ສອງພາກສ່ວນມອບເງິນຊ່ວຍເຫຼືອລັດຖະບານ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນຈັນ, 11 ພ.ພ 2020 16:00

​​​​​​ໃນຕອນບ່າຍ ຂອງວັນທີ 11 ພຶດສະພາ 2020 ທີ່ ສຳນັກງານນາຍົກລັດຖະມົນຕີ, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ໄດ້ຕາງໜ້າໃຫ້ລັດຖະບານ ຮັບເງິນຊ່ວຍເຫຼືອ ຈາກສອງພາກສ່ວນ, ໂດຍມີພະນັກງານທີ່ກ່ຽວຂ້ອງ ຂອງແຕ່ລະພາກສ່ວນ ເຂົ້າຮ່ວມ.

​​​​​​ພາກສ່ວນທີ່ນຳເງິນມາມອບຊ່ວຍເຫຼືອ ໃນຄັ້ງນີ້ ປະກອບມີ: 1. ລັດຖະບານ ແຫ່ງ ສ. ເກົາຫຼີ ມອບເງິນຈຳນວນ 600.000 ໂດລາສະຫະລັດ, ກ່າວມອບໂດຍທ່ານ ຊິນ ຊອງຊູນ (Mr. SHIN Sungsoon), ເອກອັກຄະລັດຖະທູດ ສ. ເກົາຫຼີ ປະຈຳ ສປປ ລາວ; 2. ທະນາຄານແຫ່ງປະເທດຈີນ ປະຈຳນະຄອນຫຼວງວຽງຈັນ ມອບເງິນຈຳນວນ 500.000.000 ກີບ, ກ່າວມອບໂດຍທ່ານ ຫຼີ ຈຶ ຢົງ, ຜູ້ອໍານວຍການທະນາຄານແຫ່ງປະເທດຈີນ ສາຂານະຄອນຫຼວງວຽງຈັນ.
​​​​​​​ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ກ່າວສະແດງຄວາມຂອບໃຈ ແລະ ຊົມເຊີຍ ຕໍ່ພາກສ່ວນ ທີ່ໄດ້ນຳເອົາເງິນມາມອບຊ່ວຍເຫຼືອ ລັດຖະບານ ແຫ່ງ ສປປ ລາວ ເພື່ອນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ຢູ່ ສປປ ລາວ ໃນຄັ້ງນີ້, ຊຶ່ງການຊ່ວຍເຫຼືອດັ່ງກ່າວ ແມ່ນການແບ່ງປັນ ແລະ ເສຍສະຫຼະຜົນປະໂຫຍດສ່ວນຕົວຢ່າງແທ້ຈິງ, ເນື່ອງຈາກວ່າ: ແຕ່ລະປະເທດ, ແຕ່ລະພາກສ່ວນ ລ້ວນແລ້ວແຕ່ໄດ້ຮັບຜົນກະທົບ ຈາກການແຜ່ລະບາດ ຂອງເຄື້ອພະຍາດ ໂຄວິດ-19 ແຕ່ກໍ່ຍັງໄດ້ບິແບ່ງນໍ້າໃຈ ປະກອບສ່ວນຊ່ວຍເຫຼືອ ສປປ ລາວ, ສິ່ງດັ່ງກ່າວ ຍັງເປັນການໃຫ້ກຳລັງໃຈອັນໃຫຍ່ຫຼວງ ແກ່ລັດຖະບານ ແລະ ປະຊາຊົນລາວ ປະຕິບັດໜ້າທີ່ ແລະ ຄວາມຮັບຜິດຊອບຂອງຕົນ ໃຫ້ມີຜົນສຳເລັດເປັນກ້າວໆ. ໃນໂອກາດດຽວກັນ, ທ່ານຮອງນາຍົກລັດຖະມົນຕີ ຍັງໄດ້ແຈ້ງສະພາບ ການແກ້ໄຂການແຜ່ລະບາດ ຂອງເຊື້ອພະຍາດ ໂຄວິດ-19 ໃຫ້ຄະນະທີ່ນຳເງິນມາມອບ ໄດ້ຮັບຊາບຕື່ມອີກ, ພ້ອມທັງ ກ່າວວ່າ ຈະນຳໃຊ້ເງິນດັ່ງກ່າວ ໃຫ້ຖືກເປົ້າໝາຍ, ມີປະສິດທິພາບ ແລະ ປະສິດທິຜົນ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ