ທ່ານນາຍົກ ລາຍງານການຈັດຕັ້ງປະຕິບັດວຽກງານ ຂອງລັດຖະບານ ຕໍ່ກອງປະຊຸມສະພາແຫ່ງຊາດ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 24 ມິ.ຖ 2020 11:00

​ກອງປະຊຸມ ສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ຂອງວັນທີ 24 ມິຖຸນາ 2020 ທີ່ ຫ້ອງວ່າການສູນກາງພັກ (ຫຼັກ 6), ນະຄອນຫຼວງວຽງຈັນ ໂດຍການເປັນປະທານ ແລະ ກ່າວເປີດ ຂອງທ່ານ ນາງ ປານີ ຢາທໍ່ຕູ້, ປະທານສະພາແຫ່ງຊາດ; ມີບັນດາທ່ານ ການນຳຂັ້ນສູງ ຂອງພັກ, ລັດຖະບານ, ສະມາຊິກສະພາແຫ່ງຊາດ ແລະ ແຂກຖືກເຊີນ ເຂົ້າຮ່ວມ.
ໃນໂອກາດນີ້, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ຕາງໜ້າລັດຖະບານ ຂຶ້ນລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 5 ເດືອນ, ຄາດຄະເນ 6 ເດືອນຕົ້ນປີ ແລະ ທິດທາງວຽກຈຸດສຸມ 6 ເດືອນທ້າຍປີ ຕໍ່ກອງປະຊຸມ, ຊຶ່ງເນື້ອໃນການລາຍງານດັ່ງກ່າວ ປະກອບມີຫົວຂໍ້ໃຫຍ່ສຳຄັນ ຄື: ສະພາບແວດລ້ອມ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານປີ 2020; ຜົນການຈັດຕັ້ງປະຕິບັດ ແຜນ 5 ເດືອນຕົ້ນປີ ແລະ ຄາດຄະເນ 6 ເດືອນຕົ້ນປີ 2020; ນະໂຍບາຍ ແລະ ມາດຕະການ ແກ້ໄຂຜົນກະທົບ ຕໍ່ເສດຖະກິດ-ສັງຄົມ ຈາກການລະບາດ ຂອງພະຍາດ ໂຄວິດ-19; ມາດຕະການວຽກຈຸດສຸມ ທີ່ຈະປະຕິບັດ ໃນ 6 ເດືອນທ້າຍປີ 2020 ພ້ອມກັນນັ້ນ ກໍ່ຍັງມີຂໍ້ສະເໜີ ຕໍ່ສະພາແຫ່ງຊາດ ເພື່ອພິຈາລະນາ ແລະ ອື່ນໆ ຕື່ມອີກ.

​ໃນຕອນທ້າຍ, ທ່ານນາຍົກລັດຖະມົນຕີ ຍັງໄດ້ກ່າວວ່າ: ລັດຖະບານ ຈະສືບຕໍ່ໃຊ້ທຸກຄວາມພະຍາຍາມ ສຸມທຸກກໍາລັງແຮງນໍາເອົາບົດຮຽນ ທີ່ເຄີຍໄດ້ຜ່ານຜ່າມາແລ້ວນັ້ນ ຮ່ວມກັບທົ່ວພັກ, ທົ່ວລັດ, ທົ່ວປວງຊົນເຮົາ ທີ່ພວກເຮົາມີມູນເຊື້ອອັນດິງາມ ຂອງຊາດເຮົາ ໂດຍສະເພາະ ບົດຮຽນຂອງສົງຄາມຕ້ານ ໂຄວິດ-19 ນັ້ນ ທີ່ໄດ້ປະຕິບັດ ແລະ ກໍາລັງປະຕິບັດຢູ່ນັ້ນ ຊຶ່ງໄດ້ມາຈາກກໍາລັງແຮງສັງລວມ ຂອງປວງຊົນລາວທັງຊາດ ທີ່ມີສະຕິຕື່ນຕົວສູງ, ມີຄວາມເຊື່ອໝັ້ນ ຕໍ່ແນວທາງນະໂຍບາຍ, ມີລະບຽບວິໄນ, ມີຄວາມສາມັກຄີເປັນປຶກແຜ່ນແໜ້ນໜາ, ມີຄວາມຮັກເຊື້ອແພງຊາດ ທີ່ດູດດື່ມ, ນອກນັ້ນ ປະຊາຊົນເຮົາຍັງມີນໍ້າໃຈກຽມພ້ອມ ທີ່ຈະເສຍສະຫຼະ ເພື່ອຊາດ, ເພືີ່ອມາຕຸພູມທີ່ແສນຮັກ ແລະ ຫວງແຫນຂອງເຮົາ ທີ່ໄດ້ສະແດງອອກ ໃນຂະບວນການຕໍ່ສູ້ກູ້ຊາດ ກໍ່ຄືຂະບວນການສ້າງສາ ແລະ ພັດທະນາປະເທດຊາດຂອງເຮົາ ໂດຍສະເພາະ ສະແດງອອກໃນຂະບວນການຕໍ່ສູ້ຕ້ານກັບໂຄວິດ-19 ທີ່ຜ່ານຜ່າມານັ້ນ ຈະເປັນກໍາລັງແຮງໃຫ້ພັກເຮົາ, ຊາດເຮົາ ຢ່າງແທ້ຈິງ, ທັງຈະເປັນກໍາລັງໃຈອັນໃຫຍ່ຫຼວງ ໃຫ້ລັດຖະບານ ທີ່ກໍາລັງບໍລິຫານປະເທດ ໄດ້ສຸມສະຕິປັນຍາ, ກໍາລັງວັງຊາ ປະຕິບັດໜ້າທີ່ຂອງຕົນ.​



ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ