ມອບໃບຍ້ອງຍໍ ໃຫ້ຊ່ຽວຊານແພດ ສປ ຈີນ ທີ່ມາຊ່ວຍເຫຼືອ ສປປ ລາວ​

ຜູ້ຂຽນ: ວັນ​ທອງ ລັດ​ຕະ​ນະ​ວິ​ໄລ

ວັນເສົາ, 11 ມ.ສ 2020 18:00

​​ໃນຕອນແລງ ຂອງວັນທີ 10 ເມສາ 2020 ທີ່ ກະຊວງສາທາລະນະສຸກ ໄດ້ຈັດພິທີສະຫຼຸບຜົນງານ ແລະ ມອບໃບຍ້ອງຍໍ ໃຫ້ຄະນະຊ່ຽວຊານແພດ ສປ ຈີນ ທີ່ມາຊ່ວຍປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ, ໂດຍມີທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ-19; ລັດຖະມົນຕີກະຊວງສາທາລະນະສຸກ; ເອກອັກຄະລັດຖະທູດຈີນ ປະຈຳ ສປປ ລາວ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.

ທ່ານ ຮສ. ດຣ. ບຸນກອງ ສີຫາວົງ, ລັດຖະມົນຕີ ກະຊວງສາທາລະນະສຸກ ໄດ້ຕີລາຄາສູງ ຕໍ່ການຊ່ວຍເຫຼືອ ຂອງສປ ຈີນ ໂດຍສະເພາະ ຄະນະຊ່ຽວຊານແພດ ສປ ຈີນ ທີ່ໄດ້ໃຫ້ການປຶກສາ, ແລກປ່ຽນໃຫ້ຄວາມຮູ້ ແລະ ປະສົບການ, ແນະນໍາ ແລະ ນໍາພາຄະນະແພດຂອງ ສປປ ລາວ ທັງຢູ່ສູນກາງ ແລະບັນດາແຂວງ ໃນການປ້ອງກັນ, ຄວບຄຸມການລະບາດ ລວມໄປເຖິງ ການຄຸ້ມຄອງກໍລະນີຜູ້ສົງໄສ ແລະ ການປິ່ນປົວຄົນເຈັບ ທີ່ຕິດເຊື້ອພະຍາດໂຄວິດ-19 ຢ່າງມີຄວາມຮັບຜິດຊອບ, ມີຄວາມຕັ້ງໃຈ ແລະເຮັດວຽກຢ່າງເຕັມກໍາລັງ, ບໍ່ຮູ້ອິດຮູ້ເມື່ອຍ ເຮັດວຽກທັງເວັນທັງຄືນ ເພື່ອຊ່ວຍເຫຼືອຄະນະແພດຂອງລາວ ກໍ່ຄືປະຊາຊົນລາວ, ສິ່ງດັ່ງກ່າວ ແມ່ນນໍ້າໃຈມິດຕະພາບ, ຄວາມຮັກແພງ ແລະ ຄູ່ຮ່ວມຊາຕາກໍາດຽວກັນ ຕາມທິດທາງຂອງການນໍາສອງປະເທດ ຢ່າງແທ້ຈິງ. ການມາຊ່ວຍເຫຼືອ ສປປ ລາວ ຂອງຄະນະຊ່ຽວຊານແພດ ສປ ຈີນໃນຄັ້ງນີ້ ແມ່ນມີຄຸນຄ່າ ແລະ ເກີດປະໂຫຍດຫຼາຍ, ໄດ້ຊ່ວຍໃຫ້ພວກເຮົາປັບປຸງ, ຍົກລະດັບມາດຕະການໃນການປ້ອງກັນ, ຄວບຄຸມການລະບາດຂອງພະຍາດ ລວມໄປເຖິງວິທີການຄຸ້ມຄອງກໍລະນີຜູ້ສົງໄສ ແລະ ການປິ່ນປົວຄົນເຈັບທີ່ຕິດເຊື້ອພະຍາດ ໂຄວິດ-19. ນອກນັ້ນ, ທາງລັດຖະບານ ສປ ຈີນ ຍັງໄດ້ສົ່ງຢາ, ເຄື່ອງມື ແລະ ອຸປະກອນການແພດ ເປັນຈໍານວນຫຼວງຫຼາຍມາໃຫ້ ສປປ ລາວ. ທັງໝົດນີ້, ເຮັດໃຫ້ສປປ ລາວ ມີຄວາມໝັ້ນໃຈ ແລະ ຮູ້ສຶກມີກໍາລັງໃຈ ໃນການຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ແລະ ເຊື່ອໝັ້ນວ່າ ພວກເຮົາຈະສາມາດຄວບຄຸມ ແລະເອົາຊະນະພະຍາດນີ້ໄດ້.
ໃນຕອນທ້າຍ, ທ່ານລັດຖະມົນຕີກະຊວງສາທາລະນະສຸກ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນ ຢ່າງລົ້ນເຫຼືອ ຕໍ່ການຊ່ວຍເຫຼືອ ທີ່ໝົດຈິດໝົດໃຈ ແລະ ເຕັມກຳລັງແຮງ ຂອງຄະນະຊ່ຽວຊານແພດ ສປ ຈີນ, ຊຶ່ງເຊື່ອໝັ້ນວ່າ ປະຊາຊົນລາວ ຈະຈົດຈຳບຸນຄຸນດັ່ງກ່າວ ຕະຫຼອດໄປ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ