ລັດຖະບານ ກວດກາສະຖານທີ່ຮອງຮັບສຸກເສີນເພື່ອປິ່ນປົວຜູ້ຕິດເຊື້ອພະຍາດ COVID-19

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 23 ມິ.ນ 2020 17:00

​​​​​
​​​​​​​​​​​​​​​​​​​​​​​​​​ເພື່ອສືບຕໍ່ຕິດຕາມກວດກາ ແລະ ຊຸກຍູ້ ການປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງເຊື້ອພະຍາດ COVID-19 ທີ່ລັດຖະບານວາງອອກ ກໍ່ຄືການກະກຽມໂຄງລ່າງພື້ນຖານ ເພື່ອຮອງຮັບກໍລະນີມີການລະບາດຂອງເຊື້ອພະຍາດ COVID-19 ຢູ່ ສປປ ລາວ ຮຸນແຮງ ແລະ ໂຮງໝໍບໍ່ພຽງພໍ ສຳລັບຜູ້ປ່ວຍຕິດເຊື້ອ, ໃນຕອນບ່າຍ ຂອງວັນທີ 23 ມີນາ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍຄະນະ ໄດ້ໄປກວດກາເບິ່ງພື້ນທີ່ ທີ່ຈະກຳນົດເປັນຈຸດຮອງຮັບ ເພື່ອແກ້ໄຂສະພາບທີ່ອາດເກີດຂຶ້ນດັ່ງກ່າວ ຢູ່ໂຮງຮຽນການເມືອງ-ການປົກຄອງໜອງບົວທອງ, ໂຮງຮຽນຕຳຫຼວດ ບ້ານດົງຊຽງດີ ແລະ ສະໜາມກິລາແຫ່ງຊາດ ຫຼັກ 16.

​​​​​ ​​​​​​​​​​​​​​​​​​​​​​​​​​ຜ່ານການລົງກວດກາເບິ່ງສະຖານທີ່ຕົວຈິງ ເຫັນວ່າ: ໂຮງຮຽນການເມືອງ-ການປົກຄອງ ໜອງບົວທອງ ມີຫໍພັກນັກສຶກສາ ສາມາດຮອງຮັບຕຽງຄົນເຈັບ ໄດ້ປະມານ 100 ຕຽງ; ໂຮງຮຽນຕຳຫຼວດ ບ້ານດົງຊຽງດີ ມີຫໍພັກນັກຮຽນ ສາມາດຮອງຮັບຕຽງຄົນເຈັບ ໄດ້ປະມານ 200 ຕຽງ; ສ່ວນສະໜາມກິລາແຫ່ງຊາດ ຫຼັກ 16 ໄດ້ແບ່ງອອກເປັນສະຖານທີ່ຮອງຮັບຫຼັກ ສາມາດຮອງຮັບໄດ້ຈຳນວນ 972 ຕຽງ ແລະ ສະຖານທີ່ຮອງຮັບສຳຮອງ ສາມາດຮອງຮັບໄດ້ 270 ຕຽງ, ຊຶ່ງລວມທັງໝົດ ຈາກ 3 ສະຖານທີ່ ທີ່ໄດ້ລົງກວດກາພື້ນທີ່ຕົວຈິງໃນຄັ້ງນີ້ ແມ່ນມີຄວາມສາມາດຮອງຮັບຕຽງຄົນເຈັບໄດ້ 1.500 ກວ່າຕຽງ.​
 
​​​​​ ​​​​​​​​​​​​​​​​​​​​​​​​​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ