ຄະນະສະເພາະກິດ ປຶກສາຫາລື ເພື່ອແບ່ງຄວາມຮັບຜິດຊອບ ຄືນໃໝ່

ຜູ້ຂຽນ: ພະແນກໂຄສະນາ, ກົມປະຊາສຳພັນ

ວັນພຸດ, 08 ມ.ສ 2020 18:00

​​​​​​

  ເພື່ອຜັນຂະຫຍາຍການຈັດຕັ້ງປະຕິບັດ ຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ ວ່າດ້ວຍການເພີ່ມທະວີ ມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານ ພະຍາດ ໂຄວິດ-19 ໃຫ້ມີປະສິດທິຜົນ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ຈຶ່ງໄດ້ແບ່ງຄວາມຮັບຜິດຊອບພາຍໃນ ຕາມຂໍ້ຕົກລົງ ສະບັບເລກທີ 023/ສພກ ລົງວັນທີ 06 ເມສາ 2020 ໂດຍໄດ້ແບ່ງເປັນ 11 ໜ່ວຍງານ ເພື່ອໃຫ້ການຈັດຕັ້ງປະຕິບັດວຽກງານມີປະສິດທິຜົນ ແລະ ທັນການ. ດັ່ງນັ້ນ ໃນວັນທີ 8 ເມສາ 2020 ທີ່ຫ້ອງວ່າການສໍານັກງານນາຍົກລັດຖະມົນຕີ, ຈຶ່ງໄດ້ມີ ກອງປະຊຸມ ເພື່ອປຶກສາຫາລື ກ່ຽວກັບ ກົນໄກການປະສານງານຂອງບັນດາໜ່ວຍງານ ແລະ ຮັບຟັງຄວາມຄືບໜ້າຂອງການຈັດຕັ້ງປະຕິບັດວຽກງານ ຈຳນວນໜຶ່ງ ແລະ ຂໍ້ສະເໜີຕໍ່ລັດຖະບານ ເພື່ອຂໍທິດຊີ້ນຳ ແລະ ຕົກລົງ.

  ໂອກາດນີ້, ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າ ຄະນະສະເພາະກິດ ໄດ້ເນັ້ນໃຫ້ແຕ່ລະໜ່ວຍງານ ຮີບຮ້ອນກຳນົດແຜນວຽກລະອຽດຂອງຕົນ, ແບ່ງຄວາມຮັບຜິດ ຊອບພາຍໃນ ແລະ ແຕ່ງຕັ້ງຜູ້ຊ່ວຍວຽກຕື່ມ ຖ້າເຫັນວ່າຈຳເປັນ; ໃຫ້ເພີ່ມທະວີຊີ້ນຳ ແລະ ຈັດຕັ້ງປະຕິບັດບັນດາໜ້າວຽກຕ່າງໆຄວາມຮັບຜິດຊອບຂອງຕົນ ເປັນຕົ້ນ ວຽກງານສາທາລະນະສຸກ, ວຽກງານກະກຽມສະຖານທີ່ແຍກ ປ່ຽວ ແລະ ປິ່ນປົວ, ວຽກງານໂຄສະນາເຜີຍແຜ່ ຂໍ້ມູນຂ່າວສານ ແລະ ຕ້ານຂ່າວສານທີ່ບິດເບືອນຄວາມຈິງ, ວຽກງານຄຸ້ມຄອງການສັນຈອນ ແລະ ຈໍາກັດບໍລິເວນ, ວຽກງານຄຸ້ມຄອງລາຄາສິນຄ້າ, ວຽກງານກວດກາ ແລະ ອຳນວຍຄວາມສະດວກ ໃນການສົ່ງເສີມສິນຄ້າພາຍໃນ ແລະ ສິນຄ້າເຂົ້າ-ອອກປະເທດ, ວຽກງານຮ່ວມມືກັບຕ່າງປະເທດ ແລະ ວຽກງານງົບປະມານ ແລະ ພາລາທິການ. ພ້ອມກັນນີ້, ຕ້ອງສຸມໃສ່ວຽກງານປຸກລະດົມ ໂຄສະ ນາ ຂົນຂວາຍທົ່ວສັງຄົມ, ວຽກງານຄຸ້ມຄອງແຮງງານ ແລະ ນັກສຶກສາຈາກຕ່າງປະເທດ, ວຽກງານກະກຽມກຳລັງ ສະໜັບສະໜູນຮອບດ້ານ ຊຶ່ງແມ່ນກຳລັງປ້ອງກັນຊາດ-ປ້ອງກັນຄວາມສະຫງົບ ເປັນຜູ້ຈັດຕັ້ງປະຕິບັດ. ສຳ ລັບກົນໄກການປະສານງານ ມອບໃຫ້ແຕ່ລະໜ່ວຍງານ ແຕ່ງຕັ້ງຜູ້ປະສານງານຂອງໜ່ວຍຕົນ ເພື່ອປະສານສົມທົບກັບ ກອງເລຂາຄະນະສະເພາະກິດ ຊຶ່ງຈະເປັນຜູ້ສັງລວມ ການຈັດຕັ້ງປະຕິບັດວຽກງານ ຂອງແຕ່ລະໜ່ວຍງານ, ຂໍ້ຫຍຸ້ງຍາກ, ຂໍ້ຄົງຄ້າງ ແລະ ຂໍ້ສະເໜີຕ່າງໆ ເພື່ອລາຍງານຄະນະສະເພາະກິດ ເປັນປົກກະຕິ ແລະ ທັນສະພາບການ.


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ