ຕີລາຄາການປະຕິບັດມາດຕະການຜ່ານມາ ແລະ ກະກຽມແຜນການຕໍ່ໜ້າ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 08 ພ.ພ 2020 17:00

ໃນຕອນແລງ ຂອງວັນທີ 13 ເມສາ 2020 ທີ່ ກະຊວງການເງິນ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງເຊື້ອພະຍາດ ໂຄວິດ-19 ໄດ້ຈັດກອງປະຊຸມ ປຶກສາຫາລື ຕີລາຄາຄືນ ການວາງ ແລະ ຈັດຕັ້ງປະຕິບັດ ບັນດາມາດຕະການຕ່າງໆ ທີ່ລັດຖະບານວາງອອກໃນໄລຍະທີ່ຜ່ານມາ ເພື່ອນຳເອົາບົດຮຽນທີ່ຖອດຖອນໄດ້ ໄປປັບປຸງແຜນການຈັດຕັ້ງປະຕິບັດວຽກງານໃນຕໍ່ໜ້າ ໃຫ້ແທດເໝາະກັບສະພາບເງື່ອນໄຂ ແລະ ຄວາມເປັນຈິງ ໃນແຕ່ລະໄລຍະ ພາຍໃຕ້ການເປັນປະທານຂອງທ່ານ ສົມດີ ດວງດີ, ຮອງນາຍຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດດັ່ງກ່າວ; ມີບັນດາທ່ານຮອງລັດຖະມົນຕີ ທີ່ສັງກັດຢູ່ໃນຄະນະສະເພາະກິດ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.

ທ່ານ ຮສຈ. ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດ ໄດ້ລາຍງານໃຫ້ຮູ້ ກ່ຽວກັບສະພາບການແຜ່ລະບາດ ຂອງເຊື້ອພະຍາດ ໂຄວິດ-19 ຢູ່ຕ່າງປະເທດ ແລະ ພາຍໃນ ສປປ ລາວ; ສະພາບການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ກໍ່ຄືການວາງ ແລະ ຈັດຕັ້ງປະຕິບັດມາດຕະການຕ່າງໆ ທີ່ລັດຖະບານໄດ້ວາງອອກ ໂດຍສະເພາະ ຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020, ລວມທັງ ການປະຕິບັດວຽກງານທາງດ້ານວິຊາສະເພາະການແພດ ແລະ ວຽກງານທີ່ຕິດພັນ ຂອງອະນຸກຳມະການຕ່າງໆ ໃນຄະນະສະເພາະກິດ ເປັນຕົ້ນ ວຽກກອງເລຂາ ແລະ ປະສານງານ; ວຽກການພົວພັນຕ່າງປະເທດ; ວຽກໂຄສະນາເຜີຍແຜ່ຂໍ້ມູນຂ່າວສານ ແລະ ຕ້ານຂ່າວສານທີ່ບິດເບືອນຄວາມຈິງ; ວຽກງານງົບປະມານ ແລະ ພະລາທິການ; ວຽກກະກຽມສະຖານທີ່ ຮອງຮັບການແຍກປ່ຽວ ແລະ ປິ່ນປົວ; ວຽກຄຸ້ມຄອງການສັນຈອນ ແລະ ຈຳກັດບໍລິເວນ; ວຽກການຄຸ້ມຄອງລາຄາສິນຄ້າ ແລະ ສົ່ງເສີມການຜະລິດພາຍໃນ; ວຽກກວດກາ ແລະ ອໍານວຍຄວາມສະດວກໃນການສົ່ງສິນຄ້າພາຍໃນ ແລະ ສີນຄ້າເຂົ້າ-ອອກປະເທດ; ວຽກປຸກລະດົມ ໂຄສະນາຂົນຂວາຍທົ່ວສັງຄົມ; ວຽກຄຸ້ມຄອງແຮງງານ ແລະ ນັກສຶກສາ ມາຈາກຕ່າງປະເທດ; ວຽກກະກຽມກຳລັງສະໜັບສະໜູນຮອບດ້ານ.
​ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄໍາຄິດເຫັນ ຕີລາຄາການຈັດຕັ້ງປະຕິບັດມາດຕະ ການຕ່າງໆ ທີ່ລັດຖະບານໄດ້ວາງອອກ, ຊຶ່ງໄດ້ຍົກໃຫ້ເຫັນດ້ານດີ, ຜົນສຳເລັດອັນພົ້ນເດັ່ນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຈາກການຈັດຕັ້ງປະຕິບັດວຽກງານ ໃນໄລຍະຜ່ານມາ ໂດຍສະເພາະ ຜົນໄດ້ຮັບຈາກການມີສ່ວນຮ່ວມໃນທົ່ວສັງຄົມ ແລະ ການຈັດຕັ້ງປະຕິບັດວຽກງານ ຂອງລັດຖະບານ ກໍ່ຄືຄະນະສະເພາະກິດທຸກຂັ້ນ, ໃນນັ້ນ ອັນພົ້ນເດັ່ນ ສາມາດຕີລາຄາໄດ້ວ່າ ການວາງມາດຕະການຕ່າງໆ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ຂອງ ສປປ ລາວພວກເຮົາ ແມ່ນເດີນມາຖືກຕ້ອງແລ້ວ, ເປັນມາດຕະການທີ່ເດັດຂາດ, ທັນການ ແລະ ມີປະສິດທິຜົນສົມຄວນ, ເຮັດໃຫ້ສາມາດຄວບຄຸມການແຜ່ລະບາດ ຂອງເຊື້ອພະຍາດ ໃຫ້ຂະຫຍາຍຕົວຊ້າລົງກວ່າທີ່ໄດ້ປະເມີນໄວ້ເບື້ອງຕົ້ນ (ບໍ່ແຜ່ເປັນວົງກວ້າງ); ການປິ່ນປົວຜູ້ຕິດເຊື້ອ ກໍ່ມີຜົນສຳເລັດເປັນກ້າວໆ (ມີກໍລະນີຈຳນວນໜຶ່ງ ແມ່ນກວດບໍ່ພົບເຊື້ອພະຍາດແລ້ວ); ຊ່ຽວຊານ-ພະນັກງານແພດໝໍ ແມ່ນປະຕິິບັດຫຼັກການທາງການແພດ ຢ່າງເຂັ້ມງວດ ໄດ້ມາດຕະຖານສາກົນ; ມີການປະກອບສ່ວນຊ່ວຍເຫຼືອ, ສະໜັບສະໜູນ ແລະ ໃຫ້ການຮ່ວມມື ຈາກສັງຄົມ ແລະ ເພື່ອນມິດສາກົນ ຢ່າງຫຼວງຫຼາຍ ເປັນຕົ້ນ ການຊ່ວຍເຫຼືອວັດຖຸປັດໃຈ, ການປະຕິບັດມາດຕະການປ້ອງກັນ (ຢູ່ເຮືອນ-ບໍ່ເດີນທາງ, ບໍ່ຊຸມແຊວ, ບໍ່ຈັດກິດຈະກຳໂຮມຊຸມນຸມ, ຮັກສາໄລຍະຫ່າງ, ໃສ່ຜ້າອັດປາ-ດັງ, ອະນາໄມທຳຄວາມສະອາດ ແລະ ອື່ນໆ). ນອກຈາກນັ້ນ ຜູ້ເຂົ້າຮ່ວມ ຍັງໄດ້ມີຄຳເຫັນ ໃນການກຳນົດທິດທາງແຜນການຕໍ່ໜ້າ ຫຼັງຈາກວັນທີ 19 ເມສາ ເປັນຕົ້ນໄປ ໂດຍສະເພາະ ມາດຕະການໃດ, ຂົງເຂດວຽກງານໃດ ທີ່ຄວນສືບຕໍ່, ຄວນເຂັ້ມງວດຂຶ້ນຕື່ມ ຫຼື ຫຼຸດຜ່ອນລະດັບຄວາມເຂັ້ມງວດລົງ, ລວມທັງ ການກຳນົດກອບໄລຍະເວລາ ໂດຍຄຳນຶງ ແລະ ຊັ່ງຊາເຖິງຜົນໄດ້, ຜົນເສຍ ທີ່ຈະຕາມມາ ກໍ່ຄືຜົນກະທົບຕໍ່ຊີວິດ, ເສດຖະກິດ-ສັງຄົມ ແລະ ຄວາມເປັນລະບຽບຮຽບຮ້ອຍໃນສັງ ຄົມ, ທັງນີ້ ກໍ່ເພື່ອເປັນຂໍ້ມູນພື້ນຖານ ໃຫ້ແກ່ການນຳໄປລາຍງານ ແລະ ສະເໜີຂໍທິດຊີ້ນຳຈາກລັດຖະບານ ໃນການວາງມາດຕະການ ເພື່ອຈັດຕັ້ງປະຕິບັດໃນຕໍ່ໜ້າ ໃຫ້ແທດເໝາະກັບສະພາບຕົວຈິງ ໃນແຕ່ລະດ້ານ, ສາມາດຈັດຕັ້ງປະຕິບັດໄດ້ ຢ່າງປະສິດທິພາບ ແລະ ປະສິດທິຜົນ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ