ບໍລິສັດເບຍລາວ ມອບເງິນໃຫ້ລັດຖະບານ ເພື່ອແກ້ໄຂການແຜ່ລະບາດຂອງພະຍາດໂຄວິດ 19

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພະຫັດ, 26 ມິ.ນ 2020 11:00

​ໃນຕອນເຊົ້າ ຂອງວັນທີ 26 ມີນາ 2020 ທີ່ສຳນັກງານນາຍົກລັດຖະມົນຕີ, ບໍລິສັດເບຍລາວ ຈໍາກັດ ໄດ້ນຳເງິນ ຈຳນວນ 2 ຕື້ກີບ ເພື່ອປະກອບສ່ວນສະໜັບສະໜູນລັດຖະບານລາວ ກໍ່ຄື ກະຊວງສາທາລະນາສຸກ ທີ່ກຳລັງຮັບມື ແລະ ຄວບຄຸມການແຜ່ລະບາດຂອງເຊື້ອພະຍາດ ໂຄວິດ 19 ໃນລາວ, ໂດຍການກ່າວມອບໂດຍ ທ່ານ ສູນທອນ ພົມມະຈັກ ປະທານບໍລິສັດເບຍລາວ ຈໍາກັດ ແລະ ກ່າວຮັບແມ່ນ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະ ມົນຕີກະຊວງການເງິນ, ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດຈາກເຊື້ອຈຸລະໂລກ ໂຄວິດ 19 ພ້ອມດ້ວຍ ພາກສ່ວນທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

ໃນໂອກາດດັ່ງກ່າວ, ສົມດີ ດວງດີ ໄດ້ຕາງໜ້າໃຫ້ລັດຖະບານ ແລະ ປະຊາຊົນ ກ່າວສະແດງຄວາມຂອບໃຈຕໍ່ການຊ່ວຍເຫຼືອດັ່ງກ່າວ ໂດຍເຊື່ອໝັ້ນວ່າການປະກອບສ່ວນດັ່ງກ່າວ ຈະຊ່ວຍເຮັດໃຫ້ການແກ້ໄຂການແຜ່ລະບາດຂອງພະຍາດໂຄວິດ 19 ທີ່ເກີດຂຶ້ນໃນລາວຄັ້ງນີ້ ຜ່ານພົ້ນໄປດ້ວຍດີ ໂດຍເງິນດັ່ງກ່າວແມ່ນຈະຖືກນໍາໃຊ້ຕາມເປົ້າໝາຍຢ່າງມີປະສິດທິຜົນ ແລະ ເກີດປະໂຫຍດສູງສຸດ.
 
ໃນໂອກາດດຽວກັນ, ທ່ານ ສູນທອນ ພົມມະຈັກ ໄດ້ກ່າວວ່າ: ບໍລິສັດເບຍລາວຂອງພວກເຮົາຮັບຮູ້ເຖິງການແຜ່ລະບາດຢ່າງຮ້າຍແຮງຂອງເຊື້ອພະຍາດໂຄວິດ 19 ທີ່ເກີດຂຶ້ນໃນທົ່ວໂລກ ລວມທັງ ສປປ ລາວ ຂອງພວກເຮົາ ແລະ ຮູ້ໄດ້ຄວາມເປັນຫ່ວງເປັນໄຍຂອງລັດຖະບານ, ດັ່ງນັ້ນ ພວກເຮົາຈຶ່ງຂໍເປັນສ່ວນໜຶ່ງ ໃນການສະໜັບສະໜູນ ລັດຖະບານລາວ ທີ່ກໍາລັງຮັບມືກັບການແຜ່ລະບາດຂອງພະຍາດດັ່ງກ່າວ. ສຳລັບພາຍໃນບໍລິສັດເບຍລາວ ກໍ່ໄດ້ເອົາໃຈໃສ່ປະຕິບັດຕາມມາດຕະການຕ່າງໆ ທີ່ລັດຖະບານວາງອອກ ແຕ່ລະໄລຍະ ຢ່າງເຄັ່ງຄັດ ເພື່ອແນ່ໃຈວ່າພະນັກງານທັງໝົດຂອງບໍລິສັດເບຍລາວ ໄດ້ຮັບຮູ້ຂໍ້ມູນຂ່າວສານ ແລະ ມີການຝຶກອົບຮົມເບື້ອງຕົ້ນໃນການຮັບມື ແລະ ປ້ອງກັນການແຜ່ລະບາດຂອງພະຍາດດັ່ງກ່າວ, ເຊິ່ງມາດຕະການທີ່ມີຄວາມປອດໄພ ແມ່ນໄດ້ຖືກນໍາມາປະຕິບັດໃນໂຮງງານ, ໂດຍຄະນະຜູ້ບໍລິຫານບໍລິສັດ ໄດ້ມີການສົ່ງຂ່າວໃຫ້ພະນັກງານຢ່າງທັນການ ແລະ ຄໍາແນະນໍາຕ່າງໆຂອງອົງການອານາໄມໂລກເພື່ອປ້ອງກັນຕົນເອງ ແລະ ຄອບຄົວໃຫ້ມີຄວາມປອດໄພ.​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ