ການນຳເຮົາ ເຂົ້າຮ່ວມງານລ້ຽງ ສະເຫຼີມສະຫຼອງວັນຊາດຫວຽດນາມ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 31 ສ.ຫ 2020 11:00

​​​​ເນື່ອງໃນວັນໂອກາດ ໃກ້ຈະເຖິງວັນຊາດແຫ່ງ ສສ ຫວຽດນາມ ຄົບຮອບ 75 ປີ (2 ກັນຍາ 1945 ຫາ 2 ກັນຍາ 2020) ສະຖານເອກອັກຄະລັດຖະທູດແຫ່ງ ສສ ຫວຽດນາມ ປະຈໍາ ລາວ ໄດ້ຈັດງານລ້ຽງອາຫານຄໍ່າ ເພື່ອເປັນການສະເຫຼີມສະຫຼອງ ໃນວັນທີ 28 ສິງຫາ ທີ່ໂຮງແຮມເມືອງແທ໋ງ,ນະຄອນຫຼວງວຽງຈັນ.


ເປັນກຽດເຂົ້າຮ່ວມງານ ມີສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ຫົວໜ້າອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ; ສະຫາຍ ຈັນສີ ໂພສີຄຳ, ກຳມະການກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ; ສະຫາຍ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ  ພ້ອມດ້ວຍ ບັນດາແຂກຖືກເຊີນ.​

​​​​ໃນພິທີ ສະຫາຍ ຫງວຽນ ບ໋າຮຸ່ງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາລາວ ໄດ້ກ່າວບາງຕອນສໍາຄັນວ່າ: ໃນຕອນເຊົ້າຂອງວັນທີ 2 ກັນຍາ 1945 ຢູ່ສະໜາມຫຼວງບາດິ່ງປະຫວັດສາດ, ປະທານໂຮ່ຈິມິນ ໄດ້ອ່ານບົດປະກາດເອກະລາດ ສະຖາປະນາປະເທດສາທາລະນະລັດ ປະຊາທິປະໄຕ ຫວຽດນາມ ຊຶ່ງເຮັດໃຫ້ຫວຽດນາມ ຈາກດິນແດນຫົວເມືອງຂຶ້ນແຫ່ງໜຶ່ງທີ່ບໍ່ມີຊື່ ໄດ້ກາຍເປັນປະເທດໜຶ່ງ ທີ່ມີລະບົບການເມືອງເອກະລາດ,ມີອະທິປະໄຕ ແລະ ມີສິດຕັດສິນດ້ວຍຕົນເອງ ກ່ຽວກັບເສັ້ນທາງພັດທະນາຂອງຕົນ.  ຫວຽດນາມ ມີການພົວພັນກັບ 500 ກວ່າອົງການຈັດຕັ້ງສາກົນ, ພົວພັນການທູດກັບ 187 ປະເທດ, ມີການພົວພັນເປັນຄູ່ຮ່ວມມືຍຸດທະສາດ ແລະ ຮ່ວມມືຮອບດ້ານກັບ 30 ປະເທດ.

​​​ກ້າວເຂົ້າສູ່ປີ 2020,  ທົ່ວໂລກພວມປະເຊີນໜ້າກັບສິ່ງທ້າທາຍ, ຊຶ່ງຫວຽດນາມ ກໍ່ແມ່ນໜຶ່ງໃນນັ້ນ ທີ່ປະສົບກັບພະຍາດໂຄວິດ-19 ອັນໄດ້ສົ່ງຜົນກະທົບ ຕໍ່ສຸຂະພາບຂອງມວນມະນຸດ ແລະ ເສດຖະກິດ-ສັງຄົມ, ໄດ້ເຮັດໃຫ້ປ່ຽນວິຖີຊີວິດມວນມະນຸດ.  ມາເຖິງປະຈຸບັນ  ຄົນກໍາລັງເວົ້າເຖິງ “ໂລກຫຼັງໂຄວິດ-19” ໃນສະພາບການດັ່ງກ່າວ, ດ້ວຍຄວາມຕັດສິນໃຈຂອງທົ່ວປວງຊົນທັງຊາດ ແລະ ທົ່ວລະບົບການເມືອງ, ຫວຽດນາມ ຍັງຄົງບືນຕົວກ້າວຂຶ້ນຢ່າງໜັກແໜ້ນ ສູ້ຊົນປະຕິບັດ 2 ໜ້າທີ່ ຄື: “ທັງປ້ອງກັນ ແລະ ຕ້ານພະຍາດ”,  ຖືການຮັກສາສຸຂະພາບຂອງປະຊາຊົນ ເປັນບູລິມະສິດອັນດັບໜຶ່ງ, ທັງສືບຕໍ່ພັດທະນາເສດຖະກິດ ແລະ ບັນລຸໄດ້ບັນດາຜົນງານທີ່ເປັນໜ້າຊື່ນຊົມ.  ໃນ 6 ເດືອນຕົ້ນປີ 2020 GDPເຕີບໂຕບວກ ຄືບັນລຸໄດ້ 1,81% ;  ຕາມບົດລາຍງານຫວ່າງແລ້ວນີ້ ຂອງທະນາຄານໂລກ  ການເຕີບໂຕຂອງເສດຖະກິດຫວຽດນາມ ປີ 2020  ຈະສູງໃນອັນດັບ 5 ຂອງໂລກ ອາດບັນລຸໃນລະດັບ 2,8% ແລະ ປີ 2021 ອາດບັນລຸ 6,8% ຖ້າເງື່ອນໄຂສະດວກ.  ທະນາຄານໂລກ ຫາກໍຈັດຫວຽດນາມ ແມ່ນ 1 ໃນ 6 ພື້ນຖານເສດຖະກິດທີ່ພົ້ນເດັ່ນໃໝ່ ທີ່ປະສົບຜົນສໍາເລັດທີ່ສຸດຢູ່ໃນໂລກ.  ໃນ 7 ເດືອນຕົ້ນປີ ການລົງທຶນໂດຍກົງ ຈາກຕ່າງປະເທດ ບັນລຸໄດ້ມູນຄ່າ 3,15 ຕື້ USD , ເພີ່ມຂຶ້ນ 79,8% ທຽບກັບໄລຍະດຽວກັນຂອງປີກາຍ;  ການສົ່ງອອກເກີນດູນ 7,5 ຕື້ USD.

​​​ມື້ນີ້, ຂ້າພະເຈົ້າຮູ້ສຶກເປັນກຽດຢ່າງສູງ ທີ່ໄດ້ຮ່ວມກັບເພື່ອນລາວອ້າຍນ້ອງ, ເພື່ອນມິດສາກົນ ຫວນຄືນປະຫວັດສາດ ອັນສະຫງ່າລາສີຂອງຊາດຫວຽດນາມ  ໃນໄລຍະ 75 ປີທີ່ຜ່ານມາ ພວກຂ້າພະເຈົ້າຮູ້ສຶກພາກພູມໃຈ ແລະ ຕື້ນຕັນໃຈຫຼາຍ;  ຂ້າພະເຈົ້າຂໍຄັດຈ້ອນຄໍາປາໄສຂອງ ເລຂາທິການໃຫຍ່, ປະທານປະເທດຫວຽດນາມ ຫງວຽນ ຝູ ຈ້ອງ ທີ່ໄດ້ກ່າວໃນພິທີສະເຫຼີມສະຫຼອງ ວັນສ້າງຕັ້ງພັກກອມມູນິດຫວຽດນາມ ຄົບຮອບ 90 ໃນວັນທີ 3 ກຸມພາ 2020 ວ່າ: “ດ້ວຍຄວາມຄ່ຽມຄົມຂອງນັກປະຕິວັດ ສາມາດເວົ້າໄດ້ວ່າ ບໍ່ທັນມີຍາມໃດ ທີ່ປະເທດຫວຽດນາມ ມີພາລະກິດອັນໜັກແໜ້ນ, ມີກໍາລັງບົ່ມ, ຫວຽດນາມ ຈະຈົດຈໍາເອົາການສະໜັບສະໜູນ, ການຊ່ວຍເຫຼືອຂອງຫຼາຍປະເທດ ກໍຄືວົງຄະນາຍາດສາກົນ ທີ່ມີຕໍ່ພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ, ສ້າງສາປະເທດຊາດ ທີ່ແສນຮັກຂອງພວກຂ້າພະເຈົ້າ.

​​​ຕະຫຼອດໄລຍະປະຫວັດສາດ ກໍຄືໃນອະນາຄົດ, ຍາມໃດຫວຽດນາມ ກໍຖືເປັນສໍາຄັນ ແລະ ໃຫ້ບູລິມະສິດແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ກັບປະຊາຊົນ ແລະ ປະເທດລາວອ້າຍນ້ອງ. ໃນພິທີສະເຫຼີມສະຫຼອງອັນສະຫງ່າລາສີ ທີ່ມີຄວາມໝາຍສໍາຄັນຍິ່ງນີ້, ຂ້າພະເຈົ້າ ຕາງໜ້າພັກ, ລັດ ແລະ ປະຊາຊົນ ຫວຽດນາມ ຂໍສະແດງຄວາມຮູ້ບຸນຄຸນ ຈາກສ່ວນເລິກຂອງຫົວໃຈມາຍັງພັກ, ລັດ ແລະ ປະຊາຊົນລາວ ອ້າຍນ້ອງ ທີ່ຍາມໃດ ກໍໃຫ້ຄວາມສາມັກຄີ, ສະໜັບສະໜູນ ແລະ ຊ່ວຍເຫຼືອ ແກ່ຫວຽດນາມ,  ສ່ວນຫວຽດນາມ ຂໍສະແດງຄວາມຂອບອົກຂອບໃຈ ແລະ ປາຖະໜາວ່າ ບັນດາປະເທດ ເພື່ອນມິດສາກົນ ຈົ່ງສືບຕໍ່ສະໜັບສະໜູນ ເພື່ອໃຫ້ການພົວພັນຮ່ວມມື ລະຫວ່າງ ຫວຽດນາມ-ລາວ ຂະຫຍາຍຕົວ ຢ່າງຍືນຍົງ, ປະກອບສ່ວນຢ່າງຕັ້ງໜ້າ ໃຫ້ແກ່ສັນຕິພາບ,ຄວາມໝັ້ນຄົງ, ສະຖຽນລະພາບ ແລະ ການພັດທະນາຢູ່ໃນອາຊີ.

​​​ສະຫາຍ ບຸນທອງ ຈິດມະນີ ໄດ້ກ່າວໃນພິທີທີ່ມີຄວາມໝາຍສໍາຄັນ ໂດຍສະແດງຄວາມຊົມເຊີຍຢ່າງສຸດອົກສຸດໃຈຕໍ່ບັນດາຜົນສໍາເລັດອັນໃຫຍ່ຫຼວງ ໃນການພັດທະນາເສດຖະກິດ-ສັງຄົມ ກໍຄືຂົງເຂດການຕ່າງປະເທດ ທີ່ສສຫວຽດນາມ ຍາດມາໄດ້ໃນຕະຫຼອດໄລຍະທີ່ຜ່ານມາ; ເຫັນສາຍພົວພັນຮ່ວມມືຮອບດ້ານ ລະຫວ່າງ ສອງປະເທດ ລາວ-ຫວຽດນາມ ທີ່ນັບມື້ໜັກແໜ້ນ ແລະ ເລິກເຊິ່ງ ຂອງພັກ-ລັດຖະບານ,  ພວກຂ້າພະເຈົ້າ ຢືນຢັນຈະສືບຕໍ່ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ ໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ ແລະ ຂໍຢືນຢັນຢ່າງໜັກແໜ້ນວ່າ ເຖິງສະພາບການພາກພື້ນ ແລະ ໃນໂລກ ຈະມີການປ່ຽນແປງແນວໃດກໍຕາມ ຈະເຮັດສຸດຄວາມສາມາດຂອງຕົນ ຮ່ວມກັບສະຫາຍຫວຽດນາມອ້າຍນ້ອງ ເພື່ອປົກປັກຮັກສາ ແລະ ເສີມຂະຫຍາຍມູນເຊື້ອແຫ່ງຄວາມສາມັກຄີພິເສດ ທີ່ປະທານໂຮ່ຈິມິນຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ໄດ້ພ້ອມກັນສ້າງຂຶ້ນ ແລະ ການນໍາຮຸ້ນຕ່າງໆ ຂອງສອງພັກ, ສອງລັດ ໄດ້ຮ່ວມກັບປະຊາຊົນສອງຊາດ ພ້ອມກັນຖະນຸຖະໜອມຕະຫຼອດມານັ້ນ ໃຫ້ໝັ້ນຄົງທະນົງແກ່ນ ຕະຫຼອດໄປ.​ ​​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ