ; ເຕົ້າໂຮມທຸກກໍາລັງແຮງຂອງສັງຄົມ ສ້າງການຫັນປ່ຽນຢ່າງແຂງແຮງ ໃນການພັດທະນານະຄອນຫຼວງວຽງຈັນ ໃຫ້ສົມກັບເປັນເມືອງຫຼວງຂອງປະເທດ, ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນສູງຂຶ້ນ”; ດ້ານບຸກຄະລາກອນ ໄດ້ສໍາເລັດກອງປະຊຸມໃຫຍ່ຂັ້ນຂອງຕົນ ຊຶ່ງມີ 11 ອົງຄະນະພັກ, 95 ຄະນະພັກຮາກ, 1.182 ໜ່ວຍພັກ ແລະ ໜ່ວຍພັກທີ່ຂຶ້ນກັບ, ມີສະມາຊິກທັງໝົດ 21.806 ສະຫາຍ ຍິງ 6.787 ສະຫາຍ, ພ້ອມນັ້ນ ກໍ່ໄດ້ທາບທາມບຸກຄະລາກອນ ໃຫ້ແກ່ກອງປະຊຸມໃຫຍ່ ຄັ້ງທີ VII ໂດຍດໍາເນີນມາແລ້ວ 2 ຮອບ ແລະ ຮອບທີ 3 ຈະດໍາເນີນໃນວັນທີ 9 ຕຸລາທີ່ຈະມາເຖິງນີ້ ຈະມີຜູ້ແທນເຂົ້າຮ່ວມທັງໝົດ 356 ສະຫາຍ ຈະຄັດເລືອກຈາກ 53 ສະຫາຍ ໃຫ້ຍັງເຫຼືອ 46 ສະຫາຍ, ນອກນີ້ ດ້ານຂະບວນການ ໄດ້ເລັ່ງໃສ່ການສ້າງຫັນປ່ຽນແຕ່ຫົວທີໃນຫຼາຍຂົງເຂດ, ໂດຍລວມແລ້ວ ມາຮອດປະຈຸ ບັນຂະບວນການທຸກດ້ານ ແມ່ນໄດ້ດໍາເນີນໄປຢ່າງຟົດຟື້ນ ແລະ ມີຄວາມພ້ອມໂດຍພື້ນຖານ ເພື່ອກ້າວເຂົ້າສູ່ການດໍາເນີນກອງປະຊຸມໃຫຍ່ ຂອງອົງຄະນະພັກນະຄອນຫຼວງວຽງຈັນ ຢ່າງເປັນທາງການ.


ໂອກາດນີ້, ສະຫາຍ ທອງລຸນ ສີສຸລິດ ກໍ່ໄດ້ມີຄໍາເຫັນໃຫ້ທິດຊີ້ນໍາ ຊຶ່ງສະຫາຍ ໄດ້ຍົກໃຫ້ເຫັນສະພາບຈຸດພິເສດການຄຸ້ມຄອງພົນລະເມືອງ ທີ່ມີໂຄງປະກອບແຕກຕ່າງກັບແຂວງ ແລະ ເມືອງ, ເນື່ອງຈາກວ່າ ເປັນເມືອງເອກຂອງປະເທດ ພ້ອມນັ້ນ ການເປັນການນໍາຢູ່ນະຄອນຫຼວງວຽງຈັນ ແມ່ນເຕັມໄປດ້ວຍຄວາມສໍາຄັນ ແລະ ເປັນແບບຢ່າງໃນການຊີ້ນໍາພາ ເປັນຜູ້ອໍານວຍຄວາມສະດວກດ້ານຕ່າງໆ ເຮັດໃຫ້ການດໍາລົງຊີວິດ ແລະ ທຳມາຫາກິນຂອງປະຊາຊົນ ມີຄວາມສະດວກສະບາຍຂຶ້ນເປັນກ້າວໆ, ດັ່ງນັ້ນຢູ່ໃນບົດສໍາຫຼວດການນໍາພາລວມ ຕ້ອງໄດ້ຕີລາຄາຮອບດ້ານ ຈຸດດີ ຜົນງານ ແລະ ຜົນໄດ້ຮັບ ຂອງການນໍາພາໄລຍະຜ່ານ ມາເປັນຫຼັກທີ່ສາມາດຜ່ານຜ່າມາໄດ້ ບົນພື້ນຖານດັ່ງກ່າວ ເຮັດມາແລ້ວຍັງມີຈຸດໃດບໍ່ໄດ້ຮັບຜົນໃຫ້ຊອກຫາສາຍເຫດຂອງຂໍ້ຄົງຄ້າງ ທີ່ຍັງບໍ່ສາມາດຈັດຕັ້ງປະຕິບັດໄດ້ ເປັນອັນລະອຽດໃຫ້ຈະແຈ້ງ ເພື່ອເປັນບົດຮຽນໃຫ້ຄະນະພັກນະຄອນຫຼວງວຽງຈັນ ຊຸດຕໍ່ໄປ ໄດ້ມີການປັບປຸງປ່ຽນແປງຢ່າງຕັ້ງໜ້າ, ສ່ວນການຕີລາຄາສໍາຫຼວດບຸກຄົນ ໃຫ້ພ້ອມກັນຕີລາຄາຢ່າງກົງໄປກົງມາ, ແຕ່ລະສະຫາຍຕ້ອງກ້າສະເໜີຕົນເອງ ມີຈຸດດີ ແລະ ຈຸດອ່ອນ, ຂໍ້ຂາດຕົກບົກຜ່ອງ, ຂໍ້ຄົງຄ້າງຫຍັງແດ່ ໃນນີ້ ໃຫ້ເນັ້ນໃສ່ດ້ານຄຸນທາດການເມືອງ,  ຄຸນສົມບັດສິນທໍາປະຕິວັດ, ຄວາມຮູ້ຄວາມສາມາດ, ແບບແຜນການດໍາລົງຊີວິດ, ແບບແຜນການນໍາພາ, ວິທີເຮັດວຽກ ແລະ ສຸຂະພາບ, ຊອກໃຫ້ເຫັນດ້ານດີ, ດ້ານຕັ້ງໜ້າ, ຄວາມພະຍາຍາມ ແລະ ຄວາມຕັດສິນໃຈ ຂອງແຕ່ລະສະຫາຍ ດ້ວຍຄວາມຮັບຜິດຊອບ ຕາມພາລະບົດບາດ, ມະຕິຄໍາສັ່ງ ໄດ້ບັນລຸຜົນແນວໃດ ເພື່ອເປັນແບບຢ່າງໃຫ້ໝູ່ຄະນະ, ປະຊາຊົນ ແລະ ພະນັກງານ-ລັດຖະກອນ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ