ນາຍົກລັດຖະມົນຕີ ຢ້ຽມຢາມພື້ນຖານການຜະລິດ ເມືອງໄຊທານີ ນະຄອນຫຼວງວຽງຈັນ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 13 ກ.ລ 2020 11:00

​​ວັນທີ 9 ກໍລະກົດ 2020 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ, ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ພື້ນຖານການຜະລິດ ຢູ່ເມືອງໄຊທານີ ນະຄອນຫຼວງວຽງຈັນ ໂດຍມີ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍ ອໍານາດການປົກຄອງເມືອງ ແລະ ປະຊາຊົນເມືອງໄຊທານີໃຫ້ການຕ້ອນຮັບຢ່າງອົບອຸ່ນ.

ກ່ອນອື່ນ ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ກຸ່ມປູກຜັກອິນຊີ ບ້ານທົ່ງມັ່ງ ເມືອງໄຊທານີ ນະຄອນຫລວງວຽງຈັນ. ໂອກາດດັ່ງກ່າວ ທ່ານ ນາງ ຄຳມອນ ຫຼວງລາດ ຫົວໜ້າກຸ່ມປູກພືດຜັກອິນຊີ ບ້ານທົ່ງມັ່ງ ໄດ້ຂຶ້ນລາຍໂດຍຫຍໍ້ ໃຫ້ຊາບກ່ຽວກັບກຸ່ມການຜະລິດກະສິກໍາ ບ້ານທົ່ງມັ່ງ ຊຶ່ງສ້າງຕັ້ງຂຶ້ນໃນປີ 2006, ປະຈຸບັນ ມີສະມາຊິກທັງໝົດ 20 ຄອບຄົວ, ໂດຍປູກພືດອິນຊີ ຫຼື ພືດປອດສານພິດໃນເຮືອນຮົ່ມ 160 ຫຼັງ, ສະເລ່ຍແລ້ວ ໃນ 6 ເດືອນທີ່ຜ່ານມາ ສາມາດປູກພື ດເພື່ອສົ່ງອອກຂາຍສູ່ຕະຫຼາດໄດ້ 34 ພັນກວ່າກິໂລກຣາມ ສາມາດສ້າງລາຍຮັບ ໃຫ້ສະມາຊິກ 4-6 ລ້ານກີບຕໍ່ເດືອນ. ນອກນັ້ນ, ທ່ານ ນາງ ຄໍາມອນ ຫຼວງລາດ ຍັງໄດ້ລາຍງານໃຫ້ຊາບ ກ່ຽວກັບຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ຕື່ມອີກ. ໂອກາດດັ່ງກ່າວ ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ຕໍ່ກຸ່ມປູກຜັກອິນຊີບ້ານທົ່ງມັ່ງ ພ້ອມທັງເນັ້ນໜັກໃຫ້ກຸ່ມດັ່ງ ກ່າວສືບຕໍ່ຮັກສາມູນເຊື້ອດຸໝັ່ນຂະຫຍັນພຽນໃນການປູກຝັງ ໂດຍສະເພາະ ແມ່ນການຫັນວິກິດໃຫ້ເປັນໂອກາດ ແລະ ກຸ້ມຕົນເອງໃນຍາມທີ່ພົບຄວາມຫຍຸ້ງຍາກ. ນອກນັ້ນ ໃຫ້ອໍານາດການປົກຄອງ ແລະ ຂະແໜງການກ່ຽວຂ້ອງ ສືບຕໍ່ຊຸກຍູ້ສົ່ງເສີມ ເພື່ອເຮັດໃຫ້ກຸ່ມດັ່ງກ່າວ ມີການພັດທະນາ ແລະ ກ້າວໜ້າຕໍ່ໄປ ເປັນຕົ້ນ ການສະໜອງແນວພັນພືດ, ການຊອກຫາຕະຫຼາດ, ການຂະຫຍາຍເນື້ອທີ່ການຜະລິດ, ການເຂົ້າເຖິງແຫຼ່ງທຶນດອກເບ້ຍຕໍ່າໄລຍະຍາວ, ຄ່າໄຟຟ້າ, ປັບປຸງລະບົບຊົນລະປະທານ ແລະ ອື່ນໆ.​

ຕໍ່ມາ ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມບໍລິສັດໂຄຄາໂຄລາ ເຊິ່ງບໍລິສັດດັ່ງກ່າວ ຖືກສ້າງຕັ້ງຂຶ້ນໃນ ປີ 2015 ມີພະນັກງານທັງໝົດ 300 ຄົນ, ມີຕົວແທນຈໍາໜ່າຍ 24 ແຫ່ງທົ່ວປະເທດ, ນອກຈາກຜະລິດ ເພື່ອຂາຍພາຍໃນປະເທດແລ້ວ ຍັງໄດ້ຜະລິດເພື່ອສົ່ງຂາຍອອກຕ່າງປະເທດ ໂດຍສະເພາະປະເທດໄທ. ຈາກນັ້ນ ທ່ານ ນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປຢ້ຽມຢາມ ໂຮງງານອາຫານສັດພູຄໍາ ຫຼື ບໍລິສັດ ຊີພີເອພ ຊຶ່ງບໍລິສັດດັ່ງກ່າວ ຖືກສ້າງຕັ້ງຂຶ້ນໃນ ປີ 2007 ມີທຶນຈົດທະບຽນ 15 ລ້ານໂດລາສະຫະລັດ, ມີອາຍຸສໍາປະທານ 40 ປີ, ໃນເນື້ອທີ່ 10 ເຮັກຕາ, ມີພະນັກງານທັງໝົດ 1.000 ກວ່າຄົນ, ກິດຈະກຳຫຼັກ ແມ່ນຜະລິດຫົວອາຫານສັດ, ລ້ຽງໄກ່ ແລະ ລ້ຽງໝູ ໃນນີ້ມີຜະລິດເພື່ອຈໍາໝ່າຍພາຍໃນ ແລະ ສົ່ງອອກຕ່າງປະເທດ. ນອກນັ້ນ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ໂຮງງານອຸດສາຫະກໍາ ໂຕໂຍລາວ ບໍລິສັດດັ່ງກ່າວ ສ້າງຕັ້ງຂຶ້ນໃນປີ 2016 ໂດຍມີການນໍາໃຊ້ເຕັກໂນໂລຊີ ນະວັດຕະກໍາທີ່ທັນສະໄໝຂອງໂລກ ແລະ ວັດຖຸດິບທີ່ໄດ້ມາດຕະຖານ ເພື່ອຜະລິດທໍ່ນໍ້າ ເອັສດີພີດີ ທໍ່ພີວີຊີ ທໍ່ຢູພີວີຊີ ທໍ່ພີພີອາ ຂໍ້ຕໍ່ຈອດເອັສດີພີອີ ທໍ່ຫຸ້ມສາຍໄຟ ທໍ່ຫຸ້ມສາຍໂທລະຄົມ ແລະ ອຸປະກອນອື່ນໆ ພາຍໃຕ້ເຄື່ອງໝາຍການຄ້າໂຕໂຢ “TOYO” ແລະ ເອເຊຍກຣີນ “ASIA GREEN” ອອກສູ່ສັງຄົມລາວ ປັດຈຸບັນຜະລິດຕະພັນຈາກໂຮງງານເປັນສິນຄ້າທີ່ໄດ້ມາດຕະຖານສາກົນ ແລະ ໄດ້ຮັບຄວາມນິຍົມຊົມໃຊ້ກັນຢ່າງກວ້າງຂວາງໃນການກໍ່ສ້າງລະບົບນໍ້າປະປາຂອງລັດວິສາຫະກິດນໍ້າປະປາລາວທົ່ວປະເທດ ໂຄງການກໍ່ສ້າງລະບົບນໍ້າປະປາ ສຸຂາພິບານ ແລະ ໂຄງການຊົນລະປະທານຂອງອົງການຈັດຕັ້ງສາກົນ ນອກນັ້ນຜະລິດຕະພັນຍັງໄດ້ຮັບຄວາມສົນໃຈເອົາໄປຈໍາໜ່າຍຈາກບັນດາຫ້າງຮ້ານຂາຍວັດສະດຸກໍ່ສ້າງທັງຂະໜາດໃຫຍ່ຂະໜາດກາງ ແລະ ຂະໜາດນ້ອຍ ແລະ ມີຕົວແທນຈໍາໜ່າຍຫຼາຍກວ່າ 600 ຕົວແທນທົ່ວປະເທດ.

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ