ນາຍົກລັດຖະມົນຕີ ເຂົ້າຮ່ວມການທາບທາມບຸກຄະລາກອນ ຄະນະບໍໍລິຫານງານພັກແຂວງຫຼວງພະບາງສະໄໝທີ VIII ຮອບທີ 3

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 07 ກ.ຍ 2020 16:00

ໃນວັນທີ 7 ກັນຍາ 2020 ນີ້ ທີ່ສະໂມສອນຫ້ອງວ່າການແຂວງຫຼວງພະບາງ ໄດ້ຈັດກອງປະຊຸມປະກອບຄໍາເຫັນໃສ່ຮ່າງລາຍງານການເມືອງຕໍ່ກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ, ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX, ຮ່າງບົດສຳຫຼວດການນນຳພາລວມ ແລະ ທາບທາມບຸກຄະລາກອນ ຄະນະບໍໍລິຫານງານພັກແຂວງຫຼວງພະບາງສະ ໄໝທີ VIII ຮອບທີ 3 ໂດຍການໃຫ້ກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ, ມີສະຫາຍເລຂາຄະນະບໍລິຫານງານພັກແຂວງ, ຄະ ນະປະຈໍາພັກແຂວງ ພ້ອມດ້ວຍບັນດາຜູ້ແທນສົມບູນ ເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຮັບຟັງການຜ່ານຮ່າງບົດສຳຫຼວດການນຳພາລວມ ແລະ ລາຍງານຜົນການດຳເນີນກອງປະຊຸມ ຄົບຄະ ນະບໍລິຫານງານພັກແຂວງທ້າຍສະໄໝ VII, ພ້ອມທັງ ສະເໜີມາດຖານເງື່ອນໄຂຜູ້ຮັບສະໝັກເລືອກຕັ້ງ ເປັນຄະນະບໍລິຫານງານພັກແຂວງ, ຄະນະປະຈຳພັກແຂວງ, ປະທານ-ຮອງປະທານກວດກາພັກ ແລະ ເລຂາ-ຮອງເລຂາຄະນະບໍລິຫານງານພັກແຂວງ, ຈາກນັ້ນ ຈະໄດ້ດຳເນີນການທາບທາມບຸກຄະລາກອນ, ຄະນະບໍໍລິຫານງານພັກແຂວງຫຼວງພະບາງ ສະໄໝທີ VIII ຮອບທີ 3 ຢ່າງເປັນທາງການ ໂດຍມີເປົ້າໝາຍສະໝັກເປັນຄະນະບໍລິຫານງານພັກແຂວງ 52 ສະຫາຍ, ຍິງ 6 ສະຫາຍ, ເລືອກເອົາ 42 ສະຫາຍ.


ໃນໂອກາດເຂົ້າຮ່ວມໃນຄັ້ງນີ້, ໂດຍໄດ້ຮັບການມອບໝາຍຈາກກົມການເມືອງສູນກາງພັກ ເພື່ອຕິດຕາມ, ຊຸກຍູ້ ການກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ VIII  ຂອງອົງຄະນະພັກແຂວງຫຼວງພະບາງ, ສະຫາຍ ທອງລຸນ ສີສຸລິດ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ໄດ້ມີຄໍາເຫັນໂອ້ລົມ ແລະ ເນັ້ນໜັກຕໍ່ກອງປະຊຸມໃນຄັ້ງນີ້ ຄື: 1). ກ່ອນອື່ນໝົດ ໃຫ້ເຫັນໄດ້ບົດບາດຄວາມສຳຄັນ ຂອງຜູ້ແທນສົມບູນ ທີ່ຈະເຂົ້າຮ່ວມກອງປະຊຸມໃຫຍ່ ຕ້ອງເຂົ້າໃຈວ່າ ຕົນເອງໄດ້ຮັບຄວາມເຊື່ອໝັ້ນ, ຄວາມໄວ້ວາງໃຈ ຈາກສະມາຊິກພັກ ທີ່ໄດ້ເລືອກເອົາເປັນຕົົວແທນໃຫ້ເຂົາເຈົ້າ ເຂົ້າຮ່ວມກອງປະຊຸມໃຫຍ່ຂອງອົງຄະນະພັກແຂວງຄັ້ງນີ້; 2). ໃຫ້ເຫັນໄດ້ພາລະບົດບາດ ຄວາມສຳຄັນຂອງຄະນະບໍລິຫານງານພັກແຂວງ. ຄະນະບໍລິຫານງານພັກແຂວງ ເປັນອົງການນຳສູງສຸດ ຂອງອົງຄະນະພັກແຂວງ ເປັນຜູ້ທີ່ເຮັດບົດບາດ ໃນການຊີ້ນຳ-ນຳພາ, ຜັນຂະຫຍາຍ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດ ຂອງພັກ, ມະຕິ, ຄຳສັ່ງ, ແຜນພັດທະນາເສດຖະກິດ-ສັງຄົມ, ລະບຽບ ກົດໝາຍ ຂອງລັດ ແລະ ມະຕິກອງປະຊຸມໃຫຍ່ ໂດຍສະເພາະບັນດາຄາດໝາຍ ສູ້ຊົນດ້ານຕ່າງໆ ທີ່ກອງປະຊຸມໃຫຍ່ ຄັ້ງທີ VIII ນີ້ ວາງອອກ (2020-2025) ຈະຖືກຈັດຕັ້ງປະຕິບັດໃຫ້ເປັນຮູບປະທໍາ; 3). ການພິຈາລະນາເລືອກເຟັ້ນບຸກຄະລາກອນ ຕ້ອງບົນພື້ນຖານອີງໃສ່ມາດຕະຖານ, ເງື່ອນໄຂລວມ ຂອງພະນັກງານ ນຳພາ-ຄຸ້ມຄອງ ແລະ ມາດຕະຖານ ສະເພາະຂອງຄະນະບໍລິຫານງານພັກແຂວງ, ເຊິ່ງມີ 5 ເນື້ອໃນ ຕົ້ນຕໍ ຄື: ດ້ານຄຸນທາດການເມືອງ; ດ້ານຄຸນສົມບັດສິນທຳປະຕິວັດ, ແບບແຜນດຳລົງຊີວິດ; ດ້ານຄວາມຮູ້, ຄວາມສາມາດ; ແບບແຜນການນຳພາ-ວິທີເຮັດວຽກ ແລະ ດ້ານສຸຂະພາບ; 4). ໃຫ້ເອົາໃຈໃສ່ດ້ານໂຄງປະກອບຂອງຄະນະບໍລິຫານງານພັກ ຊຸດໃໝ່ ຕາມທັດສະນະຊີ້ນຳ ລວມສູນກາງ, ໂຄງປະກອບຄະນະພັກຊຸດໃໝ່ ແມ່ນຮັບປະກັນໃຫ້ມີຄະນະພັກຊຸດເກົ່າ ແລະ ຜູ້ຈະເຂົ້າໃໝ່ ໃຫ້ມີ 3 ຮຸ່ນຄົນ (ຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ) ເພື່ອຮັບປະກັນລັກສະນະສືບທອດຕໍ່ເນື່ອງ ໃນການນຳພາ, ໃນນັ້ນ ໃຫ້ມີຮຸ່ນກາງ ແລະ ຮຸ່ນໜຸ່ມ ກວມອັດຕາສ່ວນຫຼາຍ. ສໍາຄັນ ສະຫາຍ ທອງລຸນ ສີສຸລິດ ຍັງໄດ້ຮຽກຮ້ອງ ແລະ ເນັ້ນຕື່ມໃຫ້ບັນດາສະຫາຍຜູ້ແທນສົມບູນ ແລະ ບັນດາສະຫາຍທີ່ເຂົ້າຮ່ວມກອງປະຊຸມ ທັງໝົດ ຈົ່ງພ້ອມກັນຍົກສູງ ຄວາມຮັບຜິດຊອບການເມືອງຂອງຕົນ, ເລືອກໃຫ້ໄດ້ບຸກຄົນ ທີ່ມີຄວາມເໝາະສົມ ເພື່ອອອກສະໝັກຮັບເລືອກຕັ້ງ ເປັນຄະນະພັກຊຸດໃໝ່, ແນໃສ່ໃຫ້ຄະນະພັກແຂວງຊຸດໃໝ່ ມີຄວາມໜັກແໜ້ນ, ເຂັ້ມແຂງ, ມີຄວາມສາມັກຄີ ເປັນປຶກແຜ່ນ ເພື່ອສືບຕໍ່ນຳພາ, ປົກປັກຮັກສາ ແລະ ພັດທະນາແຂວງຫຼວງພະບາງ ໃຫ້ໄດ້ຮັບການພັດທະນາຢ່າງບໍ່ຢຸດຢັ້ງ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ