ຫຼາຍພາກສ່ວນ ສືບຕໍ່ປະກອບສ່ວນດ້ານອຸປະກອນ ແລະ ທຶນຮອນ ເພື່ອແກ້ໄຂໂຄວິດ 19

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 07 ມ.ສ 2020 16:00

​​​​​     ໃນວັນທີ 6 ເມສາ 2020 ທີ່ ສຳນັກງານນາຍົກລັດຖະມົນຕີ ໄດ້ມີ 5 ພາກສ່ວນ ນຳເອົາເງິນ ແລະ ອຸປະກອນປ້ອງກັນພະຍາດ ມາມອບໃຫ້ລັດຖະບານ ເພື່ອປະກອບສ່ວນຮັບມື ແລະ ຄວບຄຸມ ການແຜ່ລະບາດຂອງເຊື້ອພະຍາດ ໂຄວິດ 19 ໃນ ສປປ ລາວ, ໂດຍການກ່າວຮັບ ຂອງທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງເຊື້ອພະຍາດ ໂຄວິດ 19, ຊຶ່ງມີພະນັກງານທີ່ກ່ຽວຂ້ອງ ໃນການມອບ-ຮັບ ຂອງພາກສ່ວນຕ່າງໆ ເຂົ້າຮ່ວມ.
          
     ພາກສ່ວນໄດ້ປະກອບສ່ວນຊ່ວຍເຫຼືອໃນຄັ້ງນີ້ ປະກອບມີ: ບໍລິສັດທີ່ປຶກສາການລົງທຶນ ແລະ ກໍ່ສ້າງເຂື່ອນມອບຢາປິ່ນປົວພະຍາດໂຄວິດ 19 ມູນຄ່າ 80.000 ໂດລາສະຫະລັດ, ຊຶ່ງຕາງໜ້າກ່າວມອບໂດຍທ່ານ ປີຊາໄຊ ແກ້ວໄຊຍະຈັກ ປະທານບໍລິສັດທີ່ປຶກສາການລົງທຶນ ແລະ ກໍ່ສ້າງເຂື່ອນ; ບໍລິສັດ ປີໂຕຣລ້ຽມເທດດິ້ງລາວ ມະຫາຊົນ ມອບອຸປະກອນປະກອບມີ ໜ້າກາກອະນາໄມ 250.000 ອັນ, ນໍ້າຢາ Alcohol 50 ແກັດ, ຖົງມືແພດ 50 ແກັດ, ປາກະປ໋ອງ 240 ແກັດ, ໝີ່ 400 ແກັດ ລວມມູນຄ່າທັງໝົດ 1.100.000.000 ກີບ; ຈາກທະນາຄານຫຸ້ນສ່ວນລົງ ທຶນ ແລະ ພັດທະນາຫວຽດນາມ ມອບເງິນສົດ ມູນຄ່າ 50.000 ໂດລາ, ຕາງໜ້າມອບໂດຍ ທ່ານ ຫງຽນ ວັນ ບິ່ງ ຫົວໜ້າຫ້ອງການຜູ້ຕ່າງໜ້າທະນາຄານຫຸ້ນສ່ວນລົງທຶນ ແລະ ພັດທະນາຫວຽດນາມ, ຜູ້ອຳນວຍການໃຫຍ່ ທະນາຄານຮ່ວມທຸລະກິດ ລາວ-ຫວຽດ; ຈາກບໍລິສັດສະຕາໂທລະຄົມ ລວມມູນຄ່າ 2.830.000.000 ກີບ ປະກອບມີ ອຸປະ ກອນໃນການສື່ສານ (ລະບົບວີດີໂອຄອນເຟີເລັນ, ຊິມກາດພ້ອມມູນຄ່າໂທ ແລະ ດາຕາ, SMSBrandname) ມອບໂດຍ ທ່ານ ລິວ ແມງ ຮ່າ ຜູ້ອຳນວຍການໃຫຍ່ບໍລິສັດຢູນີແທວ; ຈາກບໍລິສັດອີທີແອລ ຈຳກັດ ມອບເງິນສົດ ມູນຄ່າ 400 ລ້ານກີບ ຕາງໜ້າມອບໂດຍທ່ານ ຮວງ ສູຢຸນ ຜູ້ອຳນວຍການໃຫຍ່ ບໍລິສັດອີທີແອລ ຈຳກັດ.​ 
     
     ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈ ຕໍ່ບັນດາພາກສ່ວນ ທີ່ໄດ້ນຳເອົາເງິນ ແລະ ອຸປະກອນປ້ອງກັນພະຍາດ ມາມອບຊ່ວຍເຫຼືອ ໃຫ້ແກ່ລັດຖະບານ ໃນຄັ້ງນີ້, ຊຶ່ງເປັນການປະກອບສ່ວນອັນສຳຄັນ ເຂົ້າໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ ໂຄວິດ 19 ຢູ່ໃນ ສປປ ລາວ ກໍ່ຄືການປະຕິບັດມາດຕະການຕ່າງໆ ທີ່ລັດຖະບານວາງອອກ ໃຫ້ມີປະສິດທິພາບ, ປະສິດທິຜົນ ແລະ ສຳເລັດຕາມຄວາມມຸ້ງມາດປາດຖະໜາ ຂອງພວກເຮົາໝົດທຸກຄົນ, ພ້ອມກັນນັ້ນ ກໍ່ຍັງເປັນການຊຸກຍູ້ ແລະ ໃຫ້ກຳລັງໃຈອັນໃຫຍ່ຫຼວງ ແກ່ລັດຖະບານ ແລະ ປະຊາຊົນລາວ, ຊຶ່ງລັດຖະບານ ຈະນຳໃຊ້ເງິນ ແລະ ອຸປະກອນ ທີ່ໄດ້ຮັບການຊ່ວຍເຫຼືອດັ່ງກ່າວ ໄປນຳໃຊ້ຢ່າງສົມເຫດສົມຜົນ, ບົນພື້ນຖານປະຢັດມັດທະຍັດ ແລະ ເກີດປະໂຫຍດສູງສຸດ ຕໍ່ປະເທດຊາດ ແລະ ປະຊາຊົນ. ນອກຈາກນັ້ນ, ທ່ານຮອງນາຍົກລັດຖະມົນຕີ ຍັງແຈ້ງໃຫ້ພາກສ່ວນຕ່າງໆຊາບ ກ່ຽວກັບສະພາບການປະຕິບັດວຽກງານ ຂອງລັດຖະບານ ກໍ່ຄືຄະນະສະເພາະກິດ ແລະ ພາກສ່ວນກ່ຽວຂ້ອງ ໃນການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງເຊື້ອພະຍາດໂຄວິດ19 ຢູ່ ສປປ ລາວ ໃນໄລຍະຜ່ານມາ ກໍ່ຄື ປະຈຸບັນ ແລະ ທິດທາງແຜນການໃນຕໍ່ໜ້າ, ນອກນັ້ນ ກໍ່ແຈ້ງໃຫ້ຊາບເຖິງຂໍ້ຈຳກັດ, ຂໍ້ສະດວກ ຂອງ ສປປ ລາວ ໃນການຈັດຕັ້ງປະຕິບັດວຽກງານດັ່ງກ່າວ.
                      

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ
ຂ່າວອື່ນໆ