ຄະນະສະເພາະກິດ ຮັບເຄື່ອງ ແລະ ເງິນຊ່ວຍເຫຼືອລັດຖະບານ

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນສຸກ, 24 ມ.ສ 2020 16:00

​ໃນຕອນບ່າຍ ຂອງວັນທີ 24 ເມສາ 2020 ທີ່ ສຳນັກງານນາຍົກລັດຖະມົນຕີ, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19 ໄດ້ຮັບເຄື່ອງ ແລະ ເງິນຊ່ວຍເຫຼືອລັດຖະບານ ຈາກ 4 ພາກສ່ວນ ລວມມູນຄ່າ 3,5 ຕື້້ກວ່າກີບ, ໂດຍມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງແຕ່ລະພາກສ່ວນເຂົ້າຮ່ວມ.

ພາກສ່ວນທີ່ນຳເຄື່ອງ ແລະ ເງິນ ມາມອບຊ່ວຍເຫຼືອໃນຄັ້ງນີ້ ປະກອບມີ: 1). ກະຊວງພະລັງງານ ແລະ ບໍ່ແຮ່ ມອບເຄື່ອງປ້ອງກັນພະຍາດ ມູນຄ່າ 100.000.000 ກີບ ແລະ ເງິນສົດ ຈຳນວນ100.000.000 ກີບ, ກ່າວມອບໂດຍ ທ່ານ ຄຳມະນີ ອິນທິລາດ, ລັດຖະມົນຕີກະຊວງພະລັງງານ ແລະ ບໍ່ແຮ່; 2). ບໍລິສັດ ສົມບູນການຄ້າ ຂາອອກ-ຂາເຂົ້າ ມອບເງິນ ຈຳນວນ 2.000.000.000 ກີບ, ໃນນັ້ນ ມອບໃຫ້ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງສາທາລະນະສຸກ ແລະ ຫ້ອງວ່າການສຳນັກງານນາຍົກລັດຖະມົນຕີ ພາກສ່ວນລະ 500.000.000 ກີບ, ກ່າວມອບໂດຍ ທ່ານ ອຸດົມສັກ ອຸດົມທອງກະເສີມ, ປະທານບໍລິສັດ ສົມບູນການຄ້າ ຂາອອກ-ຂາເຂົ້າ; 3). ບໍລິສັດ ວິສະວະກຳ ທາງລົດໄຟຈີນ ມອບເງິນ ຈຳນວນ 1.000.000.000 ກີບ, ກ່າວມອບໂດຍ ທ່ານ ຫວາງ ສີ ຮຸ່ຍ (WANG QIHUI), ທູດທີ່ປຶກສາເສດຖະກິດ ແລະ ການຄ້າ, ສະຖານເອກອັກຄະລັດຖະທູດຈີນ ປະຈຳ ສປປ ລາວ; 4). ບໍລິສັດ ບີຄຣີມ ພະລັງງານລາວ ມອບເງິນ ຈຳນວນ 1.200.000 ບາດ (ສະກູນເງິນໄທ) ຫຼື ປະມານ 358.000.000 ກີບ, ກ່າວມອບໂດຍ ທ່ານ ສຸຣັກ ກຳເພັດ (SUARK KUMPET), ຜູ້ຊ່ວຍຜູ້ຈັດການຝ່າຍບໍລິຫານ, ບໍລິສັດ ບີຄຣີມ ພະລັງງານລາວ.
​ໃນໂອກາດນີ້, ທ່ານ ສົມດີ ດວງດີ ໄດ້ກ່າວສະແດງຄວາມຊົມເຊີຍ ແລະ ຂອບໃຈ ຕໍ່ບັນດາພາກສ່ວນ ທີ່ໄດ້ນຳເອົາເຄື່ອງ ແລະ ເງິນ ມາມອບຊ່ວຍເຫຼືອລັດຖະບານ ໃນຄັ້ງນີ້, ຊຶ່ງເປັນການເສຍສະຫຼະຜົນປະໂຫຍດສ່ວນຕົວ, ແບ່ງນ້ຳໃຈ ແລະ ໃຫ້ກຳລັງໃຈ ແກ່ລັດຖະບານ ກໍ່ຄືທຸກພາກສ່ວນທີ່ກ່ຽວຂ້ອງ ໃນການປະຕິບັດໜ້າທີ່ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ-ໂຄວິດ-19 ຢູ່ ສປປ ລາວ ໃນຄັ້ງນີ້ ໃຫ້ສາມາດຜ່ານຄວາມຫຍຸ້ງຍາກ ໄປໄດ້ໂດຍໄວ. ອັນສຳຄັນ ແມ່ນຈະນຳເຄື່ອງ ແລະ ເງິນທີ່ໄດ້ຮັບການຊ່ວຍເຫຼືອດັ່ງກ່າວ ໄປນຳໃຊ້ໃຫ້ມີຄວາມໂປ່ງໃສ, ສອດຄ່ອງກັບຄວາມຮຽກຮ້ອງຕ້ອງການຕົວຈິງ ແລະ ເກີດປະໂຫຍດຕໍ່ປະເທດຊາດ ແລະ ສັງຄົມ ຢ່າງແທ້ຈິງ.​


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ