ທ່ານນາຍົກ ຢ້ຽມຢາມ ແລະ ຊຸກຍູ້ ການພັດທະນາໂຄງການ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 30 ກ.ລ 2020 14:00

​​ໃນຕອນເຊົ້າ ຂອງວັນທີ 30 ກໍລະກົດ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວໄປຢ້ຽມຢາມໂຄງການທ່າບົກ-ທ່ານາແລ້ງ, ເຂດໂລຊິສຕິກ ນະຄອນຫຼວງວຽງຈັນ; ຕິດຕາມຄວາມຄືບໜ້າ ຂອງການກໍ່ສ້າງເສັ້ນທາງລົດໄຟລາວ-ຈີນ ຂອງບໍລິສັດທາງລົດໄຟລາວ-ຈີນ ຢູ່ເຂດບ້ານໄຊ, ເມືອງໄຊທານີ, ນະຄອນຫຼວງວຽງຈັນ ແລະ ໄປຢ້ຽມຊົມພິພິທະພັນວຽງຈັນ ສິນລະປະຮ່ວມສະໄໝ.
ໃນໂອກາດລົງຊຸກຍູ້ການພັດທະນາໂຄງການທ່າບົກ-ທ່ານາແລ້ງ, ເຂດໂລຊິສຕິກ ນະຄອນຫຼວງວຽງຈັນ ຄັ້ງນີ້ ທ່ານນາຍົກລັດຖະມົນຕີ ໄດ້ຮັບຟັງການລາຍງານຫຍໍ້ ກ່ຽວກັບຄວາມຄືບໜ້າ ຂອງການພັດທະນາໂຄງການດັ່ງກ່າວ ຈາກທ່ານ ຈັນທອນ ສິດທິໄຊ, ປະທານບໍລິສັດ ວຽງຈັນ ໂລຊິສຕິກ ພຣາກ ຈຳກັດ ເຫັນວ່າ: ຈະສ້າງເຂດໂລຊິສຕິກ ທີ່ເປັນຕົວເມືອງສີຂຽວ ເນັ້ນທໍາມະຊາດເປັນສ່ວນໃຫຍ່, ເປັນຕົວເມືອງທີ່ທັນສະໄໝ ແລະ ສີວິໄລ ຫຼື GREEN MODERN SMART ຊຶ່ງແຜນແມ່ບົດລວມຂອງໂຄງການດັ່ງກ່າວ ຍັງມີການສ້າງສະຖານີຄ່ຽນຖ່າຍສິນຄ້າ ທ່າບົກ-ທ່ານາແລ້ງ ທີ່ເຊື່ອມຈອດກັບທາງລົດໄຟ ລາວ-ຈີນ ແລະ ທາງລົດໄຟ ລາວ-ໄທ ໂດຍມີໜ້າທີ່ຫຼັກໃນການແກ້ໄຂບັນຫາຄວາມແອອັດ, ຂັ້ນຕອນຫຍຸ້ງຍາກໃນການຂົນສົ່ງສິນຄ້າຂ້າມແດນ ເພື່ອໃຫ້ເປັນພື້ນຖານໂຄງລ່າງແຫ່ງຊາດລະດັບສາກົນ, ປະຈຸບັນ ແມ່ນສຳເລັດການສຳຫຼວດ ແລະ ຈະເລີ່ມກໍ່ສ້າງສໍານັກງານຫ້ອງການ ໃນ ເດືອນສິງຫາທີ່ຈະມາເຖິງນີ້, ຄາດວ່າຈະເລີ່ມໃຫ້ບໍລິການ ໃນເດືອນມີນາ 2021.
ສ່ວນການພັດທະນາເຂດໂລຊິສຕິກ  ນະຄອນຫຼວງວຽງຈັນ ທີ່ຈະກາຍເປັນຕົວເມືອງໃໝ່ນັ້ນ ຄາດວ່າຈະເລີ່ມໃຫ້ບໍລິການໃນເດືອນຕຸລາ 2021, ຖ້າໂຄງການນີ້ສໍາເລັດ ລັດຖະບານ ຈະໄດ້ພື້ນຖານໂຄງລ່າງ ດ້ານໂລຊິສຕິກ ທີີ່ທັນສະໄໝ ສາມາດເຊື່ອມໂຍງກັບສາກົນໄດ້, ເປັນຂອດເຊືີ່ອມຕໍໍ່ການຂົນສົົ່ງຫຼາຍຮູບແບບ ທາງບົກ, ທາງລາງ, ທາງອາກາດ, ເປັນເສັ້ນທາງສູ່ຕະຫຼາດພາກພື້ນ ແລະ ສາກົນ, ອໍານວຍຄວາມສະດວກ ໃຫ້ແກ່ການຂົນສົົ່ງສິນຄ້າ ເປັນອົງປະກອບຫຼັກຂອງໂຄງລ່າງ ຄົມມະນາຄົມ ຂອງຕາໜ່າງການຂົນສົົ່ງທາງບົກ ແລະ ທາງລາງ ຂອງພາກພື້ນ ແລະ ສາກົນ, ເປັນຈຸດບໍລິການ ສ້າງລາຍຮັບ, ຈາກການບໍລິການສິນຄ້າຜ່ານແດນ ແລະ ນໍາເຂົ້າ-ສົົ່ງອອກ (ບໍໍ່ແມ່ນຈຸດຜ່ານກາຍ), ເປັນດ່ານສາກົນ ທີີ່ບໍລິການວ່ອງໄວ, ໂປ່ງໃສ, ມີປະສິດທິພາບ, ແກ້ໄຂຄວາມແອອັດຢູ່ດ່ານຂົວມິດຕະພາບ 1, ເປັນພື້ນຖານ ໃຫ້ແກ່ການຈັດເກັບລາຍຮັບເຂົ້າງົບປະມານຄົບຖ້ວນ ແລະ ເປັນຂໍໍ້ມູນໃຫ້ແກ່ການພັດທະນາເສດຖະກິດ-ສັງຄົມ ແຫ່ງຊາດ. ນອກຈາກນັ້ນ ກໍ່ຊ່ວຍສ້າງຄວາມສາມາດ ແຂ່ງຂັນໃຫ້ແກ່ທຸລະກິດ ແລະ ດຶງດູດນັກລົງທຶນ ທັງພາຍໃນ ແລະ ຕ່າງປະເທດ, ເປັນພື້ນຖານສໍາຄັນໃນການຈໍລະຈອນສິນຄ້າ ໂດຍສະເພາະປະເພດສິນຄ້າກະສິກໍາ; ເປັນແຫຼ່ງລາຍຮັບສໍາຄັນອັນໃໝ່ ທາງດ້ານອຸດສາຫະກໍາການຄ້າ, ການບໍລິການສິນຄ້າຜ່ານແດນ, ເຂດປອດພາສີ ແລະ ບໍລິການ, ເພີ່ມມູນຄ່າຂອງຜະລິດຕະພັນ, ສ້າງວຽກເຮັດງານທໍາ, ພັດທະນາບຸກຄະລາກອນ ທາງດ້ານຂົນສົົ່ງ ໂລຊິສຕິກ ແລະ ບຸກຄະລາກອນລວມຂອງໂຄງການ ບໍໍ່ຕໍ່າກວ່າ 5.000 ຄົນ.
ທ່ານນາຍົົກລັດຖະມົນຕີ ໄດ້ກ່າວສະແດງຄວາມຊົມເຊີຍຕໍ່ໂຄງການດັ່ງກ່າວ ພ້ອມທັງເນັ້ນໃຫ້ບໍລິສັດວຽງຈັນໂລຊິສຕິກ ພຣາກ ກັບ ບໍລິສັດທາງລົດໄຟລາວ-ຈີນ ສືບຕໍ່ປະສານງານກັນ ເຮັດວຽກໃຫ້ກົມກຽວກັນ, ຊ່ວຍເຫຼືອຊຶ່ງກັນ ແລະ ກັນ ຊຶ່ງໂຄງການນີ້ ຈະເປັນສູນກາງທາງດ້ານໂລຊິສຕິກທີ່ໃຫຍ່ທີ່ສຸດ ຕ້ອງສ້າງສິ່ງອື່ນໆມາຊ່ວຍໜູນ ເປັນຕົ້ນແມ່ນ ຮ້ານຄ້າ, ຮ້ານອາຫານ, ການບໍລິການອື່ນໆ, ຖ້າບໍ່ມີໂຄງການ ແມ່ນຈະບໍ່ສາມາດສໍາເລັດໄດ້ ແລະ ຕ້ອງສ້າງເຂດໂລຊິສຕິກ ຕາມແຜນແມ່ບົດ ທີ່ຈະມີຕົວເມືອງໃໝ່ ທີ່ເປັນຕົວເມືອງສີຂຽວ, ທັນສະໄໝ, ສີວິໄລ ໄດ້ຢ່າງຖືກຕ້ອງ.

ຫຼັ້ງຈານນັ້ນ, ທ່ານນາຍົກລັດຖະມົນຕີ ພ້ອມຄະນະ ໄດ້ເດີນທາງໄປສະຖານີລົດໄຟໂດຍສານ ນະຄອນຫຼວງວຽງຈັນ ຊຶ່ງໄດ້ຮັບຟັງການລາຍງານຈາກ ທ່ານ ສຽວ ຊ້ຽນ ເຫວິນ (XIAO QIAN WEN), ຜູ້ອໍານວຍການໃຫຍ່ບໍລິສັດທາງລົດໄຟລາວ-ຈີນ ກ່ຽວກັບຄວາມຄືບໜ້າ ຂອງການກໍ່ສ້າງທາງລົດໄຟ ລາວ-ຈີນ ໃຫ້ທ່ານນາຍົກລັດຖະມົນຕີ ແລະ ຄະນະໄດ້ຮັບຊາບ, ຊຶ່ງເຫັນວ່າ: ໂຄງການກໍ່ສ້າງເສັ້ນທາງລົດໄຟລາວ-ຈີນ ປະຈຸບັນ ໄດ້ສໍາເລັດການເຈາະອຸໂມງ  71 ອຸໂມງ ຈາກທັງໝົດ 75 ອຸໂມງ, ສໍາເລັດການກໍ່ສ້າງຂົວ 88%, ທາງ 100%, ການວາງລາງລົດໄຟສໍາເລັດ 21,4% ຄາດວ່າທ້າຍປີນີ້ ຈະວາງລາງຮອດແຂວງຫຼວງພະບາງ ແລະ ສຳເລັດການຕິດຕັ້ງເສົາໄຟຟ້າແຮງສູງ 57,4% ແຕ່ຍັງມີບາງສະຖານີ ທີ່ຍັງບໍ່ທັນໄດ້ລົງມືກໍ່ສ້າງ ຍ້ອນຖືກຜົນກະທົບ ຈາກການແຜ່ລະບາດຂອງພະຍາດໂຄວິດ-19 ແລະ ມີບາງພື້ນທີ່ ຍັງຢູ່ໃນຂັ້ນຕອນໄກ່ເກ່ຍກັບປະຊາຊົນ.
 ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ບໍລິສັດດັ່ງກ່າວ ທີ່ເອົາໃຈໃສ່ກໍ່ສ້າງທາງລົດໄຟ ໃຫ້ມີຄວາມຄືບໜ້າເລື້ອຍໆ ພ້ອມທັງ ໄດ້ເນັ້ນໃຫ້ບໍລິສັດ ແລະ ພາກສ່ວນກ່ຽວຂ້ອງ ໄກ່ເກ່ຍກັບປະຊາຊົນ ແຕ່ສະຖານີນະຄອນຫຼວງວຽງຈັນ ໄປຫາສະຖານີທ່ານາແລ້ງ ໃນໄລຍະທາງ  12,7 ກິໂລແມັດ ໃຫ້ແກ້ໄຂຢ່າງເປັນລະບົບ ບໍ່ໃຫ້ເກີດມີບັນຫາ. ໃນນີ້, ການແກ້ໄຂທີ່ເຮັດທາງລົດໄຟຢູ່ເທິງເສົາຊີມັງ ໄລຍະ 7 ກິໂລແມັດ ແມ່ນຖືກຕ້ອງແລ້ວ ເພາະບໍ່ໄດ້ກະທົບຕໍ່ປະຊາຊົນຫຼາຍ ແລະ ການຈັດຕັ້ງປະຕິບັດ ການກໍ່ສ້າງທາງລົດໄຟ ລາວ-ຈີນ ຕ້ອງເຮັດຖືກຕ້ອງຕາມການລົງນາມຂອງລັດຖະບານລາວ ແລະ ລັດຖະບານຈີນ.
ທ່ານນາຍົກລັດຖະມົນຕີ ຍັງໄດ້ສະເໜີໃຫ້ບໍລິສັດທາງລົດໄຟ ລາວ-ຈີນ ພິຈາລະນາ ແລະ ອະນຸຍາດໃຫ້ພາກສ່ວນອື່ນເຂົ້າມາມີສ່ວນຮ່ວມ ຖ້າເຂົາເຈົ້າມີຄວາມສົນໃຈມາລົງທຶນນຳ ຫຼື ພັດທະນາດ້ານອື່ນໆ ຕາມແລວທາງລົດໄຟ ເພື່ອໃຫ້ມີສ່ວນຮ່ວມ ໃນການພັດທະນາໃຫ້ຫຼາຍຂຶ້ນ.
 
ໃນວັນດຽວກັນນີ້, ທ່ານ ທອງລຸນ ສີສຸລິດ ພ້ອມຄະນະ ຍັງໄດ້ໄປຢ້ຽມຊົມຫໍພິພິທະພັນວຽງຈັນສິລະປະຮ່ວມສະໄໝ ຢູ່ບ້ານຊ້າງຄູ້, ເມືອງໄຊທານີ, ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຈາກທ່ານ ພິຊິດ ໄຊຍະທິດ, ຜູ້ສ້າງຕັ້ງ ແລະ ຜູ້ອຳນວຍການຫໍພິພິທະພັນດັ່ງກ່າວ, ຊຶ່ງຫໍພິພິທະພັນແຫ່ງນີ້ ໄດ້ເລີ່ມເປີດບໍລິການ ໃນວັນທີ 20 ກຸມພາ 2019.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ