ທ່ານ ທອງລຸນ ສີສຸລິດ ນາຍົກລັດຖະມົນຕີ ໃຫ້ກຽດເຂົ້າຮ່ວມ ແລະ ໂອ້ລົມ ຕໍ່ກອງປະຊຸມໃຫຍ່ ສຄອຊ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນສຸກ, 25 ກ.ຍ 2020 17:00

​​​ໃນຕອນບ່າຍ ວັນທີ 25 ກັນຍາ 2020 ທີ່ ຫໍປະຊຸມແຫ່ງຊາດ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ, ໂອ້ລົມ ແລະ ໃຫ້ທິດຊີ້ນຳ ຕໍ່ຜູ້ເຂົ້າຮ່ວມກອງປະຊຸມໃຫຍ່ ສະພາການຄ້າ ແລະ ອຸດສາຫະກຳແຫ່ງຊາດ (ສຄອຊ) ເພື່ອສະຫຼຸບຜົນງານ ການເຄື່ອນໄຫວວຽກ ຂອງສະພາການຄ້າ ແລະ ອຸດສາຫະກໍາແຫ່ງຊາດ ໄລຍະປີ 2017-2020, ສະຫຼຸບວຽກງານການເງິນ, ວາງທິດທາງແຜນການເຄື່ອນໄຫວວຽກງານໃນ 3 ປີຕໍ່ໜ້າ (2021-2023), ປ່ອນບັດເລືອກຕັ້ງເອົາຄະນະບໍລິຫານງານ ຊຸດທີ VIII; ໂດຍການເປັນປະທານ ຂອງທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ; ມີຜູ້ຕາງໜ້າຈາກພາກລັດ ແລະ ພາກທຸລະກິດ ເຂົ້າຮ່ວມ.


ໃນໂອກາດດັ່ງກ່າວ, ທ່ານນາຍົກລັດຖະມົນຕີ ແລະ ຜູ້ເຂົ້າຮ່ວມ ໄດ້ຮັບຟັງການລາຍງານຫຍໍ້ ກ່ຽວກັບຈຸດປະສົງ ແລະ ຜົນສຳເລັດ ຂອງການດຳເນີນກອງປະຊຸມໃນຄັ້ງນີ້, ລວມທັງ ຜົນການເລືອກຕັ້ງ ກໍ່ຄືລາຍຊື່ບັນດາທ່ານ ທີ່ໄດ້ຮັບການເລືອກຕັ້ງ ເປັນຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດ ຊຸດໃໝ່ (ຊຸດທີ VIII)ຈາກທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ. ສະເພາະ ຜົນການເລືອກຕັ້ງ ຄະນະບໍລິຫານຊຸດໃໝ່ ແມ່ນມີທັງໝົດ 37 ທ່ານ, ໃນນັ້ນ ມີຄະນະປະຈຳ ຈຳນວນ 13 ທ່ານ, ຊຶ່ງກອງປະຊຸມຄັ້ງປະຖົມມະລຶກ ໄດ້ເລືອກເອົາທ່ານ ອຸເດດ ສຸວັນນະວົງ ເປັນປະທານ; ທ່ານ ດາວວອນ ພະຈັນທະວົງ, ທ່ານ ທະນົງສິນ ກັນລະຍາ, ທ່ານ ນາງ ຈັນທະຈອນ ວົງໄຊ ແລະ ທ່ານນາງ ວາລີ ເວດສະພົງ ເປັນຮອງປະທານ; ທ່ານ ອະນົງສິນ ເປັນປະທານກວດກາ ແລະ ທ່ານ ຄຳຫຼ້າ ພົມມະວັນ ເປັນຮອງປະທານກວດກາ.
ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ຕໍ່ຜູ້ເຂົ້າຮ່ວມ ໂດຍໄດ້ກ່າວຢໍ້າຄືນ ຄວາມສຳຄັນ ຂອງການດຳເນີນກອງປະຊຸມຄັ້ງນີ້, ຄວາມສຳຄັນ ຂອງພາລະບົດບາດ ແລະ ໜ້າທີ່ຂອງ ສພອຊ;  ສະແດງຄວາມຊົມເຊີຍ ຕໍ່ຜົນສຳເລັດ ທີ່ສະພາອຸດສາຫະກຳ ແລະ ການຄ້າ ແຫ່ງຊາດ ສາມາດປະຕິບັດໄດ້ໃນໄລຍະ ທີ່ຜ່ານມາ, ລວມທັງ ຜົນສຳເລັດ ຂອງການດຳເນີນກອງປະຊຸມໃນຄັ້ງນີ້ ໂດຍສະເພາະ ບັນດາທ່ານ ທີ່ໄດ້ຮັບຄວາມເຊື່ອໝັ້ນ ແລະ ໄວ້ວາງໃຈ ຈາກການຈັດຕັ້ງ ແລະ ສະມາຊິກສະພາການຄ້າ ແລະ ອຸດສາຫະກຳແຫ່ງຊາດ ຊຶ່ງໄດ້ຮັບການເລືອກຕັ້ງ ເປັນຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດ ຊຸດທີ VIII. ພ້ອມທັງ ໃຫ້ກໍາລັງໃຈ ແລະ ສະແດງຄວາມເປັນຫ່ວງເປັນໄຍບາງດ້ານ ໂດຍໄດ້ຍົກໃຫ້ເຫັນສະພາບພົ້ນເດັ່ນ ທັງພາຍໃນ ແລະ ຕ່າງປະເທດ, ຜົນກະທົບ ຂອງການລະບາດ ຂອງພະຍາດໂຄວິດ-19, ຂໍ້ສະດວກ ແລະ ສິ່ງທ້າທາຍ ຕໍ່ການພັດທະນາ ສປປ ລາວ ພວກເຮົາ. ອັນສຳຄັນ ທ່ານໄດ້ຕັ້ງບັນຫາຂຶ້ນ ເພື່ອໃຫ້ຜູ້ເຂົ້າຮ່ວມ ກໍ່ຄື ສຄອຊ ໄດ້ນຳໄປຄົ້ນຄວ້າພິຈາລະນາ ແລະ ຜັນຂະຫຍາຍ ເຂົ້າສູ່ການປະຕິບັດວຽກງານຕົວຈິງ ໃຫ້ເກີດດອກອອກຜົນ ເປັນຮູບປະທຳຕົວຈິງ ເປັນຕົ້ນ ໃຫ້ຄຳນຶງເຖິງສະພາບການເຄື່ອນໄຫວ ການຈັດຕັ້ງປະຕິບັດວຽກງານຜ່ານມາ ກໍ່ຄືຜົນສຳເລັດການສ້າງແຜນຍຸດທະສາດ, ການພັດທະນາສະພາການຄ້າ ແລະ ອຸດສາຫະກຳແຫ່ງຊາດ ໂດຍສະເພາະ ການພັດທະນາເສດຖະກິດ-ສັງຄົມ ທີ່ມີ 6 ເສົາຄ້ຳ ຄື: 1). ການພັດທະນາສະພາບແວດລ້ອມທຸລະກິດ ໃຫ້ດີຂຶ້ນ; 2). ການພັດທະນາການສົ່ງເສີມ SMEs; 3). ການສົ່ງເສີມຜະລິດຕະພັນລາວ; 4). ການພັດທະນາຜູ້ປະກອບການ; 5). ການພັດທະນາການເຊື່ອມໂຍງເສດຖະກິດ ແລະ ການລົງທຶນ ທີ່ມີຄຸນນະພາບແບບຍືນຍົງ; 6). ການພັດທະນາສະພາການຄ້າ ແລະ ອຸດສາຫະກຳ ແຂວງ, ເມືອງ, ສະມາຄົມ ແລະ ກຸ່ມທຸລະກິດການຄ້າຕ່າງໆ ໃຫ້ເຂັ້ມແຂງ. ໃນພາວະ ທີ່ມີການລະບາດຂອງພະຍາດ COVID-19 ທີ່ ເປັນມະຫັນຕະໄພ ແລະ ສັດຕູໂຕຮ້າຍກາດທີ່ສຸດ, ເພັດສະຄາດທີ່ໄຮ້ສຽງ ເປັນອັນຕະລາຍທີ່ສຸດ ພວກເຮົາຕ້ອງໄດ້ຫັນປ່ຽນວິຖີຊີວິດແບບໃໝ່ ໃນຕໍ່ໜ້າ ແລະ ຍາວນານ, ສຳຄັນ ເຮົາຕ້ອງຮູ້ປະຢັດ, ມີສະຕິ, ມີແນວຄິດໃໝ່, ຫັນເປັນທັນສະໄໝ, ດຳເນີນທຸລະກິດແບບໃໝ່, ການສ້າງມູນຄ່າເພີ່ມ ໃນການດຳເນີນທຸລະກິດ ໂດຍຫັນເປັນມືອາຊີບ ເພື່ອສາມາດກຸ້ມຕົວເອງໄດ້, ໃຫ້ມີພື້ນຖານຂໍ້ມູນລັກສະນະວິທະຍາສາດ, ມີການຄົ້ນຄວ້າລັກສະນະວິເຄາະ-ວິໄຈ ເພື່ອໃຫ້ສາມາດປັບຕົວທັນເຫດການ ທີ່ກຳລັງເກີດຂຶ້ນ, ບໍ່ຟຸມເຟືອຍ, ປະຢັດ, ມັດທະຍັດ, ຄິດຢ່າງສ້າງສັນ, ມອງການໄກ ແລະ ອື່ນໆ; ໃຫ້ພ້ອມກັນຮັກສາມູນເຊື້ອອັນດີງາມ ແລະ ຜົນສຳເລັດທີ່ຍາດມາໄດ້ນັ້ນໄວ້; ຂໍໃຫ້ເຊື່ອໝັ້ນ ຕໍ່ການຊີ້ນຳ-ນຳພາ ຂອງພັກ-ລັດຖະບານ ໃນການນຳພາພວກເຮົາສູ້ຊົນ ແລະ ປະຄັບປະຄອງໃຫ້ກ້າວໜ້າຕໍ່ໄປ, ຄວາມຫຍຸ້ງຍາກທັງໝົດ ແມ່ນໜັກໜ່ວງ ແຕ່ພວກເຮົາກໍ່ຍັງມີຈຸດພິເສດ ແລະ ຄວາມສາມາດບົ່ມຊ້ອນຫຼາຍດ້ານ ທີ່ຈະນຳພາປະເທດກ້າວຂຶ້ນ ໄປຕາມມູນເຊື້ອທີ່ເຮົາໄດ້ປະຕິບັດຜ່ານມາ, ຊຶ່ງພວກເຮົາຕ້ອງໄດ້ດຳເນີນໄປຂ້າງໜ້າ ຢ່າງແຂງແຮງ; ປັບປຸງການຈັດຕັ້ງ ຂອງອົງກອນຕົນ ໃຫ້ມີຄວາມແທດເໝາະກັບຕົວຈິງ ໂດຍສະເພາະ ລັດວິສາຫະກິດຈຳນວນໜຶ່ງ ທີ່ຍັງມີບາງໂຄງປະກອບການຈັດຕັ້ງທີ່ເຫຼືອ ທັງນີ້ກໍ່ເພື່ອພ້ອມກັນດຳເນີນການ ມີປະສິດທິຜົນ ແລະ ກ້າວໜ້າ; 
ໃນຕອນທ້າຍ, ທ່ານນາຍົກລັດຖະມົນຕີ ໄດ້ຝາກບາງປະໂຫຍກຄຳເວົ້າ ໃຫ້ຜູ້ເຂົ້າຮ່ວມ ໄດ້ນຳໄປຄົ້ນຄວ້າ ຄື: “ພວກເຮົາໄດ້ລົງເຮືອລຳດຽວກັນແລ້ວ, ເຮືອຂອງພວກເຮົາ ໃນປີ 2016-2017 ແມ່ນແຕກຕ່າງຈາກປີນີ້, ປະຈຸບັນ ເຮືອລຳໃຫຍ່ ຂອງພວກເຮົາ ກຳລັງລ່ອງລອຍ ດ້ວຍຄວາມອ່ອນໄຫວ, ກຳລັງລ່ອງລອຍໄປສູ່ເຂດທີ່ອາດຈະມີໄພ, ລັດຖະບານ ກັບປະຊາຊົນ ຕ້ອງຮ່ວມກັນສ້າງກໍາລັງແຮງໃໝ່ ເພື່ອແກ້ໄຂກັບອັນທີ່ເອີ້ນວ່າ: ຄວາມລວຍຍັງກະຈຸ ຄວາມທຸກຍັງກະຈາຍ ຫຼື ຄຳໜຶ່ງທີ່ວ່າ ຖ້າເງິນທຶນຍັງກະຈຸກ, ຄົນທຸກກໍ່ຍັງກະຈາຍ, ມອບໃຫ້ສະພາການຄ້າ ແລະ ອຸດສາຫະກຳແຫ່ງຊາດລາວ, ຜູ້ປະກອບການ ນໍາໄປຄົ້ນຄິດເບິ່ງວ່າຖືກຕ້ອງບໍ່, ຂໍໃຫ້ທຸກຄົນຊ່ວຍກັນຄິດ ບໍ່ປະປ່ອຍໃຫ້ຜູ້ຂັບທ້າຍ ທັງເປ້-ທັງແບກ-ທັງຫາບ-ທັງຖໍ່-ທັງພາຍ ຖ້າປ່ອຍແນວນີ້ໄດ້ບໍ່? ຖ້າເປັນແນວນີ້ ເຮືອລຳນີ້ຈະແກວ່ງໄກວ, ແຄມເຮືອຈະເຊງ່ຽງ, ພວກເຮົາຄວນມາຮ່ວມກັນຕ້ານກັບຄວາມສ່ຽງ, ພ້ອມກັນຕໍ່ສູ້ໄປຢ່າງທຸ່ນທ່ຽງ, ເຮືອລຳນີ້ ຕ້ອງຫຼີກລ່ຽງນຳ້ແກວ່ງ ເພື່ອບໍ່ໃຫ້ຈົມລົງ”.​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ