ນາຍົກລັດຖະມົນຕີ ລົງຕິດຕາມຊຸກຍູ້ ແລະ ໃຫ້ກຳລັງໃຈ ການປະຕິບັດໜ້າທີ່ ຂອງແພດ-ໝໍ ທີ່ປະຕິບັດໜ້າທີ່ເພື່ອປິ່ນປົວຜູ້ທີ່ຕິດເຊື້ອ ໂຄວິດ 19

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນຈັນ, 27 ມ.ສ 2020 10:00

​​ໃນຕອນເຊົ້າຂອງວັນທີ 27 ເມສາ 2020 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂ້ ການລະບາດຂອງພະຍາດ ໂຄວິດ-19 ໄດ້ເຄື່ອນໄຫວຢ້ຽມຢາມ ແລະ ຕິດຕາມ ການປະຕິບັດໜ້າທີ່ ວຽກງານກວດກາຄັດກອງ ແລະ ປິ່ນປົວຄົນເຈັບທີ່ຕິດເຊື້ອພະຍາດ ໂຄວິດ-19 ຂອງທີມແພດ-ໝໍ ຢູ່ໂຮງໝໍມິດຕະພາບ 150 ຕຽງ.

​​ໂອກາດດັ່ງກ່າວ ທ່ານ ດຣ. ສະໜອງ ທອງຊະນະ ຜູ້ອໍານວຍການໂຮງໝໍມິດຕະພາບ 150 ຕຽງ ໄດ້ລາຍງານໃຫ້ຊາບວ່າ: ປັດຈຸບັນໂຮງໝໍມິດຕະພາບ ພວມສືບຕໍ່ປິ່ນປົວຄົນເຈັບ ທີ່ຕິດເຊື້ອໂຄວິດ-19 ຈໍານວນ 11 ຄົນ ຊຶ່ງອາການຂອງຄົນເຈັບເຫຼົ່ານີ້ ແມ່ນຢູ່ຂັ້ນຊົງຕົວເບົາບາງ ແລະ ຄົບກໍານົດການກິນຢາແລ້ວ ແຕ່ຍັງລໍຖ້າການກວດເພື່ອຢັ້ງຢືນ ເຊື້ອພະຍາດ ໂຄວິດ 19 ຕື່ມອີກ; ພ້ອມນີ້ຍັງສືບຕໍ່ເຝົ້າລະວັງ ແລະ ຄັດກອງຄົນເຈັບກໍລະນີສົງໄສ ເພື່ອກວດຫາເຊື້ອ ແລະ ປິ່ນປົວ ໃຫ້ທັນການ.
 
​​ໃນການລົງຕິດຕາມໃນຄັ້ງນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ເປັນຫ່ວງເປັນໄຍຕໍ່ບັນດາພະນັກງານແພດ-ໝໍ, ພະຍາບານ ທີ່ກໍາລັງປະຕິບັດໜ້າທີ່ ດ້ວຍຄວາມເສຍສະຫຼະ ແລະ ມີຄວາມຮັບຜິດຊອບສູງ ໃນການຊ່ວຍເບິ່ງແຍງ ແລະ ປິ່ນປົວຄົນເຈັບ, ຫຼັງຈາກທີ່ໃຫ້ການບໍລິການປິ່ນປົວຄົນເຈັບແລ້ວ ບັນດານັກຮົບເສື້ອຂາວເຫຼົ່ານັ້ນ ຍັງໄດ້ຈໍາກັດບໍລິເວນຕົນເອງນຳອີກ ໂດຍບໍ່ໄດ້ກັບໄປຫາຄອບຄົວຂອງຕົນ. ພ້ອມກັນນີ້ ທ່ານນາຍົກລັດຖະມົນຕີ ຍັງໄດ້ຊີ້ນຳໃຫ້ກະຊວງສາທາລະນະສຸກ ເອົາໃຈໃສ່ຕໍ່ຊີວິດການເປັນຢູ່ ລວມທັງ ສະຖານທີ່ ແລະ ອຸປະກອນຕ່າງໆ ທີ່ຮັບໃຊ້ໃນການປະຕິບັດວຽກງານ ຂອງແພດໝໍ ເພື່ອຮັບມືກັບພະຍາດໂຄວິດ-19. ນອກນັ້ນ ທ່ານ ນາຍົກລັດຖະມົນຕີ ຍັງໄດ້ໃຫ້ກໍາລັງໃຈຄົນເຈັບທີ່ກໍາລັງປິ່ນປົວ ພ້ອມທັງ ເນັ້ນໜັກໃຫ້ປະຕິບັດຕາມຄໍາແນະນໍາຂອງແພດໝໍຢ່າງເຄັ່ງຄັດ.
​​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ