ທ່ານນາຍົກ ເປັນປະທານກອງປະຊຸມ ຄະນະຊີ້ນຳລະດັບຊາດ ເພື່ອຈັດຕັ້ງປະຕິບັດ ປພຍ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 15 ກ.ລ 2020 17:00

​ໃນຕອນເຊົ້າ ຂອງວັນທີ 15 ກໍລະກົດ 2020 ທີ່ ສູນການຝຶກອົບຮົມ ແລະ ຮ່ວມມືສາກົນ (ICTC), ຄະນະຊີ້ນຳລະດັບຊາດ ເພື່ອການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ (ປພຍ ຫຼື SDGs) ຢູ່ ສປປ ລາວ ໄດ້ຈັດກອງປະຊຸມທົບທວນປະຈຳຮອບວຽນ 3 ປີຂຶ້ນ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ປະທານຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຢູ່ ສປປ ລາວ; ມີບັນດາທ່ານລັດຖະມົນຕີ, ຮອງລັດຖະມົນຕີ ແລະ ຜູ້ຕາງໜ້າຈາກບັນດາກະຊວງ, ອົງການທຽບເທົ່າ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.

ໃນໂອກາດກ່າວເປີດກອງປະຊຸມ, ທ່ານນາຍົກລັດຖະມົນຕີ ໄດ້ມີຄຳເຫັນຕໍ່ການຈັດຕັ້ງປະຕິບັດ ວາລະ 2030 ເພື່ອການພັດທະນາແບບຍືນຍົງ ຂອງວົງຄະນາຍາດສາກົນ ໂດຍສະເພາະ ບັນຫາທ້າທາຍ ຂອງໂລກໃນປະຈຸບັນ​ ທີ່ຕ້ອງໄດ້ພ້ອມກັນສູ້ຊົນແກ້ໄຂ, ຊຶ່ງປະກອບມີທັງໝົດ 17 ເປົ້າໝາຍ, ພິເສດສຳລັບ ສປປ ລາວ ແມ່ນໄດ້ມີອີກໜຶ່ງເປົ້າໝາຍແຫ່ງຊາດ ນັ້ນກໍ່ຄືເປົ້າໝາຍທີ 18 “ຊີວິດປອດໄພຈາກລະເບີດບໍ່ທັນແຕກ”. ກອງປະຊຸມຄັ້ງນີ້ ໄດ້ພ້ອມກັນສະຫຼຸບຕີລາຄາຄືນ ແລະ ສັງລວມບັນດາຄວາມຄືບໜ້າ ແລະ ສິ່ງທ້າທາຍຕ່າງໆ ໃນການຈັດຕັ້ງປະຕິບັດ ປພຍ ຕະຫຼອດໄລຍະ 3 ປີ ທີ່ຜ່ານມາ (2017 - 2020) ນັບຕັ້ງແຕ່ກອງປະຊຸມຄັ້ງປະຖົມມະລືກ ໃນປີ 2017 ໂດຍສະເພາະ ໃນທ່າມກາງທີ່ສະພາບການຂອງໂລກ ມີຄວາມສັບສົນ ແລະ ທ້າທາຍໃຫຍ່ຫຼວງ ເປັນຕົ້ນແມ່ນ ຜົນກະທົບຈາກການລະບາດຂອງພະຍາດ ໂຄວິດ-19 ຊຶ່ງສ້າງຜົນກະທົບອັນໃຫຍ່ຫຼວງ ໃຫ້ແກ່ເສດຖະກິດ-ສັງຄົມຂອງປະເທດຕ່າງໆ ໂດຍສະເພາະປະເທດກຳລັງພັດທະນາ. ດ້ວຍເຫດຜົນດັ່ງກ່າວ, ກອງປະຊຸມຄັ້ງນີ້ ຈຶ່ງມີຄວາມສຳຄັນ ສຳລັບບັນດາກະຊວງ ແລະ ຂະແໜງການກ່ຽວຂ້ອງ ໂດຍສະເພາະ ຈຸດປະສານງານ ປພຍ ແຕ່ລະກະຊວງ ເພື່ອຮ່ວມກັນຖອດຖອນບົດຮຽນ, ແລກປ່ຽນປະສົບການ, ທັງຕີລາຄາຈຸດດີຈຸດອ່ອນ ແລະ ຍົກໃຫ້ເຫັນບັນດາສິ່ງທ້າທາຍ ໃນສະພາບການດັ່ງກ່າວ ແລະ ພ້ອມກັນກຳນົດທິດທາງ ແລະ ມາດຕະການ ໃນການແກ້ໄຂບັນດາສິ່ງທ້າທາຍ ເພື່ອໃຫ້ບັນລຸ ປພຍ ຕາມຄຳຂວັນທີ່ວ່າ “ພວກເຮົາພ້ອມກັນກ້າວໄປ”.
ມາຮອດປະຈຸບັນ, ສປປ ລາວ ໄດ້ເຊື່ອມສານ ປພຍ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ແລະ ຈະສືບຕໍ່ເຊື່ອມສານເຂົ້າໃນ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໃນຕໍ່ໜ້າ ໂດຍໄດ້ສຳເລັດການເຊື່ອມສານທັງໝົດ 238 ຕົວຊີ້ບອກ ຂອງ ປພຍ ແລະ ມອບໝາຍໃຫ້ແຕ່ກະຊວງ ແລະ ຂະແໜງການກ່ຽວຂ້ອງຮັບຜິດຊອບ. ນອກຈາກນັ້ນ, ກອງປະຊຸມຍັງໄດ້ມີການຮັບຮອງເອົາ ແຜນປະຕິບັດແຫ່ງຊາດ ເພື່ອຈັດຕັ້ງປະຕິບັດ ວາລະ 2030 ເພື່ອການພັດທະນາແບບຍືນຍົງ, ໃນນັ້ນປະກອບມີ ແຜນດໍາເນີນງານການສື່ສານ, ໂຄສະນາ ແລະ ເຜີຍແຜ່ ປພຍ ແລະ ຮັບຮອງເອົາການກະກຽມໃຫ້ແກ່ ຮ່າງບົດລາຍງານແຫ່ງຊາດແບບສະໝັກໃຈ ສະບັບທີ 2 ຂອງ ສປປ ລາວ ໃນປີ 2021, ພ້ອມດຽວກັນນັ້ນ ໄດ້ມີການເປີດຕົວນຳໃຊ້ ແອັບພລິເຄເຊີນ ປພຍ (SDGs Application) ຢ່າງເປັນທາງການ ຢູ່ ສປປ ລາວ ເພື່ອເພີ່ມຊ່ອງທາງການເຂົ້າເຖິງແຫຼ່ງຂໍ້ມູນໃຫ້ວ່ອງໄວ ແລະ ທັນການ.

​ໃນຕອນທ້າຍ, ທ່ານນາຍົກລັດຖະມົນຕີ ໄດ້ເນັ້ນເຖິງຄວາມສຳຄັນຂອງການຈັດຕັ້ງປະຕິບັດ ປພຍ ຢູ່ ສປປ ລາວ ໂດຍໄດ້ໃຫ້ທິດຊີ້ນຳໃນການສືບຕໍ່ເຊື່ອມສານ ປພຍ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ ສະບັບ ທີ່ IX ທີ່ກຳລັງຢູ່ໃນຂັ້ນຕອນການຮ່າງໃນປະຈຸບັນ, ພ້ອມທັງ ສືບຕໍ່ຄົ້ນຄວ້າສຸມໃສ່ແກ້ໄຂສິ່ງທ້າທາຍຕ່າງໆ ທີ່ເປັນອຸປະສັກ ເພື່ອບັນລຸບັນດາວຽກງານຂອງ ປພຍ ໃຫ້ໄດ້ຕາມເປົ້າໝາຍ ແລະ ນຳເອົາ ສປປ ລາວ ໃຫ້ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDCs) ໃນອະນາຄົດ. ທ່ານນາຍົກລັດຖະມົນຕີ ຍັງໄດ້ຮຽກຮ້ອງເຖິງການມີສ່ວນຮ່ວມຢ່າງຕັ້ງໜ້າຈາກທຸກພາກສ່ວນ ນັບແຕ່ຂັ້ນສູນກາງ ລົງຮອດທ້ອງຖິ່ນ ໃນການຈັດຕັ້ງຜັນຂະຫຍາຍ ເພື່ອບັນລຸເປົ້າໝາຍ ແລະ ຄາດໝາຍຂອງ ປພຍ ຕາມຄຳຂວັນ “ ພວກເຮົາພ້ອມກັນກ້າວໄປ ”. ນອກຈາກນັ້ນ, ທ່ານນາຍົກລັດຖະມົນຕີ ຍັງໄດ້ສະເໜີ ໃຫ້ບັນດາຂະແໜງການ ຈົ່ງພ້ອມກັນເອົາໃຈໃສ່ຄົ້ນຄວ້າ ເພື່ອກຳນົດທິດທາງການພັດທະນາຂົງເຂດວຽກງານຂອງຕົນ ໃນເງື່ອນໄຂການດຳລົງຊີວິດແບບໃໝ່ (New normal) ທີ່ຕິດພັນກັບການພັດທະນາແບບຍືນຍົງ ໃຫ້ມີການຫັນປ່ຽນດີຂຶ້ນຢ່າງຈະແຈ້ງ ໂດຍສະເພາະ ໃຫ້ທັນສະໄໝ, ສະດວກ, ວ່ອງໄວ, ຊັດເຈນ, ປະຢັດ, ໂປ່ງໃສ, ສີວິໄລ, ມີປະສິດທິພາບ, ປະສິດທິຜົນ ແລະ ອື່ນໆກວ່າເກົ່າ, ສາມາດປະກອບສ່ວນເຂົ້າໃນການລຶບລ້າງຄວາມທຸກຍາກຂອງປະຊາຊົນ, ປົກປັກຮັກສາ ແລະ ພັດທະນາປະເທດຊາດ ໃຫ້ມີຄວາມຈະເລີນວັດທະນາ ຢ່າງວ່ອງໄວ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ