ທ່ານນາຍົກ ຢ້ຽມຢາມ ສອງໂຮງງານອຸດສາຫະກຳ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 11 ກ.ຍ 2020 16:00

ໃນຕອນບ່າຍ ວັນທີ 11 ກັນຍາ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍທ່ານ ສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ ແລະ ຄະນະ ໄດ້ໄປຢ້ຽມຢາມໂຮງງານຜະລິດເຫຼັກ VSI ຊຽງຄວນ ຂອງບໍລິສັດ ບໍລິສັດນະຄອນຫຼວງອຸດສາຫະກຳເຫຼັກຈຳກັດ ແລະ ໂຮງງານຜະລິດເຄື່ອງອຸປະກອນຊິ້້ນສ່ວນກ້ອງຖ່າຍຮູບສົ່ງອອກຕ່າງປະເທດ ຂອງບໍລິສັດໂຕກຽວວິສະວະກຳລາວຈຳກັດ, ຊຶ່ງສອງໂຮງງານດັ່ງກ່າວ ຕັ້ງຢູ່ເມືອງຫາດຊາຍຟອງ, ນະຄອນຫຼວງວຽງຈັນ.


ໃນໂອກາດໄປຢ້ຽມຢາມແຕ່ລະໂຮງງານ, ຄະນະຂອງທ່ານນາຍົກລັດຖະມົນຕີ ໄດ້ຮັບຟັງການລາຍງານ ກ່ຽວກັບສະພາບລວມ ໃນການດຳເນີນກິດຈະການຂອງໂຮງງານ, ຊຶ່ງເຫັນວ່າ: ໂຮງງານຜະລິດເຫຼັກເສັ້ນ VSI ໄດ້ສ້າງຕັ້ງຂຶ້ນ ໃນປີ 1994, ທຶນຈົດທະບຽນເບື້ອງຕົ້ນ 2 ລ້ານໂດລາສະຫະລັດ ແລະ ເລີ່ມດໍາເນີນການຜະລິດ ໃນປີ 1996 ໂດຍຜະລິດເຫຼັກກົມກ້ຽງ ແລະ ເຂົ້າເຫຼັກຂໍ້ອ້ອຍ ຄື: ເຫຼັກກົມກ້ຽງ ມີຊັ້ນຄຸນນະພາບ SR24, ຜະລິດ ມີຂະໜາດເສັ້ນຜ່າກາງ 6, 8, 9 ແລະ 12 ມິນລີແມັດ; ເຫຼັກຂໍ້ອ້ອຍ VSI ມີຊັ້ນຄຸນນະພາບ SD40, ຜະລິດ ມີຂະໜາດເສັ້ນຜ່າກາງ 8, 10, 12, 14, 16, 20, 22, 25 ແລະ 28 ມິນລີແມັດ ແລະ ເຫຼັກຂໍ້ອ້ອຍ NASA ມີຊັ້ນຄຸນນະພາບ SD40, ຜະລິດ ມີຂະໜາດເສັ້ນຜ່າກາງ 6, 8, 10, 12, 14, 16 ແລະ 20 ມິນລີແມັດ; ກໍາລັງການຜະລິດ ໄລຍະທໍາອິດ 30.000 - 40.000 ໂຕນ/ປີ ແລະ ມີພະນັກງານ-ກຳມະກອນ 50-60 ຄົນ; ໃນປີ 2010 ໄດ້ເພີ່ມທຶນຈົດທະບຽນ 40 ຕື້ກີບ, ມາຮອດປະຈຸບັນ ໄດ້ລົງທຶນທັງໝົດ ຫຼາຍກວ່າ 50 ລ້ານໂດລາສະຫະລັດ, ມີແຮງງານທັງໝົດ 400 ກວ່າຄົນ, ມີກຳລັງການຜະລິດ 300.000 - 400.000 ໂຕນ/ປີ, ຊຶ່ງຜະລິດຕະພັນ ທີ່ຜະລິດໄດ້ ແມ່ນຈໍາໜ່າຍຢູ່ພາຍໃນ ສປປ ລາວ ທັງໝົດ; ໃນຕໍ່ໜ້າ ໂຮງງານຈະຜະລິດເຫຼັກກົມກ້ຽງ ແລະ ຂໍ້ອ້ອຍ ຊະນິດມ້ວນ (ໂຄ້ງ) ເພີ່ມອີກ. ສໍາລັບໂຮງງານຜະລິດເຄື່ອງອຸປະກອນຊິ້ນສ່ວນກ້ອງຖ່າຍຮູບ ແມ່ນໄດ້ສ້າງຕັ້ງຂຶ້ນ ໃນປີ 1999, ລົງທຶນທັງໝົດປະມານ 1,2 ລ້ານໂດລາສະຫະລັດ, ມີແຮງງານທັງໝົດ 188 ຄົນ ໂດຍແມ່ນແຮງງານລາວ ເກືອບທັງໝົດ, ຄ່າແຮງງານຕໍ່າສຸດ 1.300.000 ກີບ/ເດືອນ, ໂຮງງານ ມີເນື້ອທີ່ທັງໝົດ 1 ເຮັກຕາ, ຄວາມສາມາດໃນການຜະລິດ 3-4 ລ້ານຊິ້ນສ່ວນ/ເດືອນ, ຊຶ່ງຜະລິດຕະພັນ ທີ່ຜະລິດໄດ້ ແມ່ນສົ່ງໄປຈຳໜ່າຍທີ່ປະເທດຈີນ, ຮົງກົງ, ໄທ, ຍີ່ປຸ່ນ ແລະ ເກົາຫຼີໃຕ້.


ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ບັນດາໂຮງງານ ທີ່ສາມາດປະຕິບັດວຽກງານຂອງຕົນ ມີຄຸນນະພາບ, ມີຜົນສຳເລັດຕາມແຜນການທີ່ວາງໄວ້ ແລະ ເຕີບໃຫຍ່ຂະຫຍາຍຕົວ ເປັນກ້າວໆມາ, ພ້ອມກັນນັ້ນ ກໍ່ສາມາດນຳຜະລິດຕະພັນຂອງຕົນ ອອກຈຳໜ່າຍ ຮັບໃຊ້ສັງຄົມ ພາຍໃນ ແລະ ຕ່າງປະເທດ, ທັງສ້າງວຽກເຮັດງານທຳໃຫ້ແກ່ປະຊາຊົນລາວ ຫຼາຍພໍສົມຄວນ, ໄດ້ປະຕິບັດພັນທະ ກໍ່ຄືປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ຕາມຄວາມສາມາດຕົວຈິງ. ພ້ອມກັນນີ້, ທ່ານ ນາຍົກລັດຖະມົນຕີ ຍັງຮຽກຮ້ອງບັນດາບໍລິສັດ ຈົ່ງສືບຕໍ່ຜະລິດ ຜະລິດຕະພັນຂອງຕົນ ໃຫ້ໄດ້ທັງປະລິມານ ແລະ ຄຸນນະພາບ ເພື່ອຕອບສະໜອງຢ່າງພຽງພໍ ກັບຄວາມຮຽກຮ້ອງຕ້ອງການຂອງສັງຄົມ ກໍ່ຄືຕະຫຼາດພາຍໃນ ແລະ ຕ່າງປະເທດ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ