ຄະນະສະເພາະກິດ ປຶກສາຫາລືແຜນມາດຕະການໃນຕໍ່ໜ້າ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພຸດ, 29 ມ.ສ 2020 16:00

​ໃນຕອນບ່າຍວັນທີ 27 ເມສາ 2020 ທີ່ ກະຊວງການເງິນ, ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຈັດກອງປະຊຸມປຶກສາຫາລື ກ່ຽວກັບແຜນການຜ່ອນຜັນບາງມາດຕະ ການ ຫຼັງວັນທີ 3 ພຶດສະພາ 2020, ຖ້າບໍ່ພົບກໍລະນີຕິດເຊື້ອພະຍາດໂຄວິດ-19 ໃໝ່ ໃນ ສປປ ລາວ, ພາຍໃຕ້ການເປັນປະທານຂອງ ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19, ມີຄະນະດັ່ງກ່າວ ເຂົ້າຮ່ວມ.

ຈຸດປະສົງ ຂອງກອງປະຊຸມ ແມ່ນເພື່ອຄົ້ນຄວ້າ ແລະ ປະກອບຄຳເຫັນ ໃສ່ຮ່າງແຜນການຜ່ອນຜັນບາງມາດຕະການ ພາຍຫຼັງວັນທີ 3 ພຶດສະພາ 2020 ໃຫ້ມີຄວາມຄົບຖ້ວນ, ແທດເໝາະກັບສະພາບຕົວຈິງ, ມີຄວາມສົມບູນຍິ່ງຂຶ້ນ ແລະ ສາມາດຈັດຕັ້ງປະຕິບັດໄດ້. ທັງນີ້ ກໍ່ເພື່ອເຮັດໃຫ້ການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ໃນ ສປປ ລາວ ກໍ່ຄືຊີວິດ ແລະ ຊັບສິນຂອງພໍ່ແມ່ປະຊາຊົນ ມີຄວາມປອດໄພ, ຫຼຸດຜ່ອນຜົນກະທົບຕໍ່ ຊີວິດການເປັນຢູ່ຂອງປະຊາຊົນບັນດາເຜົ່າ ແລະ ເສດຖະກິດ-ສັງຄົມຂອງ ສປປ ລາວ, ທັງເປັນທິດທາງ ແລະ ບ່ອນອີງໃນການຜ່ອນຜັນ ມາດຕະການໃນຂອງເຂດທົ່ວປະເທດ, ພ້ອມກັນນັ້ນ ກໍເພື່ອເປັນການຈຳກັດ ບໍ່ໃຫ້ມີການແຜ່ລະບາດເປັນວົງກວ້າງ ແລະ ກັບຄືນມາຮອບໃໝ່, ເຮັດໃຫ້ຊຸມຊົນໄດ້ກັບມາໃຊ້ຊີວິດຕາມປົກກະຕິເທື່ອລະກ້າວ, ແນໃສ່ເຮັດໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ປອດໄພ ແລະ ໝັ້ນຄົງ. ຊຶ່ງບັນຫາຫຼັກ ກໍ່ແມ່ນສຸມໃສ່ຄົ້ນຄວ້າ ແລະ ປະກອບຄຳເຫັນ ຕໍ່ແຜນການກຳນົດມາດຕະການໃນຕໍ່ໜ້າ ໃນແຕ່ລະໄລຍະ ທີ່ຮັບປະກັນຄວາມປອດໄພ ຈາກການຕິດເຊື້ອພະຍາດ ແລະ ຫຼຸດຜ່ອນຜົນກະທົບຕໍ່ເສດຖະກິດ-ສັງຄົມ ເປັນຕົ້ນ ວຽກງານການສຶກສາ-ກິລາ; ວຽກງານທາງສັງຄົມ (ການຈັດກິດຈະກຳຕ່າງໆ); ການປະຈຳການ ຂອງພະລັດງານ-ລັດຖະກອນ; ການຂົນສົ່ງ; ການເຂົ້າ-ອອກປະເທດ; ການເດີນທາງພາຍໃນແຂວງ ແລະ ແຂວງຕໍ່ແຂວງ ຂອງປະຊາຊົນ; ການເຄື່ອນໄຫວວຽກງານການຄ້າ, ການດຳເນີນກິດຈະການ ໂຮງງານອຸດສາຫະກຳ; ການປະຕິບັດນະໂຍບາຍຕ່າງປະເທດ; ແຜນວຽກການທ່ອງທ່ຽວ ແລະ ອື່ນໆ.​​


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ
ຂ່າວອື່ນໆ