ລັດຖະມົນຕີປະຈໍາ ສນຍ ຕ້ອນຮັບທ່ານທູດຝຣັ່ງ ປະຈໍາ ສປປ ລາວ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 02 ຕ.ລ 2020 11:00

ໃນຕອນເຊົ້າວັນທີ 30 ກັນຍາ 2020 ທີ່ສໍານັກງານນາຍົກລັດຖະມົນຕີ,  ທ່ານ ປອ. ນາງ ສຸວັນເພັງ ບຸບຜານຸວົງ, ລັດຖະມົນຕີປະຈໍາສໍານັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ຟລໍຣັອງສ ຊັອງບລັອງ-ຣິສແລກ (Florence Jeanblanc-Risler) ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງສາທາລະນະລັດຝຣັ່ງ ປະຈໍາ ສປປ ລາວ ພ້ອມດ້ວຍຄະນະ.
ໂອກາດດັ່ງກ່າວ, ທ່ານ ປອ. ນາງ ສຸວັນເພັງ ບຸບຜານຸວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາສູງຕໍ່ການເຂົ້າຢ້ຽມຂໍ່ານັບຂອງທ່ານ ນາງ ຟລໍຣັອງສ ຊັອງບລັອງ-ຣິສແລກ ພ້ອມດ້ວຍຄະນະໃນຄັ້ງນີ້  ຊຶ່ງຈຸດປະສົງຫຼັກ ແມ່ນເພື່ອພົບປະຢ້ຽມຂ່ຳນັບການນຳເພດຍິງຂອງລັດຖະບານ ສປ ລາວ. ພ້ອມດຽວກັນນີ້, ສອງຝ່າຍຍັງໄດ້ແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະແມ່ນ ການພັດທະນາເສດຖະກິດ-ສັງຄົມຂອງ ສປປ ລາວ, ລວມທັງທິດທາງນະໂຍບາຍຂອງລັດຖະບານ ພາຍຫຼັງທີ່ມີຶການແຜ່ລະບາດຂອງພະຍາດ ໂຄວິດ-19 ແລະ ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໂດຍສະເພາະທີ່ບັນຫາທີ່ຕິດພັນກັບການໃຫ້ການຊ່ວຍເຫຼືອຂອງຄູ່ຮ່ວມພັດທະນາໃນອະນາຄົດ. 
ຈາກນັ້ນ, ທ່ານ ນາງ ຟລໍຣັອງສ ຊັອງບລັອງ-ຣິສແລກ ພ້ອມດ້ວຍຄະນະ ໄດ້ສະແດງຄວາມຂອບໃຈມາຍັງທ່ານ ປອ. ນາງ ສຸວັນເພັງ ບຸບຜານຸວົງ ທີ່ໄດ້ເສຍສະຫຼະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນ ແລະ ສັນຍາວ່າ ສາທາລະນະລັດຝຣັ່ງ ຈະສືບຕໍ່ໃຫ້ພົວພັນຮ່ວມມື ແລະ ສະໜັບສະໜູນ ສປປ ລາວ ຕໍ່ໄປ ເພື່ອເສີມັັັັຂະຫຍາຍມູນເຊື້ອການພົວພັນຮ່ວມມື ລະຫວ່າງສອງປະເທດ ຝຣັ່ງ-ລາວ ໃຫ້ຈະເລີນງອກງາມຍິ່ງໆຂື້ນ. ນອກນັ້ນ ຈະສືບຕໍ່ລະດົມນັກລົງທຶນຂອງຝຣັ່ງ ໃຫ້ເຂົ້າມາລົງທຶນຢູ່ ສປປ ລາວ ໃຫ້ຫຼາຍຂຶ້ນ ໂດຍສະເພາະ ການລົງທຶນທາງດ້ານພະລັງງານໄຟຟ້າ, ບໍ່ແຮ່, ກະສິກຳ ແລະ ຂະແໜງັອື່ນໆ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ