ທ່ານ ສອນໄຊ ສີພັນດອນ ຊຸກຍູ້ວຽກງານອຸດສາຫະກຳ ແລະ ການຄ້າ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 02 ກ.ຍ 2020 12:00

ໃນວັນທີ 22 ສິງຫາ 2020 ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະ ໄດ້ລົງຢ້ຽມຢາມນິຄົມອຸດສາຫະກຳ ແລະ ການຄ້າວຽງຈັນ-ໂນນທອງ ຫຼື (VITA PARK) ເພື່ອປະເມີນຄືນຂໍ້ສະດວກ, ຂໍ້ຫຍຸ້ງຍາກ ໃນການດໍາເນີນທຸລະກິດ ພ້ອມທັງ ຮັບຟັງແຜນການພັດທະ ນາໃນອະນາຄົດໃນເຂດດັ່ງກ່າວ, ໂດຍໃຫ້ການຕ້ອນຮັບຂອງທ່ານ ສົມຈິດ ອິນທະມິດ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ.


ໂອກາດນີ້, ທ່ານ ທອງທິບ ພັນນຸລາດ, ຮັກສາການປະທານສະພາບໍລິຫານ ເສດຖະກິດນິຄົມອຸດສາຫະກຳ ແລະ ການຄ້າວຽງຈັນ-ໂນນທອງ ໄດ້ລາຍງານໂດຍຫຍໍ້ ກ່ຽວກັບສະພາບການພັດທະນາ ວ່າ: ຜົນສຳເລັດຂອງການພັດ ທະນາໃນໄລຍະທີ 01 (ເນື້ອທີ່ 110 ເຮັກຕາ) ປະຈຸບັນ ມີນັກລົງທຶນຕ່າງປະເທດ ເປັນຕົ້ນ: ສປ ຈີນ, ຍີ່ປຸ່ນ, ໄທ, ໄຕ້ຫວັນ, ຮົງກົງ ແລະ ເດັນມາກ ເຂົ້າມາຈອງ ແລະ ເຊັນໃບທະບຽນໄປແລ້ວ ຈຳນວນ 67 ບໍລິສັັດ ມີທຶນຈົດທະບຽນທັງໝົດ 72,088,000ໂດລາ. 

ມາຮອດດຽວນີ້, ໄດ້ຈອງເນື້ອທີ່ເທົ່າກັບ 90%  ຂອງເນື້ອທີ່ດີນທັງໝົດ ເພື່ອດໍາເນີນກິດຈະການຜະລິດເພື່ອສົ່ງອອກ, ໃນນັ້ນ ໄດ້ດຳເນີນການການຜະລິດເພື່ອສົ່ງອອກ ແລະ ເຄື່ອນໄຫວຕົວຈິງຈຳນວນ 32 ບໍລິສັດ, ກຽມດຳເນີນເປີດໂຮງງານອີກ 01 ບໍລິສັດ, ກຳລັງກໍ່ສ້າງໂຮງງານອີກ 01 ບໍລິສັດ ແລະ ກໍາຂະຫຍາຍໂຮງງານເພີ່ມອີກ 02 ບໍລິສັດ (ຄາດວ່າໃນປີ 2021 ຈະມີ 03-05 ບໍລິສັດ ເລີ່ມດໍາເນີນການຜະລິດ-ສົ່ງອອກຕື່ມອີກ) ແລະ ສ່ວນທີ່ເຫຼືອແມ່ນຢູ່ໃນໄລຍະກະກຽມ. 
ປະຈຸບັນ, ມີມູນຄ່າການນຳເຂົ້າສິນຄ້າທັງໝົດ 225,172,498.18 ໂດລາ ແລະ ມູນຄ່າການສົ່ງອອກສິນຄ້າ 206,235,284.81 ໂດລາ ຊຶ່ງກິດຈະການສ່ວນໃຫຍ່ ເປັນການຜະລິດເພື່ອສົ່ງອອກເຊັ່ນ: ເຄື່ອງນຸ່ງຫົ່ມ, ສິ້ນສ່ວນອຸປະກອນເອເລັກໂຕຼນິກ, ສາຍໄຟສຳລັບການເຮັດນໍ້າອຸ່ນ, ສາຍໄຟແອເຢັນ, ທູບຈອດ, ເຄື່ອງມືອຸປະກອນການຜະລິດເຕັກນິກ, ຜະລິດຕະພັນປຸງແຕ່ງອາຫານ, ນໍ້າປາ, ນໍ້າສະອີວ, ນໍ້າມັນພືດ ຂອງບໍລິສັດ ຫອຍຫຼອດ ປະເທດໄທ; ຜະລິດຕະພັນຮັບໃຊ້ ການຜະລິດກະສິກຳຂອງບໍລິສັດຊີພີ, ການຜະລິດປຸງແຕ່ງວັດສະດຸກໍ່ສ້າງ, ຜະລິດຫົວອາຫານສັດ, ຕໍ່າແຜ່ນ ແລະ ອື່ນໆ. 
ນິຄົມແຫ່ງນີ້ ສາມາດສ້າງວຽກເຮັດງານທຳໃຫ້ປະຊາຊົນອ້ອມຂ້າງໄດ້ 3.532 ຄົນ (ໃນນັ້ນ ຕ່າງປະເທດ 85 ຄົນ) ແລະ ຄາດໃນສົກປີ 2021 ຈະສາມາດສ້າງວຽກເຮັດງານທໍາ ໃຫ້ປະຊາຊົນລາວໄດ້ເຖີງ 4.000-5.000 ຄົນ. ພ້ອມດຽວກັນນີ້, ສະພາບໍລິຫານເສດຖະກິດ ນອຄວ ສາມາດເກັບພັນທະອາກອນ ແລະ ມອບອາກອນໃນປີ 2019 ໄດ້ມອບຈຳນວນ 2.314.069.250 ກີບ. ສ່ວນເງີນການແບ່ງປັນຜົນ 30% ຂອງພາກລັດ ໄດ້ຮັບຈຳນວນ 715.940,69 ໂດລາສະຫາລັດ. 

ໄປຄຽງຄູ່ກັບການດຶງດູດການນັກທຸລະກິດ ເຂົ້າມາລົງທືນໃນເນື້ອທີ່ຂອງນິຄົມແລ້ວ ຍັງໄດ້ດຳເນີນການກໍ່ສ້າງພື້ນຖານໂຄງລ່າງໄປພ້ອມໆກັນຢ່າງຕໍ່ເນື່ອງ ເຊັ່ນ: ເສັ້ນທາງເບຕົງພາຍໃນນິຄົມ ແລະ ເຂົ້າຫາແຕ່ລະໂຮງງານ, ລະບົບນ້ຳປະປາເຂົ້າຫາແຕ່ລະໂຮງງານ, ສຳເລັດການກໍ່ສ້າງລະບົບຕາຂ່າຍສະຖານີຈ່າຍໄຟຟ້າ (115Kv-110MVA) ພາຍໃນນິຄົມ ເພື່ອຮັບປະກັນຕອບສະໜອງໄຟຟ້າ ໃຫ້ແກ່ບັນດາໂຮງງານ ໄດ້ຢ່າງພຽງພໍ, ກໍ່ສ້າງຫ້ອງການ, ປະຕູໂຂງເຂົ້ານິຄົມ, ຮ່ອງນ້ຳອ້ອມນິຄົມ, ຮົ້ວອ້ອມນິຄົມ ແລະ ອື່ນໆ. ນອກນັ້ນ, ຍັງຈະໄດ້ກຳລັງກໍ່ສ້າງອ່າງບຳບັດນ້ຳເສັຍ, ອ່າງເກັບນ້ຳ 5,000-6,000 ແມັດກ້ອນ/ມື້, ໂຮງຮຽນເຕັກນິກວິຊາຊີບ.​

ສໍາລັບຂໍ້ສະດວກ:  ຜູ້ພັດທະນາ, ຜູ້ລົງທຶນສ່ວນໃຫຍ່ ໄດ້ເຂົ້າໃຈ ແລະ ເອົາໃຈໃສ່ປະຕິບັດລະບຽບກົດໝາຍຂອງ ສປປ ລາວ ກໍ່ຄືກົດລະບຽບຂອງນິຄົມເປັນຢ່າງດີ. ນອກນັ້ນ ຍັງໄດ້ປະຕິບັດພັນທະຕ່າງໆ ໃຫ້ລັດຖະບານຢ່າງເປັນປົກກະຕິ; ນັກລົງທຶນມີຄວາມພໍໃຈ ຍ້ອນການເຮັດການບໍລິການປະຕູດຽວຢູ່ກັບທີ່ ຊຶ່ງມີຄວາມສະດວກ ແລະ ວ່ອງໄວ. ນອກນັ້ນ, ຂະແໜງທີ່ກ່ຽວຂ້ອງ ກໍ່ໃຫ້ຄວາມຮ່ວມສະນັນສະໝູນເປັນຢ່າງດີ; ສາມາດສ້າງວຽກເຮັດງານໃຫ້ປະຊາຊົນ ແລະ ປະຊາຊົນອ້ອມຂ້າງນິຄົມ ໄດ້ມີສ່ວນຮ່ວມໃນການສ້າງລາຍຮັບ; ການຂະຫຍາຍເນື້ອທີ່ໄລຍະສອງ 142 ເຮັກຕາ ກໍ່ໄດ້ການຮ່ວມມືເປັນຢ່າງດີ ຈາກພາກລັດກໍ່ຄື ຂະແໜງການທີ່ກ່ຽວຂ້ອງ.

ສ່ວນຂໍ້ຫຍຸ້ງຍາກ:  ການຊົດເຊີຍເນື້ອທີ່ດິນ ທີ່ຂະຫຍາຍໄລຍະສອງ 142 ເຮັກຕາ ຍັງຊັກຊ້າ ຍ້ອນປະຊາຊົນຈຳນວນໜຶ່ງ ຍັງບໍ່ຍອມຮັບເອົາຄ່າຊົດເຊີຍ ແລະ ຈຳນວນໜຶ່ງ ກໍ່ບໍ່ສາມາດຕິດຕໍ່ໄດ້. ນອກນັ້ນ, ຍັງມີດິນຂອງຄ້າຍທະຫານ ແລະ ດິນຂອງກະຊວງການເງີິນຈຳນວນໜຶ່ງ ມີຄວາມຫຍຸ້ງຍາກໃນການຊົດເຊີຍ.

ຂໍ້ສະເໜີ:  ສະເໜີໃຫ້ທາງກະຊວງພະລັງງານ ແລະ ບໍ່ແຮ່ ພິຈາລະນາຄົ້ນຄວ້າລາຄາໄຟຟ້າພາກອຸດສາຫະກຳຄືນໃໝ່ ເພື່ອໃຫ້ນິຄົມສາມາດປະຕິບັດລາຄາໄຟຟ້າໃໝ່ ຕາມແຈ້ງການຂອງລັດຖະບານ ນັບແຕ່ເດືອນ 05/2020 ເປັນຕົ້ນມາ.

ທິດທາງແຜນການຕໍ່ໜ້າ: ຫຼັງຈາກດຳເນີນການໄລຍະທີ 01 ສຳເລັດແລ້ວ, ຈະໄດ້ສືບຕໍ່ພັດທະນາເນື້ອທີ່ໄລຍະທີສອງ 142 ເຮັກຕາ. ປະຈຸບັນ ໄດ້ສຳເລັດຂັ້ນຕອນການສຳຫຼວດວັດແທກ ແລະ ກຳລັງຊົດເຊີຍໄດ້ຈຳນວນໜຶ່ງແລ້ວ ຈະລວມມີຂະແໜງການເຕັກໂນໂລຊີ ແລະ ວິທະຍາສາດ, ເຂດຊີວະວິທະຍາ ກ່ຽວກັບປຸງແຕ່ງກະສິກໍາ, ເຂດສຶກສາວັດທະນະທໍາ ແລະ ສາທາລະນະສຸກ ແລະ ເຂດສູນການຄ້າທຸລະກິດ, ຊຶ່ງທັງໝົດນັ້ນ ຈະໄດ້ດໍາເນີນໄປພ້ອມໆກັນ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ