​ສະຫາຍ ບຸນທອງ ຈິດມະນີ ໃຫ້ກຽດເຂົ້າຮ່ວມ ກອງປະຊຸມໃຫຍ່ ອົງຄະນະພັກແຂວງບໍລິຄຳໄຊ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 25 ກ.ຍ 2020 11:00

​​ກອງປະຊູມໃຫຍ່ ຄັ້ງທີ VII ອົງຄະນະພັກແຂວງບໍລິຄຳໄຊ ໄດ້ໄຂຂຶ້ນ ໃນຕອນເຊົ້າວັນທີ 24 ກັນຍາ 2020  ໂດຍພາຍໃຕ້ການເປັນປະທານ ຂອງສະຫາຍ ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ; ໂດຍໄດ້ໃຫ້ກຽດເຂົ້າຮ່ວມ ຂອງສະຫາຍ ບຸນທອງ ຈິດມະນີ, ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານກວດກາສູນກາງພັກ; ມີຜູ້ແທນສົມບູນ 237 ສະຫາຍ, ຍິງ 26 ສະຫາຍເປັນຕົວແທນໃຫ້ແກ່ສຳມະຊິກພັກທົ່ວແຂວງ 13,467 ສະຫາຍ, ຍິງ 3,295 ສະຫາຍ ແລະ ແຂກຖືກເຊີນຈາກສູນກາງ ແລະ ທ້ອງຖີ່ນເຂົ້າຮ່ວມ. 


​ສະຫາຍ ກອງແກ້ວ ໄຊສົງຄາມ ໄດ້ຂຶ້ນກ່າວເປີດກອງປະຊຸມ ແລະ ຜ່ານຮ່າງບົດລາຍງານການເມືອງ ທັງສອງພາກ ຊຶ່ງໄດ້ຍົກໃຫ້ເຫັນຜົນງານການນຳພາ-ຊີ້ນຳ ຂອງອົງຄະນະພັກແຂວງບໍລິຄຳໄຊ ຕະຫຼອດໄລຍະ 5 ປີຜ່ານມາ ເຖິງວ່າແຂວງບໍລິຄຳໄຊ ໄດ້ຜົນກະທົບຈາກໄພພິບັດທໍາມະຊາດຮ້າຍແຮງ ໃນປີ 2017-2019, ການແຜ່ລະບາດຂອງພະຍາດສັດອະຫິວາໝູອາຟິກກາ ແລະ ຜົນກະທົບຕໍ່ເສດຖະກິດ ຂອງການລະບາດໂຄວິດ-19, ບັນຫາປະກົດການຫຍໍ້ທໍ້ຕ່າງໆໃນສັງຄົມ ໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ຂອງແຂວງບໍລິຄໍາໄຊ, ແຕ່ພາຍໃຕ້ການນໍາພາ-ຊີ້ນຳ ຂອງຄະນະບໍລິຫານງານພັກແຂວງ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ອົງຄະນະພັກແຂວງ ຊຸດທີ VI ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IV 2016-2020, ແຂວງບໍລິຄຳໄຊ ໄດ້ສູມໃສ່ການແກ້ໄຂບັນຫາ 4 ເຖື່ອນ ແລະ 9 ຫົວຂໍ້ວິທະຍາສາດ ເຂົ້າສູ່ວຽກງານຕົວຈິງຢູ່ແຕ່ລະຂະແໜງການ ຊຶ່ງໄດ້ເຮັດໃຫ້ແຂວງ ໄດ້ມີຄວາມສະຫງົບໂດຍພື້ນຖານ ແລະ ໜັກແໜ້ນ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ໃນອັດຕາສະເລ່ຍ 6,5% ຕໍ່ປີ ລວມຍອດຜະລິດຕະພັນພາຍໃນບັນລຸ 5.878 ຕື້ກີບ, ສະເລ່ຍຮັບໃສ່ພົນລະເມືອງ ໄດ້ 18.336.343 ກີບ ເທົ່າກັບ 2.060 ໂດລາ  ໂຄງປະກອບເສດຖະກິດ: ຂະແໜງກະສິກໍາ ກວມ 26%, ອຸດສາຫະກໍາ 48,9% ແລະ ການບໍລິການ 25,1% ຂອງ GPP; ການລົງທຶນບັນລຸ 7.914 ຕື້ກີບ ກວມ 29,8% ຂອງລວມຍອດຜະລິດຕະພັນພາຍໃນ 5 ປີ ການຈັດເກັບລາຍຮັບເຂົ້າງົບປະມານ ໄດ້ຕາມແຜນທີ່ວາງໄວ້, ການຜະລິດສະບຽງອາຫານເຮັດໃຫ້ແຂວງສາມາດກຸ້ມຕົນເອງ ດ້ານສະບຽງອາຫານໄດ້ໂດຍພື້ນຖານ, ຫຼຸດຜ່ອນການນໍາເຂົ້າ ແລະ ມີຜົນຜະລິດສົ່ງອອກ, ການຊຸກຍູ້ສົ່ງເສີມການປູກພືດເປັນສິນຄ້າ ໄດ້ຂະຫຍາຍຕົວຢ່າງກວ້າງຂວາງ ທີ່ພົ້ນເດັ່ນແມ່ນກຸ່ມປູກຜັກອິນຊີບ້ານຫົວນາເມືອງບໍລິຄັນ,  ກໍາຈັດການຖາງປ່າເຮັດໄຮ່ແບບເລື່ອນລອຍຢ່າງເຂັ້ມງວດ, ສ້າງໃຫ້ທຸກຄົນມີສ່ວນຮ່ວມໃນການປົກປັກຮັກສາ, ຄຸ້ມຄອງແຫຼ່ງນ້ຳ, ຟື້ນຟູແລະພັດທະນາປ່າໄມ້ໃຫ້ມີຄວາມສົມດູນ, ທົ່ວແຂວງມີເນື້ອທີ່ປົກຫຸ້ມຂອງປ່າໄມ້ກວມ 70,41%, ໄດ້ສົ່ງເສີມການປູກ-ການລ້ຽງ ແລະ ການປະມົງແບບທໍາມະຊາດຫັນໄປສູ່ການນໍາໃຊ້ເຕັກນິກວິທະຍາສາດແລະຫັນເປັນກຸ່ມ, ເປັນຟາມ ສາມາດສະໜອງຊີ້ນ, ປາ ແລະ ໄຂ່ ເພື່ອບໍລິໂພກໄດ້ເປັນຢ່າງດີ ສະເລ່ຍ 52,4 ກິໂລຕໍ່ຄົນຕໍ່ປີ, ໂຮງງານອຸດສາຫະກຳ, ຫັດຖະກຳປຸງແຕ່ງ ເພີ່ມຂຶ້ນ 15,4% ທຽບໃສ່ປີ 2015, ທົ່ວແຂວງໄດ້ມີລະບົບໄຟຟ້າ, ການຄົມມະນາຄົມ ແລະ ການບໍລິການໂທລະຄົມ ໄດ້ເຂົ້າເຖິງປະຊາຊົນຢູ່ຂັ້ນຮາກຖານຢ່າງທົ່ວເຖິງ, ການຈັດເກັບລາຍຮັບເຂົ້າງົບປະມານ ພູດສູນກາງປະຕິບັດໄດ້ 2.650 ຕື້ກີບ ເທົ່າກັບ 103,43%; ພູດຂອງແຂວງ ປະຕິບັດໄດ້ 956 ຕື້ກີບ, ເທົ່າກັບ 94,19% ຂອງແຜນການ.


​ແກ້ໄຂຄວາມທຸກຍາກຂອງປະຊາຊົນ, ໄດ້ຫັນເອົາພະນັກງານລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ໃນຫຼາຍຮູບການ ແລະ ນໍາພາ-ຊິ້ນໍາຈັດຕັ້ງປະຕິບັດຕາມ 4 ເນື້ອໃນ 4 ຄາດໝາຍ ໂດຍການປັບປຸງລະບົບການເມືອງຢູ່ຮາກຖານຢ່າງໜັກແໜ້ນ, ຈັດສັນເຕົ້າໂຮມບ້ານ, ສ້າງບ້ານໃຫຍ່ໃຫ້ກາຍເປັນບ້ານໃຈກາງພັດທະນາ ແລະ ກາຍເປັນສີສັນຕົວເມືອງນ້ອຍ ໃຫ້ມີຄວາມເຂັ້ມແຂງ ແລະ ໜັກແໜ້ນ. ຜ່ານການຈັດຕັ້ງປະຕິບັດວຽກງານດັ່ງກ່າວ ຕາມດໍາລັດ ເລກທີ 309/ນຍ ໃນປີ 2018 ທົ່ວແຂວງມີຄອບຄົວພົ້ນທຸກ ກວມ 98,2%, ບ້ານພົ້ນທຸກກວມ 89% ແລະ ເມືອງພົ້ນທຸກ 6 ເມືອງ; ມີຄອບຄົວພັດທະນາ 86,73%, ບ້ານພັດທະນາກວມ 70,44%, ຜົນປະເມີນປີ 2019; ຕາມດໍາລັດ 348/ນຍ ມີຄອບຄົວພົ້ນທຸກກວມ 93,2%, ບ້ານພົ້ນທຸກກວມ 84,48%, ເມືອງພົ້ນທຸກ 5 ເມືອງ ແລະ ມີຄອບຄົວພັດທະນາ 87%, ບ້ານພັດທະນາ ກວມ 73,54%, ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໃນ 5 ດ້ານ ມີເມືອງບັນລຸ 4 ດ້ານ ມີ 5 ເມືອງ ຄື: ເມືອງປາກຊັນ, ທ່າພະບາດ, ປາກກະດິງ, ບໍລິຄັນ ແລະ ຄໍາເກີດ; ເມືອງທີ່ບັນລຸເງື່ອນໄຂ 3 ດ້ານ ມີ 2 ເມືອງຄື: ເມືອງໄຊຈໍາພອນ ແລະ ວຽງທອງ; ສ້າງບ້ານເປັນຫົວໜ່ວຍພັດທະນາ 4 ດ້ານ ໃນທົ່ວແຂວງທັງໝົດ 291 ບ້ານ, ມີບ້ານບັນລຸ 4 ດ້ານ 148 ບ້ານ; ບັນລຸ 3 ດ້ານ 26 ບ້ານ, ບັນລຸ 2 ດ້ານ 57 ບ້ານ, ບັນລຸ 1 ດ້ານ 30 ບ້ານ ແລະ ບ້ານບໍ່ບັນລຸທັງ 4 ດ້ານ ມີ 30 ບ້ານ, ໄດ້ປັບປຸງການສຶກສາໃຫ້ມີຄຸນນະພາບດີຂຶ້ນ,ປະຕິບັດຕົວຊີ້ວັດເປົ້າໝາຍສະຫັດສະຫວັດ ຫຼາຍດ້ານບັນລຸຕາມຄາດໝາຍ; ໄດ້ຮັບຮອງເປັນແຂວງຈົບມັດທະຍົມຕົ້ນ, ຕາໜ່າງສາທາລະນະສຸກ ໄດ້ຂະຫຍາຍປົກຄຸມ 100%, ສ້າງບ້ານແບບຢ່າງດ້ານສາທາລະນະສຸກ ກວມ 93,8%, ປັບປຸງຍົກລະດັບວິທະຍຸ, ໂທລະພາບ, ໜັງສືພີມ, ເວບໄຊ໌ ໃຫ້ມີຄຸນນະພາບດີຂຶ້ນ, ມີບ້ານວັດທະນະທໍາ ກວມ 91,06%ແລະ ຄອບຄົວ ກວມ 84,62% ເອົາໃຈໃສ່ປັບປຸງ ແລະ ພັດທະນາແຫຼ່ງທ່ອງທ່ຽວທາງທຳມະຊາດ, ປະຫວັດສາດ, ວັດທະທໍາ ທີ່ມີການບໍລິການອະນຸລັກ ແລະ ປະຊາຊົນມີສ່ວນຮ່ວມ ແລະ  ຮັບຮອງວັດພະບາດໂພນສັນ ເປັນມໍລະດົກຂອງແຂວງ.

​​ກອງທຶນໜຶ່ງດວງໃຈບໍລິຄໍາໄຊຊ່ວຍເຫຼືອສັງຄົມ ໄດ້ເຄື່ອນໄຫວສ້າງກິດຈະກໍາຫາລາຍໄດ້ ແລະ ລະດົມທຶນຈາກທຸກພາກສ່ວນໃນສັງຄົມ, ມາຮອດປະຈຸບັນ ມີເງິນກອງທຶນ 8 ຕື້ກວ່າກີບ ແລະ ປະກອບສ່ວນຊ່ວຍເຫຼືອສັງຄົມ ເຊັ່ນ: ກໍ່ສ້າງ ແລະ ສ້ອມແປງໂຮງຮຽນຈໍານວນ 50 ຫຼັງ ມູນຄ່າ 5 ຕື້ກວ່າກີບ, ມອບລົດຮັບສົ່ງຄົນເຈັບ 2 ຄັນ, ວັດຖຸອຸປະກອນການແພດ ໃຫ້ໂຮງໝໍແຂວງ, ຊ່ວຍຕ້ານໄພນໍ້າຖ້ວມ 2 ແຂວງພາກໃຕ້ມູນຄ່າ 90 ລ້ານກວ່າກີບ; ບັນເທົາທຸກໃຫ້ແກ່ຄອບຄົວອານາຖາ ແລະ ຖືກເຄາະຮ້າຍຈາກໄພພິບັດຕ່າງໆ ເປັນມູນຄ່າ 1,3 ຕື້ກວ່າກີບ; ປະກອບລົດດັບເພີງ 2 ຄັນ ໃຫ້ແກ່ກອງບັນຊາການ ປກສ ແຂວງ ແລະ ປະກອບສ່ວນຊ່ວຍສັງຄົມວຽກອື່ນໆ. ກອງປະຊູມນີ້ ຈະໄດ້ດໍາເນີນໄປເປັນເວລາ 2 ວັນ.


ແຫຼ່ງ: ຫ້ອງວ່າການ ແຂວງບໍລິຄຳໄຊ