ສະຫາຍນາຍົກລັດຖະມົນຕີ ໃຫ້ກຽດເຂົ້າຮ່ວມ ກອງປະຊຸມໃຫຍ່ ອົງຄະນະພັກແຂວງຫຼວງພະບາງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 02 ຕ.ລ 2020 11:00

        ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງຫຼວງພະບາງ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ຂອງວັນທີ 2 ຕຸລາ 2020 ທີ່ຫ້ອງປະຊຸມໃຫຍ່ ຫ້ອງວ່າການປົກຄອງແຂວງ, ໂດຍການເປັນປະທານ ຂອງສະຫາຍ ຄຳຂັນ ຈັນທະວີສຸກ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງພະບາງ ແລະ ໃຫ້ກຽດເຂົ້າຮ່ວມ ຂອງສະຫາຍ ທອງລຸນສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ສະຫາຍ ສົມສະຫວາດ ເລັ່ງສະຫວັດ, ທີ່ປຶກສາຄະນະບໍລິຫານງານສູນກາງພັກ; ຜູ້ຕາງໜ້າຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ ແລະ ຄະນະກວດກາສູນກາງພັກ; ມີຜູ້ແທນສົມບູນ ຈຳນວນ 264 ສະຫາຍ, ຍິງ 30 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ໃນທົ່ວແຂວງ ຈຳນວນ 23.909 ສະຫາຍ ພ້ອມດ້ວຍ ແຂກຖືກເຊີນ ເຂົ້າຮ່ວມ.

ພາຍຫຼັງ ສະຫາຍ ຄຳຂັນ ຈັນທະວີສຸກ ໄດ້ຂຶ້ນກ່າວເປີດກອງປະຊຸມຢ່າງເປັນທາງການ, ສະຫາຍໄດ້ສືບຕໍ່ຜ່ານຮ່າງລາຍງານການເມືອງທັງສອງພາກ. ສຳລັບພາກທຳອິດ ກໍ່ຄືການຕີລາຄາໝາກຜົນ ຂອງການຈັດຕັັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ເຫັນວ່າ: ຕະຫຼອດໄລຍະ 5 ປີຜ່ານມາ ທົ່ວແຂວງ ສືບຕໍ່ມີສະຖຽນລະພາບທາງດ້ານການເມືອງອັນໜັກແໜ້ນ, ສັງຄົມ ສືບຕໍ່ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ດີກວ່າເກົ່າ, ປະກົດການຫຍໍ້ທໍ້ໃນສັງຄົມ ຫຼຸດລົງເປັນກ້າວໆ; ເສດຖະກິດ ສືບຕໍ່ຂະຫຍາຍຕົວ ຢ່າງຕໍ່ເນື່ອງ ຕາມທິດທີ່ກໍານົດໄວ້, ຊີວິດການເປັນຢູ່ ຂອງປະຊາຊົນ ກໍໄດ້ຮັບການປົວແປງ ນັບມື້ນັບດີຂຶ້ນ, ທຽບໃສ່ດຳລັດ 309/ນຍ ຈໍານວນຄອບຄົວ ແລະ ບ້ານທຸກຍາກໄດ້ຫຼຸດລົງ, ຄອບຄົວ ແລະ ບ້ານພັດທະນາ ໄດ້ເພີ່ມຂຶ້ນ; ພື້ນຖານໂຄງລ່າງຫຼາຍດ້ານ ໄດ້ຮັບການປັບປຸງ ແລະ ກໍ່ສ້າງຂຶ້ນໃໝ່ຈຳນວນໜຶ່ງ ໂດຍສະເພາະ ພື້ນຖານໂຄງລ່າງ ຄົມມະນາຄົມຂົນສົ່ງ, ກະສິກຳ, ພະລັງງານ ແລະ ບໍ່ແຮ່, ອຸດສາຫະກຳ ແລະ ການຄ້າ, ການສຶກສາ, ສາທາລະນະສຸກ, ການທ່ອງທ່ຽວ ແລະ ອື່ນໆ ລ້ວນແຕ່ມີການເຕີບໃຫຍ່ຂະຫຍາຍຕົວກວ່າເກົ່າ.
ສ່ວນພາກທີສອງ ກໍ່ຄືທິດທາງລວມ, ຄາດໝາຍສູ້ຊົນ, ທິດທາງໜ້າທີ່ຈຸດສຸມ ໃນການນໍາພາຂອງອົງຄະນະພັກ ໃນ 5 ປີຕໍ່ໜ້າ ແມ່ນຮັບປະກັນໃຫ້ແຂວງຫຼວງພະບາງ ມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍ ດີກວ່າເກົ່າ; ສ້າງກຳລັງປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມໜັກແໜ້ນ, ເຂັ້ມແຂງ ແລະ ທັນສະໄໝ ເທື່ອລະກ້າວ;  ຮັບປະກັນໃຫ້ເສດຖະກິດ ຂະຫຍາຍຕົວຢ່າງຕໍ່ເນື່ອງ, ຖືກທິດ ແລະ ໝັ້ນທ່ຽງ, ການຜະລິດສິນຄ້າ ກະສິກຳສະອາດ ຕິດພັນກັບການນໍາໃຊ້ວິທະຍາສາດ, ເຕັກນິກ, ເຕັກໂນໂລຊີ ເຂົ້າໃສ່ການຜະລິດໃຫ້ກວ້າງຂວາງ ແລະ ຂະຫຍາຍຕົວຢ່າງແຂງແຮງ, ຮັບປະກັນໃຫ້ກຸ້ມຕົນເອງ ທາງດ້ານສະບຽງອາຫານ; ສູ້ຊົນເຮັດໃຫ້ອັດຕາສ່ວນ ຄອບຄົວທຸກຍາກ, ບ້ານທຸກຍາກ ແລະ ເມືອງທຸກຍາກຫຼຸດລົງ, ສ້າງບ້ານພັດທະນາໃຫ້ເພີ່ມຂຶ້ນ; ຂຸດຄົ້ນລາຍຮັບເຂົ້າງົບປະມານ ໃຫ້ເພີ່ມຂຶ້ນ, ຮັບປະກັນໃຫ້ກຸ້ມຕົນເອງ ທາງດ້ານເງິນເດືອນ ແລະ ເງິນບໍລິຫານກົງຈັກ ຈຳນວນໜຶ່ງ; ເຮັດໃຫ້ຫົວໜ່ວຍທຸລະກິດຂອງລັດ ມີຄວາມເຂັ້ມແຂງ, ເຄື່ອນໄຫວມີຜົນກໍາໄລ, ເຮັດໃຫ້ທຸລະກິດຂະໜາດນ້ອຍ-ຂະໜາດກາງ, ເສດຖະກິດຮ່ວມມື ຂອງປະຊາຊົນ ມີການຂະຫຍາຍຕົວ ແລະ ຍືນຍົງ; ຮັບປະກັນໃຫ້ທຸກບ້ານ ມີເສັ້ນທາງລົດເຂົ້າເຖິງ; ເຮັດໃຫ້ອັດຕາການຊົມໃຊ້ໄຟຟ້າ, ນ້ຳປະປາຂອງຄອບຄົວ ເພີ່ມຂຶ້ນ; ຂຶ້ນທະບຽນ ແລະ ອອກໃບຕາດິນ ໃຫ້ໄດ້ຕາມຄາດໝາຍ; ເພີ່ມເນື້ອທີ່ປົກຫຸ້ມ ຂອງປ່າໄມ້ ໃຫ້ໄດ້ຕາມແຜນ; ຍົກລະດັບຄຸນນະພາບການສຶກສາ ໃຫ້ສູງຂຶ້ນ, ສູ້ຊົນບັນລຸຕົວຊີ້ວັດ ດ້ານການສຶກສາ ແລະ ມີການຝຶກອົບຮົມວິຊາຊີບ ເພື່ອສະໜອງແຮງງານ ໃຫ້ສັງຄົມ; ຮັບປະກັນໃຫ້ວຽກງານກິລາ ຂະຫຍາຍຕົວຢ່າງແຂງແຮງ; ຍົກລະດັບຄຸນນະພາບ ການບໍລິການສາທາລະນະສຸກ ໃຫ້ສູງຂຶ້ນ ແລະ ຫັນເປັນທັນສະໄໝເທື່ອລະກ້າວ, ສູ້ຊົນໃຫ້ບັນລຸຕົວຊີ້ວັດ ດ້ານສາທາລະນະສຸກ; ສູ້ຊົນຍົກລະດັບ ວຽກງານຖະແຫຼງຂ່າວ-ສື່ມວນຊົນ ຕາມທິດຫັນເປັນທັນສະໄໝ; ວັດທະນະທຳ, ຮີດຄອງປະເພນີອັນດີງາມ ໄດ້ຮັບການປົກປັກຮັກສາ ແລະ ສົ່ງເສີມ ຢ່າງແຂງແຮງ ຕິດພັນກັບການປົກປັກຮັກສາ ເມືອງມໍລະດົກໂລກ ໃຫ້ຄົງຄຸນຄ່າ ແລະ ຍືນຍົງ; ປັບປຸງຍົກລະດັບຄຸນນະພາບ ວຽກງານການບໍລິການທ່ອງທ່ຽວ ໃຫ້ໄດ້ມາດຕະຖານສາກົນ ເທື່ອລະກ້າວ ເຮັດໃຫ້ຈຳນວນນັກທ່ອງທ່ຽວ ເພີ່ມຂຶ້ນ; ຮັບປະກັນ ໃຫ້ສີມືແຮງງານມີຄຸນນະພາບ, ປະຊາຊົນ ມີວຽກເຮັດງານທຳ ຫຼາຍຂຶ້ນ, ແຮງງານພາຍໃນ ແລະ ຕ່າງປະເທດ ໄດ້ຮັບການຄຸ້ມຄອງ ຕາມລະບຽບ ແລະ ກົດໝາຍ ຢ່າງເຂັ້ມງວດ, ປະຕິບັດນະໂຍບາຍ ດ້ານສະຫວັດດີການ-ສັງຄົມ ໃຫ້ແທດເໝາະ, ມີຄຸນນະພາບ, ທົ່ວເຖິງ ແລະ ທັນເວລາ; ຮັບປະກັນໃຫ້ການພົວພັນຮ່ວມມື ກັບຕ່າງປະເທດ ດຳເນີນໄປຕາມແນວທາງ ຂອງພັກ ແລະ ລັດ, ຜັນຂະຫຍາຍ ບັນດາບົດບັນທຶກການຮ່ວມມື ທີ່ໄດ້ເຊັນກັບຕ່າງປະເທດ ແລະ ອົງການຈັດຕັ້ງສາກົນໃຫ້ມີປະສິດທິຜົນ ສູງກວ່າເກົ່າ; ບັນດາອົງການອຳນາດລັດທຸກຂັ້ນ ໄດ້ຮັບການປັບປຸງ ຕາມທິດກະທັດຮັດ, ສົມເຫດສົມຜົນ, ມີຄວາມເຂັ້ມແຂງໜັກແໜ້ນ, ສາມາດຄຸ້ມຄອງບໍລິຫານລັດ ຕາມກົດໝາຍ ຢ່າງເຂັ້ມງວດ; ປັບປຸງຂອດການບໍລິການຜ່ານປະຕູດຽວ ຢູ່ແຕ່ລະຂະແໜງ ການ, ບັນດາເມືອງ-ນະຄອນ; ຮັບປະກັນໃຫ້ທົ່ວສັງຄົມ ມີຄວາມສາມັກຄີປອງດອງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ສະຫະພັນນັກຮົບເກົ່າທຸກຂັ້ນ ມີຄວາມເຂັ້ມແຂງ, ໜັກແໜ້ນ; ຍົກສູງບົດບາດ ຄວາມສາມາດໃນການນຳພາ ແລະ ຄວາມເປັນແບບຢ່າງນໍາໜ້າຕໍ່ສູ້ ຂອງຄະນະພັກທຸກຂັ້ນ ແລະ ສະມາຊິກພັກທຸກສະຫາຍ, ຮັບປະກັນໃຫ້ການຈັດຕັ້ງພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ.
ກອງປະຊຸມໃຫຍ່ຄັ້ງນີ້ ຈະດຳເນີນເປັນເວລາ 2 ວັນ ແຕ່ວັນທີ 2-3 ຕຸລາ 2020 ຊຶ່ງເນື້ອໃນຂອງກອງປະຊຸມ ແມ່ນສຸມໃສ່ພິຈາລະນາ ແລະ ຮັບຮອງເອົາ ຮ່າງລາຍງານການເມືອງ, ບົດສຳຫຼວດການນຳພາ ຂອງຄະນະບໍລິຫານງານພັກແຂວງ ສະໄໝທີ VII, ແຜນພັດທະນາເສດຖະກິດ-ສັງຄົມ 5 ປີ (2021-2025); ຮັບຟັງການປະກອບຄຳເຫັນ ຈາກຂະແໜງການ, ກົມກອງ, ຄອບຄົວຕົວແບບ ຈຳນວນໜຶ່ງ, ພ້ອມທັງ ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກແຂວງສະໄໝທີ VIII ແລະ ເລືອກເອົາຜູ້ແທນ ໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI; ອັນສຳຄັນ ກອງປະຊຸມ ຈະໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳ ຈາກສະຫາຍ ທອງລຸນ ສີສຸລິດ ເພື່ອໃຫ້ຄະນະບໍລິຫານງານພັກແຂວງຊຸດໃໝ່ ແລະ ຜູ້ແທນກອງປະຊຸມ ນຳໄປຄົ້ນຄວ້າ, ຫັນເປັນທິດທາງ ແລະ ແຜນການລະອຽດ ຂອງຄະນະພັກຂັ້ນຂອງຕົນ ໝູນໃຊ້ ແລະ ຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ