ທ່ານຮອງນາຍົກ ຕ້ອນຮັບຜູ້ຕາງໜ້າອົງການອຸຍນີເຊັບ ຢ້ຽມອຳລາ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 23 ມິ.ນ 2020 14:00

​​​​​ ​​​​​​​​​​​​​​​​​​​​​​​​​ໃນຕອນເຊົ້າ ຂອງວັນທີ 20 ມີນາ 2020 ທີ່ ກະຊວງແຜນການ ແລະ ການລົງທຶນ, ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ໃຫ້ກຽດຕ້ອນຮັບ ການເຂົ້າຢ້ຽມອຳລາ ຂອງທ່ານ ອົກຕາວຽນ ບີໂວນ, ຜູ້ຕາງໜ້າອົງການອຸຍນີເຊັບ ປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ ຢູ່ ສປປ ລາວ.

​​​​​ ​​​​​​​​​​​​​​​​​​​​​ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການປະກອບສ່ວນພັດທະນາ ສປປ ລາວ ຂອງອົງການອຸຍນີເຊັບ ກໍ່ຄືການປະກອບສ່ວນທາງດ້ານເຫື່ອແຮງ ແລະ ຄວາມຮູ້ຄວາມສາມາດ ຂອງທ່ານ ອົກຕາວຽນ ບີໂວນ ໂດຍສະເພາະ ວຽກງານພັດທະນາຊັບພະຍາກອນມະນຸດ, ວຽກຄວາມກ້າວໜ້າ ຂອງແມ່ ແລະ ເດັກ, ວຽກຄວາມສະເໝີພາບ ລະຫວ່າງ ຍິງ-ຊາຍ ກໍ່ຄືວຽກງານການສຶກສາ, ສາທາລະນະສຸກ ແລະ ອື່ນໆ; ການປະຕິບັດໜ້າທີ່ຂອງທ່ານ ອົກຕາວຽນ ບີໂວນ ຕະຫຼອດໄລຍະປະຈຳການ ຢູ່ ສປປ ລາວ ແມ່ນມີຜົນສຳເລັດຕາມແຜນການ ແລະ ລະດັບຄາດໝາຍທີ່ວາງໄວ້ ເປັນສ່ວນໃຫຍ່, ທັງມີປະສິດທິພາບ-ປະສິດທິຜົນ ຜົນຢ່າງແທ້ຈິງ; ໄດ້ກ່າວຂອບໃຈ ຕໍ່ອົງການອຸຍນີເຊັບ ແລະ ທ່ານ ອົກຕາວຽນ ບີໂວນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ແກ່ສປປລາວ ໃນໄລຍະທີ່ຜ່ານມາ; ທ່ານຮອງນາຍົກລັດຖະມົນຕີ ຍັງອວຍພອນ ໃຫ້ທ່ານ ອົກຕາວຽນ ບີໂວນ ຈົ່ງປະສົບຜົນສຳເລັດ ໃນປະຕິບັດໜ້າທີ່ໃໝ່ ທີ່ມີກຽດ, ເຖິງຈະໄປປະຕິບັດໜ້າທີ່ໃໝ່ ແຕ່ ສປປ ລາວ ກໍ່ມີຄວາມຍິນດີຕ້ອນຮັບທ່ານຢູ່ສະເໝີ ບໍ່ວ່າຈະເປັນວຽກທາງການ ກໍ່ຄືການຢ້ຽມຢາມສ່ວນຕົວ. ນອກນັ້ນ, ທ່ານຮອງນາຍົກ ຍັງນຳສະເໜໃຫ້ທ່ານ ອົກຕາວຽນ ບີໂວນ ຊາບຕື່ມ ກ່ຽວກັບສະພາບ ແລະ ມາດຕະການປ້ອງກັນ, ຄວບຄຸມ ແລະ ຕອບໂຕ້ ການແຜ່ລະບາດ ຂອງເຊື້ອພະຍາດ Covid-19, ລວມທັງ ຄວາມຈຳກັດ ແລະ ຄວາມຮຽກຮ້ອງຕ້ອງການອັນຈຳເປັນ ຂອງ ສປປ ລາວ.
​​​​​ ​​​​​​​​​​​​​​​​​​​​​ໃນໂອກາດດຽວກັນ, ທ່ານ ອົກຕາວຽນ ບີໂວນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານຮອງນາຍົກລັດຖະມົນຕີ ໃນຄັ້ງນີ້ ກໍ່ຄືການໃຫ້ທິດຊີ້ນຳ ແລະ ຮ່ວມມື ແກ່ການ ຈັດຕັ້ງປະຕິບັດວຽກງານຕ່າງໆ ຂອງອົງການອຸຍນີເຊັບ ປະຈຳ ສປປ ລາວ ໃນໄ​ລຍະທີ່ຜ່ານມາ ເຮັດໃຫ້ການປະຕິບັດວຽກງານ ມີຄວາມສະດວກ ແລະ ບັນລຸຕາມແຜນການເປັນຢ່າງດີ; ຂອບໃຈຕໍ່ທຸກພາກ ສ່ວນທີ່ກ່ຽວຂ້ອງ ຂອງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນ ແລະ ອຳນວຍຄວາມສະດວກ ໃນການປະຕິບັດໜ້າທີ່ ຕະຫຼອດໄລຍະປະຈຳການ ຢູ່ ສປປລາວ.​


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ