ຫຼາຍພາກສ່ວນ ສືບຕໍ່ປະກອບສ່ວນມອບເຄື່ອງຊ່ວຍເຫຼືອ ເພື່ອປ້ອງກັນໂຄວິດ-19

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນອັງຄານ, 28 ມ.ສ 2020 16:00

​​​​ໃນຕອນບ່າຍ ຂອງວັນທີ 28 ເມສາ 2020 ທີ່ ສໍານັກງານນາຍົກລັດຖະມົນຕີ, ທ່ານ ສົມດີ ດວງດີ ຮອງນາ ຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ໄດ້ຕາງໜ້າລັດຖະບານ ຮັບເຄື່ອງຊ່ວຍເຫຼືອ ແລະ ເງິນສົດ ຈາກບັນດາຫົວໜ່ວຍທຸລະກິດທີ່ດໍາເນີນທຸລະກິດໃນ ສປປ ລາວ ຈຳນວນ 4 ບໍລິສັດ, ໂດຍມີຄະນະສະເພາະກິດ ແລະ ພະນັກ ງານທີ່ກ່ຽວຂ້ອງຂອງແຕ່ລະພາກສ່ວນ ເຂົ້າຮ່ວມ.
​​​ພາກສ່ວນທີ່ນຳເອົາເຄື່ອງ ມາມອບຊ່ວຍເຫຼືອໃນຄັ້ງນີ້ ປະກອບມີ: 
​​
1). ບໍລິສັດທາງລົດໄຟ ລາວ-ຈີນ ມອບເຄື່ອງຊ່ວຍເຫຼືອ ລວມເປັນຈໍານວນເງິນທັງໝົດ 1,6 ຕື້ກວ່າກີບ; 

2). ບໍລິສັດ ຮ່ວມທຶນລາວ-ຈີນ ມອບເງິນສົດ ຈໍານວນ 500 ລ້ານກີບ; 

3). ບໍລິສັດໄທເມດ (ມູນນິທິ ວິລະພູວົງ) ມອບເງິນສົດ ຈໍານວນ 150 ລ້ານກີບ ແລະ 

​4).ບໍລິ ສັດ ສົມວັນຈະເລີນ ເປໂຕລ້ຽມເຈວລາວ ຈໍາກັດ ມອບເງິນສົດ ຈໍານວນ 80 ລ້ານກີບ.

​​​ໃນໂອກາດນີ້, ທ່ານ ສົມດີ ດວງດີ ໄດ້ສະແດງຂອບໃຈ ຕໍ່ 4 ບໍລິສັດ ທີ່ມີນໍ້າໃຈເປັນຫ່ວງເປັນໄຍ ແລະ ເສຍ ສະຫຼະຜົນປະໂຫຍດສ່ວນຕົວ ເພື່ອປະກອບສ່ວນຊ່ວຍເຫຼືອລັດຖະບານ ກໍ່ຄື ສັງຄົມ ເພື່ອຜ່ານຜ່າຄວາມຫຍຸ້ງຍາກໃນຄັ້ງນີ້ໄປດ້ວຍດີ, ຊຶ່ງຄະນະສະເພາະກິດ ຈະໄດ້ນຳໄປແຈກຢາຍ ແລະ ນຳໃຊ້ໃຫ້ຖືກເປົ້າໝາຍ, ມີຄວາມໂປ່ງໃສ ແລະ ເກີດປະໂຫຍດສູງສຸດ ຢ່າງແທ້ຈິງ.​
​​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ
ຂ່າວອື່ນໆ