ຊົມເຊີຍ ບໍລິສັດແພນອອສ໌ ແລະ ພູເບ້ຍມາຍນິງ ຈຳກັດ ທີ່ໃຫ້ການຊ່ວຍເຫຼືອ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພຸດ, 06 ພ.ພ 2020 16:00

​​​​ໃນຕອນບ່າຍ ຂອງວັນທີ 6 ພຶດສະພາ 2020 ທີ່ ສຳນັກງານນາຍົກລັດຖະມົນຕີ, ບໍລິສັດ ແພນອອສ໌ ແລະ ພູເບ້ຍມາຍນິງ ຈຳກັດ ໄດ້ມອບອຸປະກອນການແພດ ແລະ ເງິນ ໃຫ້ແກ່ລັດຖະບານ ລວມມູນຄ່າທັງໝົດ 650.000 ໂດລາສະຫະລັດ ໂດຍການກ່າວມອບ ຂອງທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍມາຍນິງ ຈຳກັດ ແລະ ຕາງໜ້າໃຫ້ລັດຖະບານ ກ່າວຮັບໂດຍທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19, ຊຶ່ງມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງສອງຝ່າຍເຂົ້າຮ່ວມ.

​​​ໃນໂອກາດດັ່ງກ່າວ, ທ່ານ ສົມດີ ດວງດີ ໄດ້ກ່າວສະແດງຄວາມຂອບໃຈ ແລະ ຊົມເຊີຍ ຕໍ່ຄະນະນຳ ແລະ ພະນັກງານ ຂອງບໍລິສັດ ແພນອອສ໌ ແລະ ພູເບ້ຍມາຍນິງ ຈຳກັດ ທີ່ໄດ້ປະກອບສ່ວນ ໃຫ້ການຊ່ວຍເຫຼືອແກ່ລັດຖະບານບານ ໃນຄັ້ງນີ້, ຊຶ່ງການຊ່ວຍເຫຼືອດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການ ຂອງວຽກງານ ແລະ ສະພາບການຕົວຈິງ ໃນປະຈຸບັນ ກໍ່ຄືອະນາຄົດ, ທັງເປັນການຊ່ວຍຍົກລະດັບຄວາມສາມາດ ດ້ານເຕັກນິກວິຊາການ ທາງການແພດ ຂອງ ສປປ ລາວ ຂຶ້ນຕື່ມອີກ, ສິ່ງສຳຄັນ ແມ່ນປະກອບສ່ວນ ຮອງຮັບການແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ຢູ່ ສປປ ລາວ ໃຫ້ມີຄວາມຮັບປະກັນຂຶ້ນຕື່ມອີກບາດກ້າວໜຶ່ງ, ທັງເປັນການສະໜັບສະໜູນ ແລະ ໃຫ້ກຳລັງໃຈອັນໃຫຍ່ຫຼວງ ແກ່ລັດຖະບານ ກໍ່ຄືຄະນະສະເພາະກິດ, ພະນັກງານແພດໝໍ ແລະ ພາກສ່ວນກ່ຽວຂ້ອງ ໃນການແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19, ພ້ອມກັນນັ້ນ ທ່ານຍັງໄດ້ຊີ້ນຳ ໃຫ້ຄະນະນຳບໍລິສັດ ພູເບ້ຍມາຍນິງ ຈຳກັດ ຈົ່ງສືບນຳພາພະນັກງານ ທີ່ຢູ່ໃນຄວາມຮັບຜິດຊອບຂອງຕົນ ຕໍ່ປະຕິບັດບັນດາມາດຕະການ ແລະ ຂໍ້ແນະນຳຕ່າງໆ ໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ທີ່ລັດຖະບານ ກໍ່ຄືຄະນະສະເພາະກິດ ວາງອອກຢ່າງເຂັ້ມງວດ ແລະ ໄດ້ຮັບຜົນດີ.​ ສຳລັບອຸປະກອນການແພດ ແລະ ເງິນ ທີ່ໄດ້ຮັບການຊ່ວຍເຫຼືອດັ່ງກ່າວ ແມ່ນຈະມອບໃຫ້ພາກສ່ວນທີ່ກ່ຽວຂ້ອງ ນຳໄປຄຸ້ມຄອງ ແລະ ນຳໃຊ້ ໃຫ້ມີປະສິດທິພາບ, ປະສິດທິຜົນ ແລະ ສອດຄ່ອງກັບເນື້ອໃນຈິດໃຈ ຂອງການຊ່ວຍເຫຼືອຢ່າງແທ້ຈິງ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ