ຊົມເຊີຍ 3 ບໍລິສັດ ທີ່ປະກອບສ່ວນມອບເຄື່ອງຊ່ວຍເຫຼືອ ເພື່ອປ້ອງກັນໂຄວິດ -19

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 20 ມ.ສ 2020 10:00

​​​ໃນຕອນບ່າຍ ຂອງວັນທີ 20 ເມສາ 2020 ທີ່ ສໍານັກງານນາຍົກລັດຖະມົນຕີ , ທ່ານ ສົມດີ ດວງດີ ຮອງນາຍົກ ລັດຖະມົນຕີ , ລັດຖະມົນຕີກະຊວງການເງິນ , ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ ລະບາດ ຂອງເຊື້ອພະຍາດ ໂຄວິດ-19 ໄດ້ຕາງໜ້າລັດຖະບານ ຮັບເຄື່ອງຊ່ວຍເຫຼືອ ຈາກບັນດາຫົວໜ່ວຍທຸລະກິດ ທີ່ດໍາ ເນີນທຸລະກິດໃນ ສປປ ລາວ ຈຳນວນ 3 ພາກສ່ວນ, ໂດຍມີຄະນະສະເພາະກິດ ແລະ ພະນັກງານທີ່ກ່ຽວຂ້ອງ ຂອງແຕ່ ລະພາກສ່ວນ ທີ່ນຳເອົາເຄື່ອງມາມອບ ເຂົ້າຮ່ວມ.

​​ພາກສ່ວນທີ່ນຳເອົາເຄື່ອງ ມາມອບຊ່ວຍເຫຼືອໃນຄັ້ງນີ້ ປະກອບມີ: 1). ກຸ່ມບໍລິສັດ ຮ່ວາງ ແອງ ຢາລາຍ ມອບ ເຄື່ອງ ນຸ່ງປ້ອງກັນພະຍາດ 3.000 ຊຸດ, ຜ້າອັດປາກ-ດັງ 205.000 ອັນ ເຈວລ້າງມື 5.000 ກ່ອງ , ຖົງມື 50.000 ຄູ່ ລວມມູນຄ່າ ທັງໝົດ 100.000 ໂດລາສະຫະລັດ ຫຼື ປະມານ 900 ລ້ານກີບ, ໂດຍການມອບຂອງທ່ານ ເຈ  ກວາງ ລອງ ຕາງໜ້າກຸ່ມບໍລິສັດ ຮ່ວາງ ແອງ ຢາລາຍ.; 2). ບໍລິສັດ ສີສົມບັດ ເຊົ່າສິນເຊື່ອ ຈໍາກັດ ມອບເຂົ້າສານ 50 ໂຕນ ມູນຄ່າ 500.000.000 ກີບ , ໂດຍການມອບຂອງທ່ານ ສີສົມບັດ ພິລາວົງ, ປະທານບໍລິສັດ ສີສົມບັດ ເຊົ່າສິນເຊື່ອ ຈໍາກັດ; 3). ກຸ່ມບໍລິສັດ ເທຣດເຊີລາວ ມອບຜ້າອົດປາກ-ດັງ ແລະ ເງິນສົດຈໍານວນໜຶ່ງ ລວມມູນຄ່າ ທັງໝົດ 160.000.000 ກີບ, ໂດຍການມອບຂອງ ທ່ານ ສີສົມບັດ ດວງວິໄລແກ້ວ,  ປະທານກຸ່ມບໍລິສັດ ເທຣດເຊີລາວ.
 
​​ໃນໂອກາດນີ້, ທ່ານ ສົມດີ ດວງດີ ໄດ້ສະແດງຂອບໃຈ ຕໍ່ສາມບໍລິສັດ ທີ່ມີນໍ້າໃຈ, ມີຄວາມເປັນຫ່ວງເປັນໄຍ ແລະ ເສຍສະຫຼະຜົນປະໂຫຍດສ່ວນຕົວ ນຳເອົາເຄື່ອງມາມອບຊ່ວຍເຫຼືອ ເພື່ອປະກອບສ່ວນຊ່ວຍເຫຼືອລັດຖະບານ ກໍ່ຄືສັງຄົມລາວ ໃນຄັ້ງນີ້, ຊຶ່ງຄະນະສະເພາະກິດ ຈະໄດ້ນຳໄປແຈກຢາຍ ແລະ ນຳໃຊ້ໃຫ້ຖືກເປົ້າໝາຍ, ມີຄວາມໂປ່ງໃສ ແລະ ເກີດປະໂຫຍດສູງສຸດ ຢ່າງແທ້ຈິງ.
​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ