ທ່ານນາຍົກລັດຖະມົນຕີ ປູກຕົ້ນໄມ້ຮ່ວມກັບຊາວໜຸ່ມ-ເຍົາວະຊົນ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 01 ມິ.ຖ 2020 11:00

​​
ໃນຕອນເຊົ້າ ຂອງວັນທີ 1 ມິຖຸນາ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ຮ່ວມດ້ວຍທ່ານ ຮອງລັດຖະມົນຕີ, ທ່ານ ຮອງປະທານສະພາແຫ່ງຊາດ, ບັນດາທ່ານລັດຖະມົນຕີ, ການນໍາສູນກາງຊາວໜຸ່ມ ປະຊາຊົນປະຕິວັດລາວ, ບັນດາທ່ານເອກອັກ ຄະລັດຖະທູດ ພ້ອມດ້ວຍຊາວໜຸ່ມ, ນັກຮຽນ, ເຍົາວະຊົນ-ອານຸຊົນ ໄດ້ເຂົ້າຮ່ວມງານສະເຫຼີມສະຫຼອງ ວັນເດັກນ້ອຍສາກົນ 1 ມິຖຸນາ ແລະ ວັນປູກຕົ້ນໄມ້ແຫ່ງຊາດ ຢູ່ທີ່ຫໍມູນເຊື້ອຊາວໜຸ່ມ-ເຍົາວະຊົນ, ບ້ານດົງໝາກຄາຍ, ນະຄອນຫຼວງວຽງຈັນ.

ໃນໂອກາດສຳຄັນນີ້, ທ່ານນາຍົກລັດຖະມົນຕີ ໄດ້ສະແດງຄວາມຍິນດີ ທີ່ໄດ້ເຂົ້າຮ່ວມງານໃນຄັ້ງນີ້ ແລະ ມີຄວາມດີໃຈ ທີ່ໄດ້ເຫັນໃບໜ້າອັນຍີ້ມແຍ້ມແຈ່ມໃສຂອງບັນດາຫຼານນ້ອຍ, ເຍົາວະຊົນ, ອະນຸຊົນ ທຸກຄົນ. ທ່ານ ນາຍົກ ລັດຖະມົນຕີ ຍັງໄດ້ໃຫ້ຄໍາໂອວາດ ແກ່ນ້ອງນ້ອຍ ເຍົາວະຊົນ, ອານຸຊົນລາວ ໂດຍໄດ້ຍົກໃຫ້ເຫັນສິ່ງທ້າທາຍ ແລະ ສາເຫດທີ່ແທ້ຈິງ ທີ່ເຍົາວະຊົນ, ອະນຸຊົນລາວ ຕ້ອງໄດ້ຕັ້ງໃຈຮ່ຳຮຽນ, ຝຶກຝົນຫຼໍ່ຫຼອມຕົນເອງ ເພື່ອເປັນກຳລັງແຮງ ສຳຄັນ ໃນການພັດທະນາ ແລະ ສ້າງສາປະເທດຊາດ, ພ້ອມທັງໄດ້ຝາກ “ຄວາມປາຖະໜາຕໍ່ ເຍົາວະຊົນລາວ ໃນຍຸກໃໝ່” ດັ່ງນີ້:

 ເປັນຄົນສະຫຼາດຮູ້ທັງຄວາມຄິດ ແລະ ສາຍຕາ
 ຫ່າງໄກຈາກພິດໄພຮ້າຍ ທີ່ບໍ່ເພິ່ງປາຖະໜາຂອງປວງປະຊາ
 ຕັ້ງໃຈຮຽນຮູ້ໃຫ້ເປັນນັກອາຊີບ ທີ່ມີຫຼັກວິທະຍາ
 ຝຶກຝົນຕົນໃຫ້ແຂງເຂັ້ມ ທັງຈິດໃຈ ແລະ ກາຍຍາ 
 ສ້າງໃຫ້ຕົນເປັນແຮງບັນດານໃຈ ຂອງຄວາມຮັກຈາກບິດາມານດາ
 ສ້າງຄະຕິປະຈຳໃຈໄວ້ວ່າ: ຕົນຕ້ອງເປັນຜູ້ຮ່ວມສ້າງ ອະນາຄົດຂອງຊາດລາວ ກ້າວສູ່ຄວາມຈະເລີນ ວັດທະນາ ແທ້ເດີ

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ