ສະຫາຍ ສອນໄຊ ສີພັນດອນ ເຂົ້າຮ່ວມ ແລະ ໂອ້ລົມຕໍ່ກອງປະຊຸມໃຫຍ່ອົງຄະນະພັກແຂວງໄຊຍະບູລີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 09 ກ.ຍ 2020 16:00

​ພາຍຫຼັງໄດ້ດໍາເນີນກອງປະຊຸມໃຫຍ່ ຄັ້ງທີ VII ຂອງຜູ້ແທນອົງຄະນະພັກ ແຂວງ ໄຊຍະບູລີ ເປັນເວລາ 2 ວັນ 8-9 ກັນຍາ 2020 ທີ່ຫ້ອງປະຊຸມໃຫຍ່ຂອງແຂວງ ດ້ວຍບັນຍາການທີ່ມີຄວາມໝາຍຄວາມສຳຄັນ ແລະ ໄດ້ສໍາເລັດລົງຢ່າງຈົບງາມໃນຕອນບ່າຍຂອງວັນທີ 9 ກັນຍາ, ພາຍໃຕ້ການເປັນປະທານຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ເປັນກຽດເຂົ້າຮ່ວມຂອງ ສະຫາຍ ປອ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ມີໜ່ວຍປະຕິບັດງານຈາກສູກກາງ, ພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກ ກອງພົນທະຫານຮາບທີ 2, ທີ 3 ເຂົ້າຮ່ວມ 300 ກວ່າສະຫາຍ.​


​ບົນພື້ນຖານຜົນສຳເລັດຫຼາຍດ້ານໃນການປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ ຕາມເງື່ອນໄຂທ່າແຮງບົ່ມຊ້ອນ ແລະ ສະພາບຄວາມເປັນຈິງຂອງແຂວງ ແລະ ຕີລາຄາບັນຫາດ້ານດີ, ດ້ານອ່ອນ, ຂໍ້ຄົງຄ້າງ ແລະ ການຖອດຖອນບົດຮຽນຈາກການປະຕິບັດຕົວຈິງໃນ 5 ປີຜ່ານມາ ແລະ ໄດ້ພ້ອມກັນວາງທິດທາງໜ້າທີ່ລວມ, ຄາດໝາຍສູ້ຊົນ ແຜນພັດທະນາເສດຖະກິດສັງຄົມໄລຍະ 5 ປີຕໍ່ໜ້າ, ໂດຍສູ້ຊົນ ເຮັດໃຫ້ເສດຖະກິດຂະຫຍາຍຕົວ ດ້ວຍຈັງຫວະໄວ ແລະ ຕໍ່ເນື່ອງ ສະເລ່ຍບໍ່ໃຫ້ຫຼຸດ 7% ຕໍ່ປີ, ລວມຍອດລາຍຮັບຮອດປີ 2025ໃຫ້ ບັນລຸ 15.185 ຕື້ ກີບ, ສະເລ່ຍຫົວຄົນໜຶ່ງ ໃຫ້ໄດ້ 3.800 ໂດລາຕໍ່ຄົນຕໍ່ປີ, ເກັບລາຍຮັບເຂົ້າງົບປະມານໃຫ້ໄດ້ 5.099 ຕື້ກີບ ຫຼື ເທົ່າກັບ 7% ຂອງ GDP ຕໍ່ປີ, ໂຄງປະກອບເສດຖະກິດ ໃຫ້ມີການຫັນປ່ຽນ ຢ່າງຕັ້ງໜ້າ ຕາມທິດຫັນເປັນອຸດ ສາຫະກໍາ ແລະ ທັນສະໄໝ ເທື່ອລະກ້າວ, ສຸມໃສ່ຜະລິດສະບຽງອາຫານ ແລະ ຜະລິດເປັນສີນຄ້າ ໂດຍການດຶງດູດການລົງທຶນ ຈາກພາຍໃນ ແລະ ຕ່າງປະເທດ, ພັດທະນາພື້ນຖານໂຄງລ່າງ ແລະ ສ້າງເງື່ອນໄຂອໍານວຍຄວາມສະດວກແກ່ການຜະລິດ ເພື່ອສ້າງເງື່ອນໄຂເຮັດໃຫ້ແຂວງ ໄຊຍະບູລີ ກ້າວໄປສູ່ຄວາມເຂັ້ມແຂງຮອບດ້ານເທື່ອລະກ້າວ, ກອງປະຊຸມ ໄດ້ຟັງການປະກອບຄໍາເຫັນ ຈາກຜູ້ຕາງໜ້າ ຫຼາຍພາກ ສ່ວນ ແລະ ຕົວແບບດ້ານຕ່າງໆ, ຈາກນັ້ນກໍ່ໄດ້ດໍາເນີນການປ່ອນບັດຄັດເລືອກເອົາຄະນະບໍລິຫານງານພັກແຂວງຊຸດໃໝ່ ເຊິ່ງມີຈໍານວນຜູ້ສະໝັກທັງໝົດ 40 ສະຫາຍ, ຍິງ 6 ສະຫາຍ, ເລືອກເອົາ 35 ສະຫາຍ, ຜ່ານການປ່ອນບັດຄັດເລືອກ ແລະ ຕາມການຕົກລົງໃນກອງປະຊຸມຄັ້ງປະຖົມມະລຶກ ໄດ້ຄັດເລືອກເອົາຄະນະປະຈຳພັກແຂວງ 11 ສະຫາຍ, ໃນນັ້ນ ໄດ້ເປັນເອກະພາບເລືອກເອົາ ສະຫາຍ ພົງສະຫວັນ ສິດທະວົງ ເປັນເລຂາຄະນະບໍລິຫານງານພັກແຂວງ, ສະຫາຍ ເພັງນິລັນ ຄໍາພັນເພັງ ແລະ ສະຫາຍ ດວງຕາ ໄຊວຸດ ເປັນຮອງເລຂາ, ສະຫາຍ ສົມຫວັງ ແກ້ວວິໄລສັກ ເປັນປະທານກວດກາ , ພ້ອມນັ້ນກໍ່ໄດ້ປ່ອນບັດຄັດເລືອກເອົາຜູ້ແທນສົມບູນ ໄປຮ່ວມກອງປະຊຸມໃຫຍ່ຂອງພັກ ຄັ້ງທີ XI ຂອງພັກຈຳນວນ 25 ສະຫາຍ ແລະ ສຳຮອງ 3 ສະຫາຍ, ພິເສດກອງປະຊຸມໄດ້ຮັບຟັງການໂອ້ລົມຂອງ ສະຫາຍ ປອ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ເພື່ອເປັນເຂັມຊີ້ທິດເຍືອງທາງທີ່ສໍາຄັນໃຫ້ແກ່ການຈັດຕັ້ງປະຕິບັດມະຕິກອງປະຊຸມໃຫ້ໄດ້ຮັບຜົນສໍາເລັດອັນຈົບງາມ.

                                  


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ