ແຈ້ງ​ຂ່າວນາຍົກລັດຖະມົນຕີ ຕ້ອນຮັບຄະນະຜູ້ແທນຍີ່ປຸ່ນ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອາທິດ, 23 ສ.ຫ 2020 17:00

​ໃນວັນທີ 23 ສິງຫາ 2020 ທີ່ສໍານັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂມເຕງິ ໂທຊິມິດຊຶ (Mr. MOTEGI Toshimitsu) ລັດຖະມົນຕີຕ່າງປະເທດຍີ່ປຸ່ນ ພ້ອມດ້ວຍຄະນະ ເນື່ອງໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກງານຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 22-24 ສິງຫາ 2020.

ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີນຕ້ອນຮັບ ແລະ ຕີລາຄາສູງ ຕໍ່ການເດີນທາງມາເຄື່ອນໄຫວຢ້ຽມຢາມຂອງ ທ່ານ ໂມເຕງິ ພ້ອມດ້ວຍຄະນະໃນຄັ້ງນີ້, ເຊິ່ງເປັນນິມິດໝາຍທີ່ສຳຄັນໃນການສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ເປັນການພົວພັນທີ່ມີມູນເຊື້ອອັນດີງາມມາແຕ່ດົນນານ ແລະ ນັບມື້ນັບໄດ້ຮັບການເສີມຂະຫຍາຍໃຫ້ແໜ້ນແຟ້ນຍິ່ງໆຂຶ້ນ, ໂດຍສະເພາະ ໄດ້ເປັນການປະກອບສ່ວນອັນສໍາຄັນ ໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດ (05 ມິຖຸນາ 1955) ຄົບຮອບ 65 ປີ ແລະ ການເປັນຄູ່ຮ່ວມຍຸດທະສາດ (ຍົກລະດັບໃນປີ 2015) ລະຫວ່າງ ສອງປະເທດ ລາວ ແລະ ຍີ່ປຸ່ນ ຄົບຮອບ 05 ປີ. ນອກຈາກນີ້, ການຮ່ວມມືໃນດ້ານຕ່າງໆຂອງສອງປະເທດ ກໍມີການຂະຫຍາຍຕົວ ໂດຍສະເພາະແມ່ນ ການຄ້າສອງຝ່າຍ ລາວ-ຍີ່ປຸ່ນ, ກໍຄືການລົງທຶນຂອງຍີ່ປຸ່ນຢູ່ ສປປ ລາວ ມີທ່າອ່ຽງເພີ່ມຂຶ້ນທຸກປີ ເຊິ່ງເປັນການລົງທຶນທີ່ມີປະສິດທິຜົນສູງ ແລະ ໄດ້ສ້າງວຽກເຮັດງານທໍາໃຫ້ແກ່ປະຊາຊົນລາວ ກໍຄືປະກອບສ່ວນສໍາຄັນເຂົ້າໃນການພັດທະນາເສດຖະກິດຂອງ ສປປ ລາວ ໃຫ້ຂະຫຍາຍຕົວຂຶ້ນຕື່ມເທື່ອລະກ້າວ. ທ່ານ ນາຍົກລັດຖະມົນຕີ ໄດ້ຕາງໜ້າໃຫ້ລັດຖະບານ ກໍ່ຄືປະຊາຊົນລາວ ສະແດງຄວາມຂອບໃຈມາຍັງລັດຖະບານຍີ່ປຸ່ນ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ ສປປ ລາວ ໃນດ້ານຕ່າງໆຕະຫຼອດມາ ເປັນຕົ້ນ ການພັດທະນາພື້ນຖານໂຄງລ່າງ, ຊັບພະຍາກອນມະນຸດ, ສາທາລະນະສຸກ, ການປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ກະສິກຳ-ປ່າໄມ້, ການແກ້ໄຂບັນຫາໄພພິບັດ, ລວມທັງ ການສົ່ງອາສາສະໝັກ ແລະ ຊ່ຽວຊານຍີ່ປຸ່ນ ມາປະຕິບັດໜ້າທີ່ໃນການຮ່ວມມື ແລະ ຊ່ວຍເຫຼືອ ສປປ ລາວ ໃນຂະແໜງການຕ່າງໆ ເຊິ່ງເປັນການປະກອບສ່ວນສໍາຄັນໃນການພັດທະນາ ເສດຖະກິດ-ສັງຄົມຂອງ ສປປ ລາວ. ພ້ອມກັນນີ້, ສປປ ລາວ ກໍຈະສືບຕໍ່ເພີ່ມທະວີການຮ່ວມມືກັບຝ່າຍຍີ່ປຸ່ນ, ຊຸກຍູ້ສົ່ງເສີມ ແລະ ສ້າງເງື່ອນໄຂ ອຳນວຍຄວາມສະດວກໃຫ້ການລົງທຶນຂອງຍີ່ປຸ່ນ ຢູ່ ສປປ ລາວ, ສືບຕໍ່ຄົ້ນຄວ້າປຶກສາຫາລືຮ່ວມກັນ ກ່ຽວກັບຄວາມອາດສາມາດ ແລະ ເງື່ອນໄຂໃນການຈັດຕັ້ງປະຕິບັດມາດຕະການຜ່ອນຜັນ ເພື່ອສົ່ງເສີມການໄປມາຫາສູ່ລະຫວ່າງປະຊາຊາຊົນສອງຊາດ ໂດຍຮັບປະກັນມາດຕະການປ້ອງກັນການຕິດເຊື້ອ. ນອກນັ້ນ, ທ່ານ ນາຍົກລັດຖະມົນຕີ ຍັງໄດ້ຝາກຄວາມຢ້ຽມຢາມຖາມຂ່າວມາຍັງທ່ານນາຍົກ ລັດຖະມົນຕີ ຍີ່ປຸ່ນ, ແລະ ຫວັງຢ່າງຍິ່ງວ່າລັດຖະບານຍີ່ປຸ່ນ ຈະສືບຕໍ່ໃຫ້ການຊ່ວຍເຫຼືອ ສປປ ລາວ ແລະ ຊຸກຍູ້ການລົງທຶນຂອງ ຍີ່ປຸ່ນ ຢູ່ ສປປ ລາວ ຫຼາຍຂື້ນ.
 
ໃນໂອກາດເຂົ້າຢ້ຽມຂໍ່ານັບທ່ານນາຍົກລັດຖະມົນຕີ ໃນຄັ້ງນີ້ ທ່ານ ໂມເຕງິ ພ້ອມດ້ວຍຄະນະ ໄດ້ສະແດງຄວາມຂອບໃຈມາຍັງທ່ານນາຍົກລັດຖະມົນຕີ ແຫ່ງ ສປປ ລາວ ທີ່ເສຍສະຫຼະເວລາອັນມີຄ່າໃຫ້ການຕອນຮັບ ພ້ອມທັງ ໄດ້ແຈ້ງຈຸດປະສົງ ແລະ ຜົນຂອງພົບປະສອງຝ່າຍກັບກັະຊວງການຕ່າງປະເທດຂອງລາວ ໃຫ້ທ່ານ ນາຍົກລັດຖະມົນຕີ ຊາບ ແລະ ສັນຍາວ່າຈະສືບຕໍ່ຮັດແໜ້ນສາຍພົວພັນຮ່ວມມືຂອງສອງຊາດ ຢີ່ປຸ່ນ-ລາວ ທີ່ມີມາແຕ່ດົນນານແລ້ວນັ້ນ ໃຫ້ຈະເລີນງອກງາມຍິ່ງໆຂຶ້ນ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ