ນາຍົກລັດຖະມົນຕີ ຢ້ຽມຢາມພື້ນຖານການຜະລິດຢູ່ແຂວງຫຼວງພະບາງ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 07 ກ.ຍ 2020 16:00

​ໃນວັນທີ 6 ກັນຍາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ພື້ນຖານການຜະລິດຢູ່ທີ່ແຂວງຫຼວງພະບາງ, ໂດຍການໃຫ້ກຽດຕ້ອນຮັບຂອງ ທ່ານ ຄໍາຂັນ ຈັນທະວີສຸກ, ເຈົ້າແຂວງໆຫຼວງພະບາງ, ມີອໍານາດການປົກຄອງ ແລະ ປະຊາຊົນໃຫ້ການຕ້ອນຮັບ ຢ່າງອົບອຸ່ນ.

​ກ່ອນອື່ນ ທ່ານນາຍົກລັດຖະມົນຕີ ພ້ອມດ້ວຍຄະນະໄປຢ້ຽມຢາມໂຮງງານຜະລິດຊີມັງຄອນ ຕັ້ງຢູ່ບ້ານຜາແດງ, ນະຄອນຫຼວງພະບາງ ແລະ ໄດ້ຮັບຟັງການລາຍງານໂດຍຫຍໍ້ກ່ຽວກັບບໍລິສັດດັ່ງ ກ່າວ ເຊີ່ງບໍລິສັດຊີມັງຄອນ ແມ່ນບໍລິສັດຜະລິດຊີມັງທີ່ໃຫຍ່ທີ່ສຸດໃນໂລກ ໂດຍມີຫຼາຍກ່ວາ 100 ບໍລິສັດຍ່ອຍ ຕັ້ງຢູ່ 21 ແຂວງໃນ ສປ ຈີນ, ນອກນັ້ນຍັງມີສາຂາຢູ່ຕ່າງປະເທດ ເປັນຕົ້ນ ອີນໂດເນເຊຍ, ມຽນມາ, ລາວ, ກຳປູເຈຍ, ຣັດເຊຍ ແລະ ອື່ນໆ.​


​ສໍາລັບການມາຕັ້ງໂຮງງານຜະລິດຊີມັງຄອນ ຢູ່ທີ່ແຂວງຫຼວງພະບາງ ແມ່ນເພື່ອຕອບສະໜອງກັບການຈັດຕັ້ງປະຕິບັດນະໂຍບາຍ ໜຶ່ງແລວທາງ ໜຶ່ງເສັ້ນທາງ ລະຫວ່າງ ສປ ປ ລາວ ແລະ ສປ ຈີນ. ບໍລິສັດດັ່ງກ່າວ ໄດ້ເລີ່ມດໍາເນີນການຜະລິດ ໃນປີ 2019 ແລະ  ໃນຕໍ່ໜ້າບໍລິສັດມີແຜນຈະສ້າງສາຍຜະລິດຊີມັງ ກະລີງເກີ້ເປັນສອງສາຍລະບົບໂມ້ຫີນປູນໂດຍວິທີແຫ້ງແບບໃໝ່ ມີກຳລັງຜະລິດ 2.500 ໂຕນຕໍ່ໍມື້, ຈະຜະລິດໃຫ້ໄດ້ 1.100.000 ໂຕນ/ປີ, ໃຊ້ງົບປະມານໃນການລົງທຶນແມ່ນ 1.800 ຕື້ກີບ ເຊີ່ງຈະໃຊ້ເຕັກໂນໂລຊີໃໝ່ ລວມທັງ ອຸປະກອນທີ່ທັນສະໄໝ ແລະ ກ້າວໜ້າຕາມມາດຕະຖານສາກົນ, ສໍາຄັນແມ່ນຜະລິດທີ່ເປັນມິດກັບສີ່ງແວດລ້ອມ, ທັງນີ້ກໍ່ເພື່ອຕອບສະໜອງຄວາມຕ້ອງການຊົມໃຊ້ພາຍໃນ, ການປະຕິບັດໂຄງການພັດທະນາພື້ນຖານໂຄງລ່າງຕ່າງໆຂອງລັດ ແລະ ສ້າງວຽກເຮັດງານທໍາໃຫ້ປະຊາຊົນ ແລະ ສ້າງລາຍຮັບເຂົ້າງົບປະມານຂອງລັດຖະບານ.

​ຈາກນັ້ນ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມສູນ DATA Center ຕື່ມອີກ.



ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ