ທ່ານນາຍົກ ຕ້ອນຮັບຄະນະຜູ້ແທນຮົງກາຣີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 11 ກ.ຍ 2020 14:00

​​ໃນຕອນເຊົ້າຂອງວັນທີ 11 ກັນຍາ 2020 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມ ຂອງທ່ານ ປີເຕີ້ ຊີຈາໂຕ, ລັດຖະມົນຕີກະຊວງຕ່າງປະເທດ ແລະ ການຄ້າ ຮົງກາຣີ ແລະ ຄະນະ ທີ່ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 10-11 ກັນຍາ 2020.​

 ​

​​ ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງທ່ານ ປີເຕີ ຊີຢາໂຕ (Péter SZIJJÁRTÓ) ພ້ອມດ້ວຍຄະນະ, ຊຶ່ງເປັນການປະກອບສ່ວນ ເຂົ້າໃນການເພີ່ມພູນຄູນສ້າງ ສາຍພົວພັນ ແລະ ການຮ່ີວມມື ລະຫວ່າງ ສປປ ລາວ ແລະ ຮົງກາຣີ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນ ເປັນກ້າວໆ. ພ້ອມດຽວກັນນີ້, ທ່ານ ນາຍົກລັດມົນຕີລັດຖະມົນຕີ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ທີ່ພົ້ນເດັ່ນ ໂດຍຫຍໍ້ ແລະ ສະພາບການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ຢູ່ ສປປ ລາວ ໃຫ້ຄະນະຜູ້ແທນຮົງກາຣີ ຊາບ. ສຳລັບທິດທາງ ສຳລັບການຮ່ວມມືໃນຕໍ່ໜ້າ, ທ່ານນາຍົກລັດຖະມົນຕີ ຈະໄດ້ຊີ້ນຳຂະແໜງການກ່ຽວຂ້ອງ ຂອງ ສປປ ລາວ ສົມທົບກັບຝ່າຍຮົງກາຣີ ເພື່ອສືບຕໍ່ເອົາໃຈໃສ່ຈັດຕັ້ງປະຕິບັດ ບັນດາສັນຍາ ແລະ ນິຕິກຳອື່ນໆ ທີ່ໄດ້ລົງນາມຮ່ວມໃຫ້ເປັນຮູບປະທຳກວ່າເກົ່າ. ນອກນັ້ນ, ຍັງສະເໜີໃຫ້ທັງສອງຝ່າຍ ສືບຕໍ່ເພີ່ມທະວີການຮ່ວມມືກັນ ໃນການເຄື່ອນໄຫວວຽກງານຕ່າງປະເທດ, ທັງໃນເວທີພາກພື້ນ ແລະ ສາກົນ ກ່ຽວກັບບັນຫາທີ່ເປັນຜົນປະໂຫຍດຮ່ວມກັນ, ຕາມສະພາບ ແລະ ເງື່ອນໄຂຄວາມເປັນຈິງ. ນອກນັ້ນ ຍັງໄດ້ກ່າວສະແດງຄວາມຂອບໃຈ ຕໍ່ລັດຖະບານຮົງກາຣີ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ, ຊຶ່ງການຊ່ວຍເຫຼືອດັ່ງກ່າວ ແມ່ນມີປະສິດທິຜົນສູງ, ສອດຄ່ອງກັບຄວາມຮຽກຮ້ອງຕ້ອງການຕົວຈິງ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໄດ້ເປັນຢ່າງດີ.
​​ ນໂອກາດດຽວກັນ, ທ່ານລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດຟີລິບປິນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ນາຍົກລັດຖະຶມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້.
​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ