ນາຍົກລັດຖະມົນຕີ ລົງຕິດຕາມ 4 ຈຸດ ເຝົ້າລະວັງເຊື້ອພະຍາດໂຄວິດ 19

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນຈັນ, 16 ມິ.ນ 2020 16:00

​​​ເພື່ອເຝົ້າລະວັງ ແລະ ປ້ອງກັນການແຜ່ລະບາດຂອງເຊື້ອໄວຣັສ ໂຄວິດ 19 (COVID-19) ທີ່ກຳລັງລະບາດຢູ່ 150 ປະເທດໃນທົ່ວໂລກ,  ຢູ່ ສປປ ລາວ ໃນໄລຍະທີ່ຜ່ານມາ ທຸກພາກສ່ວນໄດ້ເອົາໃຈໃສ່ເຝົ້າລະວັງ ແລະ ຕິດຕາມ ຢ່າງຈິງຈັງ, ໄດ້ແຕ່ງຕັ້ງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ຕອບໂຕ້ ຕໍ່ການລະບາດຂອງພະຍາດ ໂຄວິດ 19, ໄດ້ດຳເນີນມາດຕະການຈຳນວນໜຶ່ງ ແລະ ໄດ້ເຮັດວຽກຢ່າງໃກ້ຊິດ ກັບອົງການອານາໄມໂລກ ປະຈຳ ສປປ ລາວ, ມາຮອດປະຈຸບັນ ຍັງບໍ່ມີຜູ້ຕິດເຊື້ອ ໄວຣັສ ໂ​ຄວິດ 19 ຢູ່ ສປປ ລາວ. ເພື່ອຕິດຕາມກວດກາ ການຈັດຕັ້ງປະຕິບັດ ມາດຕະການປ້ອງກັນ ແລະ ສະກັດກັ້ນການແຜ່ລະບາດ ຂອງເຊື້ອພະຍາດດັ່ງກ່າວ, ໃນວັນທີ 16 ມີນາ 2020 ຄະນະລັດຖະບານ ນຳໂດຍທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງ ໄດ້ລົງຢ້ຽມຢາມ 4 ຈຸດ ທີ່ເຝົ້າລະວັງ ແລະ ສະຖານທີ່ກວດ, ຕິດຕາມ ກໍລະນີສົງໄສຕິດເຊື້ອ ແລະ ຮອງຮັບຄົນເຈັບຖ້າມີການຕິດເຊື້ອ ເຊິ່ງມີ: ດ່ານສາກົນຂົວມິດຕະພາບ ລາວ-ໄທ 1; ໂຮງໝໍສູນກາງ 103 ກອງທັບປະຊາຊົນລາວ; ໂຮງໝໍມິດຕະພາບ ແລະ ສະໜາມບິນສາກົນວັດໄຕ.

​​ໂອກາດນີ້ ທ່ານ ທອງລຸນ ສີສຸລິດ ໄດ້ກ່າວວ່າ: ມື້ນີ້ ຂ້າພະເຈົ້າ ພ້ອມດ້ວຍຄະນະສະເພາະກິດ ແລະ ພາກສ່ວນກ່ຽວຂ້ອງ ໄດ້ລົງໄປກວດກາສະພາບ ຢູ່ດ່ານຂົວມິດຕະພາບລາວ-ໄທ 1, ຄວາມພ້ອມຂອງ ໂຮງໝໍ 103 ແລະ  ຢ້ຽມຢາມໂຮງໝໍມິດຕະພາບ ຊຶ່ງໂຮງໝໍ 2 ແຫ່ງນີ້ ລັດຖະບານ ໄດ້ຈັດໄວ້ເພື່ອຮອງຮັບຜູ້ສົງໄສຕິດເຊື້ອ ເພື່ອກວດ, ກັກກັນ, ຕິດຕາມ ແລະ ປິ່ນປົວກໍລະນີມີຜູ້ຕິດເຊື້ອ. ສໍາລັບຢູ່ສະໜາມບິນສາກົນວັດໄຕ ກໍ່ໄດ້ຮັບຮູ້ສະພາບການກະກຽມປ້ອງກັນ ແລະ ສະກັດກັ້ນ ຊຶ່ງໄດ້ດຳເນີນການມາຫຼາຍເດືອນນັ້ນ ເຫັນວ່າໜ່ວຍງານທີ່ກ່ຽວຂ້ອງ ໄດ້ປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບສູງ, ມາຮອດຕອນນີ້ ຍັງບໍ່ມີການລາຍງານວ່າພົບຜູ້ຕິດເຊື້ອ  ແຕ່ກໍ່ມີກໍລະນີສົງໄສ ເນື່ອງຈາກເດີນທາງມາແຕ່ຕ່າງປະເທດ ຊຶ່ງໄດ້ມີການກັກຕົວຕິດຕາມອາການ.
 
ທ່ານ ນາຍົກລັດຖະມົນຕີ ໄດ້ກ່າວຕື່ມວ່າ: ຢູ່ດ່ານສາ​ກົນຂົວມິດຕະພາບ ລາວ-ໄທ 1, ສະໜາມບິນສາກົນວັດໄຕ ແລະ ໂຮງໝໍ 2 ແຫ່ງນັ້ນ ເຫັນໄດ້ວ່າ ພວກເຮົາມີຄວາມພ້ອມໃນການຮັບມື ສ່ວນວ່າຈະຮັບປະກັນໄດ້ຊໍ່າໃດນັ້ນ ແມ່ນທຸກໜ່ວຍງານຕ້ອງເຮັດເຕັມທີ່, ເຮັດສຸດຄວາມສາມາດ, ຈະບໍ່ນິ້ງນອນໃຈ ແລະ ຈະບໍ່ປະໝາດ. ພ້ອມດຽວກັນນັ້ນ ທ່ານໄດ້ເນັ້ນໜັກໃຫ້ແຕ່ລະພາກສ່ວນ ສືບຕໍ່ເອົາໃຈໃສ່, ມີມາດຕະການທີ່ຮັດກຸມ; ນອກຈາກ 2 ໂຮງໝໍ ດັ່ງກ່າວ ຄະນະສະເພາະກິດ ໄດ້ແຈ້ງໃຫ້ແຕ່ລະໂຮງໝໍຢູ່ທ້ອງຖິ່ນ ໃຫ້ມີການກະກຽມ ມີຕຶກເພື່ອຮອງຮັບ; ລັດຖະບານ ໄດ້ຊີ້ນຳໃຫ້ຄະນະສະເພາະກິດ ປຶກສາຫາລື ກັບກະຊວງສຶກສາທິການ ແລະ ກິລາ ກ່ຽວກັບແຈ້ງການປິດການຮຽນ-ການສອນຊົ່ວຄາວ ສຳລັບໂຮງຮຽນລ້ຽງເດັກ ແລະ ອະນຸບານ ທົ່ວປະເທດ ເລີ່ມຕັ້ງແຕ່ວັນທີ 17 ມີນາ 2020 ເປັນຕົ້ນໄປ ເພື່ອຫຼຸດຜ່ອນຄວາມສ່ຽງ ໃນການຕິດເຊື້ອຂອງເດັກນ້ອຍ ໃນໄລຍະເຝົ້າລະວັງການແຜ່ລະບາດ ຂອງເຊື້ອພະຍາດດັ່ງກ່າວ. ພ້ອມນີ້, ໄດ້ຊີ້ນຳໃຫ້ແຈ້ງປິດຊົ່ວຄາວດ່ານປະເພນີ ແລະ ດ່ານທ້ອງຖິ່ນ ໂດຍໃຫ້ຜູ້ເດີນທາງເຂົ້າອອກ ໃຫ້ມາຜ່ານດ່ານສາກົນ ຊຶ່ງເປັນດ່ານທີ່ມີຄວາມພ້ອມດ້ານບຸກຄະລາກອນແພດ, ໝໍ ແລະ ອຸປະກອນເຄື່ອງມືກວດກາ ທາງການແພດ ເພື່ອສາມາດກວດກາໄດ້ໝົດທຸກຄົນ ທີ່ເຂົ້າມາລາວ. ສ່ວນມາດຕະການລະອຽດດ້ານຕ່າງໆ ເປັນຕົ້ນ ມາດຕະການດ້ານສາທາລະນະສຸກ, ມາດຕະການ ດ້ານການສຶກສາ, ມາດຕະການດ້ານເສດຖະກິດ…ຄະນະລັດຖະບານ ຈະໄດ້ນໍາມາປຶກສາຫາລື ແລະ ຕົກລົງກັນ ໃນກອງປະຊຸມລັດຖະບານ ສະໄໝສາມັນປະຈໍາເດືອນມີນາ. ນອກນັ້ນ, ທ່ານນາຍົກລັດຖະມົນຕີ ຍັງໄດ້ຮຽກຮ້ອງໃຫ້ທຸກພາກສ່ວນໃນສັງຄົມ ບໍ່ໃຫ້ສວຍໂອກາດຫາຜົນປະໂຫຍດໃນສະພາບການດັ່ງກ່າວ ໂດຍສະເພາະ ການສວຍໂອກາດກັກຕຸນສິນຄ້າ, ສວຍໂອກາດຂຶ້ນລາຄາສິນຄ້າ, ຜ່ານມາ ລັດຖະບານ ໄດ້ມີແຈ້ງການແລ້ວ, ຂໍໃຫ້ທຸກຄົນເປັນເຈົ້າການຊ່ວຍກັນ, ຫາກພົບເຫັນການລະເມີດ ກໍ່ໃຫ້ແຈ້ງຫາພາກສ່ວນກ່ຽວຂ້ອງ ຕິດຕາມແກ້ໄຂ ຫຼື ສະເໜີຜ່ານສາຍດ່ວນທີ່ກ່ຽວຂ້ອງ, ສໍາຄັນອີກອັນໜຶ່ງ ແມ່ນໃຫ້ບັນດາສື່ມວນຊົນທຸກພາກສ່ວນ ເອົາໃຈໃສ່ໂຄສະນາເຜີຍແຜ່ຂໍ້ມູນຂ່າວສານທີ່ມີຄວາມຈິງ, ຕິດຕາມສະພາບ ແລະ ລາຍງານຄວາມຄືບໜ້າໃຫ້ປະຊາຊົນ ໄດ້ຮັບຊາບເປັນປົກກະຕິ. ພ້ອມກັນນີ້, ໃຫ້ປະຊາຊົນ ເອົາໃຈໃສ່ບໍລິໂພກຂໍ້ມູນຂ່າວຢ່າງມີສະຕິ ແລະ ຕ້ອງເປັນຂ່າວຈາກທາງການ, ພ້ອມທັງ ໃຫ້ພິຈາລະນາການເດີນທາງໄປຕ່າງປະເທດ ໂດຍສະເພາະ ບໍ່ໃຫ້ເດີນທາງໄປປະເທດທີ່ມີຄວາມສ່ຽງ. ນອກນີ້, ຍັງໄດ້ຮຽກຮ້ອງໃຫ້ປະຊາຊົນ, ສື່ມວນຊົນ ເຊື່ອໝັ້ນຕໍ່ຄວາມຮັບຜິດຊອບ ແລະ ຄວາມເອົາໃຈໃສ່ຂອງລັດຖະບານ, ລັດຖະບານ ຈະບໍ່ປິດບັງຂໍ້ມູນ ແລະ ຈະແຈ້ງ ສະພາບໃຫ້ສັງຄົມຮັບຊາບ.



ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ