ຊົມເຊີຍ ກຸ່ມບໍລິສັດ ພົງຊັບທະວີ ມອບເຄື່ອງຊ່ວຍຫາຍໃຈ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນອັງຄານ, 05 ພ.ພ 2020 18:00

​​​​​ໃນຕອນບ່າຍ ຂອງວັນທີ 5 ພຶດສະພາ 2020 ທີ່ ສຳນັກງານນາຍົກລັດຖະມົນຕີ, ກຸ່ມບໍລິສັດ ພົງຊັບທະວີ ຈຳກັດຜູ້ດຽວ ໄດ້ນຳເອົາເຄື່ອງຊ່ວຍຫາຍໃຈ ຄົບຊຸດຈໍານວນ 5 ເຄື່ອງທີ່ນໍາເຂົ້າຈາກສາທາລະນະລັດເກົາຫຼີ ມອບໃຫ້ລັດຖະບານ ເພື່ອກຽມພ້ອມຮັບໃຊ້ເຂົ້າໃນການຊ່ວຍເຫຼືອຄົນເຈັບ ທີ່ຕິດເຊື້ອພະຍາດ ໂຄວິດ-19 ລວມມູນຄ່າ 1.480.000.000 ກີບ,ຊຶ່ງມອບໂດຍທ່ານນາງ ວຽງສະຫວັນ ເສນາພວນ, ຮອງປະທານກຸ່ມບໍລິສັດ ພົງຊັບທະວີ ຈໍາກັດຜູ້ດຽວ ແລະ ຕາງໜ້າລັດຖະບານ ກ່າວຮັບໂດຍ ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19, ໂດຍມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງສອງຝ່າຍ ເຂົ້າຮ່ວມ.

​​​ໂອກາດນີ້, ທ່ານ ສົມດີ ດວງດີ ໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ກຸ່ມບໍລິສັດ ພົງຊັບທະວີ ຈໍາກັດຜູ້ດຽວ ພ້ອມດ້ວຍຄະນະ ທີ່ໄດ້ປະກອບສ່ວນສະໜັບສະໜູນ ຊ່ວຍເຫຼືອອຸປະກອນເຄື່ອງຊ່ວຍຫາຍໃຈຄົບຊຸດ ໃຫ້ແກ່ລັດຖະບານ ໃນຄັ້ງນີ້, ຊຶ່ງການຊ່ວຍເຫຼືອດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການ ຂອງສະພາບການ ແລະ ວຽກງານຕົວຈິງ ໃນປະຈຸບັນ ກໍ່ຄືສະເພາະໜ້າ ແລະ ຍາວນານ ສຳລັບວຽກງານສາທາລະນະສຸກ ກໍຄືການຊ່ວຍຫາຍໃຈ ໃຫ້ແກ່ຄົນເຈັບ ບໍ່ສະເພາະແຕ່ຜູ້ຕິດເຊື້ອພະຍາດ ໂຄວິດ-19 ເທົ່ານັ້ນ, ແຕ່ຍັງສາມາດນຳໃຊ້ຊ່ວຍຄົນເຈັບຫາຍໃຈ ຈາກພະຍາດອື່ນໆອີກດ້ວຍ, ຄຽງຄູ່ກັນນັ້ນ ກໍ່ຍັງເປັນການປະກອບສ່ວນ ຊ່ວຍຍົກລະດັບຄວາມສາມາດ ແລະ ຄຸນນະພາບ ຂອງວຽກງານສາທາລະນະສຸກ ຂອງ ສປປ ລາວ ຂຶ້ນຕື່ມອີກ. ນອກນີ້ ທ່ານຮອງນາຍົກລັດຖະມົນຕີ ກໍ່ໄດ້ຊີ້ນຳໃຫ້ພາກສ່ວນກ່ຽວຂ້ອງ ນໍາເຄື່ອງຊ່ວຍເຫຼືອດັ່ງກ່າວ ໄປຄຸ້ມຄອງນຳໃຊ້ໃຫ້ຍາວນານ ແລະ ເກີດຜົນປະໂຫຍດສູງສຸດ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ